Al di chantunal dal sport da scola en atletica leva sin la plazza da sport Ried a Landquart èn sa participads quest onn 31 teams. Il record da participaziun da l'occurrenza da l'onn passà (42 equipas) n'ha bain betg pudì vegnir cuntanschì, ma quai n'ha betg turblà l'atmosfera. Igl è stà bel d'entupar equipas or da bunamain tut las regiuns da noss chantun. L'aura era stupenta ed i sa tractava da selecziunar or da tut questas gruppas ina represchentanza ferma che sa participescha il proxim onn al final svizzer.
Las equipas per la concurrenza polisportiva consistan da sis commembras e commembers. Quellas fan ina concurrenza da tschintg parts en las disciplinas sprint, currer 1000 m, stafetta da 5 x 80 m, sco er - tenor elecziun - trair la balla u bittar la culla e sigl en aut u sigl en lung.
La concurrenza è stada plain tensiun. Las equipas eran engaschadas e motivadas enormamain da cuntanscher autezzas e lunghezzas e da currer cunter l'ura. En las singulas categorias n'èsi fin la fin betg stà cler tgi che possia ir al final svizzer 2006 en il chantun Turgovia. Pir las glistas da rangaziun han mussà tgi che ha cuntanschì il final. S'allegrar han pudì las equipas victuras da la catagoria dal stgalim superiur "mixed" da Lanquart, la categoria dal stgalim superiur dals mats da Schiers e la categoria dal stgalim superiur da las mattas da Sent. Ultra da questas victuras e da quests victurs da la categoria han pudì sa qualifitgar per il final anc las duas meglras equipas dal segund rang, la categoria dal stgalim aut dals mats da Domat e la categoria dal stgalim aut "mixed" Giacometti Cuira.
Las scolaras ed ils scolars han passentà in bel di nunemblidaivel e per las equipas qualifitgadas datti il proxim onn ina cuntinuaziun en il chantun Turgovia. Cun tensiun guardain nus vers l'avegnir e giavischain a las equipas gia oz bler success e che tut reusseschia bain.

Extract da la glista da rangaziun:
*questas equipas èn sa qualifitgadas per il di svizzer dal sport da scola 2006 en il chantun Turgovia
Categoria A1 (mats 7. - 9. classa)

1       Schiers / Schiers M1*                14'319
2       Domat/Ems / Domaturbos*              13'813
3       Jenaz / Jenaz K1                     13'325

Categoria A2 (mats 5. - 6. classa)

1       Grüsch / Banana Joys aus Grüsch       9'162
2       Samedan / Samedan 3                   5'416

Categoria B1 (mattas 7. - 9. classa)

1       Sent / Sent1*                        11'923
2       Schiers / Schiers B1                 11'572
3       Quader Chur / Quader Chur            11'086

Categoria B2 (mattas 5. - 6. classa)

1       Igis / Die sechs Rennmaeuse           8'851
2       Flims / Flimser Sprinterinnen         6'527
3       Samedan / Samedan 4                   5'021

Categoria C1 (mixed 7. - 9. classa)

1       Landquart / Landquart*               15'718
2       Giacometti Chur / "Insalata mista"*  13'763
3       Usserfeld Grüsch / Bauers            13'166

Categoria C2 (mixed 5. - 6. classa)

1       Flims / Flimser Hüpferinnen           9'438
2       Samedan / Samedan 5                   6'130

Gremi: uffizi per la scola populara ed il sport
Funtauna: rg uffizi per las scolas popularas e sport