Il chantun Grischun supplitgescha la confederaziun da renunziar a las midadas previsas en la lescha federala davart agids finanzials per mantegnair e promover la lingua e cultura rumantscha e taliana. La medema supplitga concerna las adattaziuns planisadas da la lescha davart l'instrucziun da las Svizras e dals Svizzers a l'exteriur e da la lescha federala davart la protecziun da la natira e da la patria. Quai punctuescha la regenza en sia consultaziun tar il sboz da la nova lescha federala davart la promoziun da la cultura (LPC) e tar la revisiun totala da la lescha federala davart la fundaziun "pro Helvetia". La regenza argumentescha en general che cuntegns respectivs e novaziuns planisadas pudessan vegnir reglads meglier en la nova lescha federala da linguas e betg en la LPC. Plinavant duai la confederaziun precisar las mesiras ch'èn previsas en il sectur da la promoziun da la cultura. Ultra da quai sto vegnir fatg attenziun che la confederaziun n'intervegnia betg en l'activitad operativa dal cussegl da fundaziun da la fundaziun per promover la cultura "pro Helvetia".

La regenza propona ina lescha separada per umans vagants
Tenor la regenza grischuna stoi vegnir examinà, sch'i na stuess betg vegnir stgaffida ina lescha federala per promover ils umans vagants. Uschia vegniss stgaffida ina basa legala per conceder contribuziuns a chantuns ed a vischnancas. Quai scriva la regenza en sia consultaziun tar il sboz preliminar dal rapport dal cussegl federal davart la situaziun dals umans vagants en Svizra. Plinavant propona la regenza d'augmentar substanzialmain las contribuziuns da la confederaziun a la fundaziun "In futur per ils vagants svizzers". In tal augment ed eventualmain er in augment dal chapital da fundaziun permettessan a la fundaziun da dauzar considerablamain sias contribuziuns da 10 pertschient dals custs per realisar plazzas stablas e plazzas da transit. Tenor il giudicament da la regenza promovessan talas mesiras senza dubi la prontezza dals chantuns e da las vischnancas da stgaffir plazzas novas. Ultra da quai stuess vegnir examinà, sche meds finanzials da la promoziun federala da la construcziun d'abitaziuns na pudessan betg vegnir mess a disposiziun er ad umans vagants.

Posiziun da la regenza grischuna tar ina lescha federala davart las professiuns psicologicas
La regenza grischuna approvescha ina regulaziun federala concernent las premissas per conceder a psicoterapeutas ed a psicoterapeuts betg medicinals la permissiun per pratitgar lur professiun. En quest connex punctuescha ella en la consultaziun correspundenta a la confederaziun ch'ina obligaziun da dumandar ina permissiun saja raschunaivla mo per quellas persunas che lavuran en il sectur da las professiuns psicologicas che tractan - sco persunas professiunalmain independentas - malsognas e disturbis psichics e psicosomatics. Ina vasta protecziun dal titel per psicologas e per psicologs cun in diplom universitar correspundent renconuschì beneventescha ella dentant. Dal rest rinviescha la regenza al fatg ch'il sboz avant maun vegnia a chaschunar custs supplementars per ils chantuns pervi da la prolungaziun dal temp da scolaziun.

La lescha davart il dretgs politics entra en vigur
La revisiun totala da la lescha davart il diever dals dretgs politics en il chantun Grischun dals 17 da zercladur 2005 (titel nov: lescha davart il dretgs politics en il chantun Grischun) vegn messa en vigur per il 1. da schaner 2006. Il termin da referendum da 90 dis per quest relasch è scadì ils 21 da settember 2005 senza esser vegnì duvrà.
Nov cudesch da lingua en rumantsch grischun
Sa basond sin il concept general "rumantsch grischun en scola" dal december 2004 vegn tranter auter elavurà in concept per in nov cudesch da lingua per la 2. fin 9. classa. Ils custs da quest concept importan 48'000 francs. Sia elavuraziun dura dal 1. d'october 2005 fin ils 31 da fanadur 2006. Suenter decida la regenza davart la realisaziun dal concept.

Contribuziuns chantunalas a differentas instituziuns
- Agid da svilup: Per tschintg projects d'agid umanitar a l'exteriur, tranter quels l'agid per las victimas dal terratrembel en Pakistan ed il sustegn da las victimas dal ciclon "Stan" en l'America centrala, ha la regenza approvà ina summa totala da 50'000 francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun