La regenza vegn a suttametter al cussegl grond en la sessiun d'october 2005 in rapport davart la revisiun da la lescha chantunala da taglia. Sut il presidi dad Ernst Nigg ha la cumissiun permanenta per economia, taxas e politica da stadi (CETPS) predeliberà quest rapport ils 20 da settember 2005 per mauns dal cussegl grond. Fatg part da questa sesida han er la presidenta da la regenza, dunna dr. Eveline Widmer-Schlumpf, sco er represchentantas e represchentants dal departament da finanzas e da l'administraziun da taglia.

La finamira dal rapport è da sclerir las differentas problematicas en il sectur fiscal, da skizzar soluziuns pussaivlas e da quantifitgar las perditas da taglia che resultan tras quai. Il cussegl grond duai pudair discutar las mesiras preschentadas en il rapport sco er lur consequenzas, e quai avertamain ed independentamain da disposiziuns legalas concretas. Cun il rapport vegn er intenziunà da mussar a la regenza ed a l'administraziun la via per la procedura da legislaziun che suonda quest rapport. Il cussegl grond duai prender decisiuns fundamentalas e fixar l'autezza da las distgargias.

En ses rapport propona la regenza diversas mesiras per eliminar ils dischavantatgs dal lieu existents sco er per reducir la grevezza fiscala da conjugals e da famiglias cun uffants. La cumissiun va d'accord cun las decisiuns da princip sco er cun las mesiras resultantas e cun l'autezza da las distgargias fiscalas che la regenza preschenta en il rapport. Las opiniuns d'ina minoritad da la cumissiun divergeschan sulettamain en ils secturs da la distgargia da las persunas giuridicas che duai succeder pli fitg tar la taglia sin il gudogn e main sin la vart dal chapital, da la liberaziun da las descendentas directas e dals descendents directs da la taglia sin l'ierta e da la taglia sin donaziuns, da l'aboliziun da la taxa speziala sin la facultad e da l'autezza da la distgargia fiscala sin basa da l'autezza da la deducziun per uffants che vegn fixada differentamain tenor categorias da vegliadetgna.

In'ulteriura tractanda da la sesida da cumissiun è stada la tractativa da la fatschenta "revisiun parziala da la lescha da taglia per il chantun Grischun / adattaziun a la lescha davart la fusiun" ch'è medemamain previsa per la sessiun d'october 2005 dal cussegl grond.

La lescha federala davart la fusiun è entrada en vigur il 1. da schaner 2004. Per adattar il dretg chantunal als fatgs resultants è vegnì concedì als chantuns in termin da trais onns. Suenter la scadenza da quest termin vegnan applitgadas las disposiziuns da la lescha d'armonisaziun da taglia che remplazzan normas divergentas dal dretg chantunal.

En quest reguard è la cumissiun suandada las propostas da la regenza en tut ils puncts ed ha deliberà unanimamain la missiva per mauns dal cussegl grond.

Gremi: cumissiun per economia, taxas e politica da stadi
Funtauna: rg cumissiun per economia, taxas e politica da stadi