Il Grischun sa legra da la visita dal parlament federal

L'atun 2006 daventa il Grischun per trais emnas il center politic da la Svizra. Alura sa radunan las chombras federalas per lur sessiun numnadamain en la Surselva. Flem sco lieu da sessiun vegn a beneventar las represchentantas ed ils represchentants da la politica federala, sco er persunas impurtantas da l'economia e da la cultura. Ultra da quai vegnan spetgadas numerusas visitadras e numerus visitaders interessads da tut la Svizra.

Ils ospitants vegnan ad esser il chantun Grischun, la regiun Surselva e las vischnancas da Flem Laax Falera. Ensemen cun differentas partenarias e cun differents partenaris sco l'arena da las Alps, il "Park Hotel Waldhaus", la lia rumantscha e Grischun vacanzas duai vegnir stgaffida la pussaivladad che las parlamentarias ed ils parlamentaris pon per l'ina lavurar en moda professiunala en in ambient agreabel. Per l'autra duai il Grischun vegnir percepì sco chantun ch'è - cun sias trais linguas, cun sia ritga cultura e cun ses turissem interessant - in lieu attractiv per l'economia. La lingua e la cultura rumantscha è en quest connex ina part impurtanta da l'ospitant. Questa rolla duai en emprima lingia esser cordiala e generusa, dentant però er cumpetenta en quai che reguarda il contact e l'organisaziun.

L'areal extendì dal "Park Hotel Waldhaus" porscha ina infrastructura optimala per realisar la sessiun. Ultra da tut ils indrizs impurtants per il manaschi parlamentar e per las medias vegni a dar in center per las visitadras e per ils visitaders, nua che persunas interessadas pon vegnir a savair fatgs interessants davart il parlament e davart ils ospitants. Il center pussibilitescha ina preparaziun optimala per il manaschi parlamentar e per l'occupaziun pli detagliada cun la regiun da sessiun attractiva.

In program accumpagnant concentrà ch'è vegnì stgaffì sin basa da las prescripziuns da lavur da la sessiun dat la pussaivladad a las parlamentarias ed als parlamentaris d'emprender ad enconuscher il Grischun da differentas varts. Entant che per il suentermezdi da l'emprima mesemna èn planisadas purschidas tematicas a Mustér/Sedrun, a Val S. Pieder sco er sin las Planeiras, stat per il suentermezdi da la segunda mesemna in'excursiun en l'Engiadina sin il program. Quella vegn cumbinada cun in viadi circular cun la viafier retica sur l'Alvra e tras il Vereina. Activitads da sport e da gieu sco er ina festa populara organisada da l'arena da las Alps e da las vischnancas da la sessiun han lieu la terza emna sco punct final. Sin invit da la regenza grischuna cumplettescha in concert cun maestro Nello Santi e cun la filarmonia da chombra dal Grischun la purschida.

Il preventiv da l'organisaziun chantunala da project importa circa 1,5 milliuns francs, da quels surpiglia il chantun Grischun circa 0,5 milliuns francs. In ulteriur mez milliun vegn pajà da las vischnancas da la sessiun e da l'arena da las Alps. Ina part da circa 350'000.- francs dals custs surpiglian oravant tut las regiuns e las vischnancas d'excursiun sco er sponsuras e sponsurs. Ina part da 150'000.- dal prevenitv da l'organisaziun chantunala da project paja la finala la confederaziun che sto surpigliar supplementarmain ils custs da manaschi da la sessiun en il senn pli stretg. Il preventiv dal chantun Grischun sto vegnir approvà dal cussegl grond en sia sessiun da december 2005.

Las lavurs preparativas ensemen cun ils servetschs dal parlament da la confederaziun progredeschan tenor plan. Fin la primavaira vegnan anc elavurads ils concepts da detagl che mancan anc ed alura vegnan prendidas per mauns las mesirs da realisaziun concretas.

Documentaziun per l'orientaziun a las medias

Gremi: regenza
Funtauna: rg chanzlia chantunala dal Grischun