Dapi passa ventg onns èsi enconuschent che la taxaziun da conjugals da la confederaziun na satisfa betg a las directivas constituziunalas. La regenza grischuna parta l'opiniun dal departament federal da finanzas che quest problem stoppia vegnir schlià uschè svelt sco pussaivel. La regenza refusa dentant cleramain la soluziun che la confederaziun propona. La deducziun per conjugals cun in'activitad da gudogn dubla en l'autezza da maximalmain 55'000 francs che vegn messa en discussiun schliass mo ina pitschna part dals problems existents e stgafiss ultra da quai novas difficultads cun la constituziun. Cun la proposta pudess la grevezza fiscala da conjugals cun in'activitad da gudogn dubla bain vegnir avischinada a tala dals pèrs en concubinat cun in'activitad da gudogn dubla. Perencunter dessi differenzas massivas tar la grevezza fiscala tranter conjugals cun in'activitad da gudogn simpla e tals cun in'activitad da gudogn dubla. Conjugals cun in'activitad da gudogn simpla avessan - tar blers stgalims d'entrada - da pajar alura dus fin trais giadas uschè bleras taglias sco conjugals cun in'activitad da gudogn dubla. Ultra da quai na pudess il problem da la taxaziun da conjugals pensiunads betg vegnir schlià, perquai che la deducziun per conjugals cun in'activitad da gudogn dubla n'als duai betg vegnir concedida.
Tenor l'avis da la regenza cuntrafa il sboz a la constituziun. Perquai intimescha ella la confederaziun da betg pli persequitar la via tschernida. Per tuttina schliar en moda speditiva quest problem enconuschent, duai la confederaziun midar al splitting parzial. Questa soluziun avisescha er il chantun Grischun en la revisiun currenta da la lescha.

La regenza refusa las midadas da l'ordinaziuns davart l'asil
Las propostas dal departament federal da giustia e polizia per midar l'ordinaziun davart l'asil en quai che concerna las dumondas da finanziaziun signifitgeschan in spustament unilateral dals custs als chantuns. Quai scriva la regenza en sia consultaziun a la confederaziun. Correspundentamain refusa la regenza las propostas, uschenavant ch'ellas han ina relevanza finanziala per ils chantuns. Tenor la regenza grischuna vegn la collavuraziun existenta da la confederaziun e dals chantuns messa fundamentalmain en dumonda tras la nova soluziun.

Da vischnancas e regiuns
- Cazas: La regenza approvescha il plan da zonas 1:2000 "zona industriala Realta sut" cun resalvas, ordinaziuns e rinviaments: Il plan da zonas cumpiglia la determinaziun d'ina zona d'industria che cumpiglia circa 3,5 hectaras. Il territori che vegn pertutgà da la revisiun parziala duai servir exclusivamain a la construcziun d'in center da segirezza da charrar. L'organisaziun da cursas d'auto e da cart duai esser exclusa.
- Glion: La regenza approvescha - cun differentas resalvas ed instrucziuns - la revisiun totala da la planisaziun locala da la citad da Glion ch'è vegnida deliberada ils 28 da schaner 2005.
- Masagn: Il project per curreger e per schlargiar la via da la Mantogna dadens tar Masagn vegn approvà cun cundiziuns.
- Parpan: A la vischnanca da Parpan garantescha la regenza ina contribuziun da maximalmain 39'245 francs a las parts dals custs renconuschids da la confederaziun sco custs cun dretg da subvenziuns da la chanalisaziun e da la serenera da la citad da Cuira.
- Stussavgia: Cun differentas resalvas ed instrucziuns approvescha la regenza la revisiun totala da la planisaziun locala ch'è vegnida deliberada ils 14 da mars 2005.
- Spleia: Cun differentas resalvas ed instrucziuns approvescha la regenza la revisiun totala da la planisaziun locala ch'è vegnida deliberada ils 18 da zercladur 2004.
- Tschiertschen: A la vischnanca da Tschiertschan garantescha la regenza ina contribuziun da maximalmain 257'709 francs a las parts dals custs renconuschids da la confederaziun sco custs cun dretg da subvenziuns da la chanalisaziun e da la serenera da la citad da Cuira.
- Vrin: La regenza approvescha ina contribuziun chantunala da maximalmain 22'092 francs als custs supplementars per l'engrondiment da la chanalisaziun a Vrin.
- Vulpera: Il project per construir la punt nova da l'En da Vulpera tranter Scuol e Tarasp vegn approvà cun cundiziuns.

Contribuziuns chantunalas a differentas instituziuns
- Musica Concordia Müstair: A la musica Concordia Müstair vegn concedida ina contribuziun maximala da 7'000 francs per ina instrumentaziun parziala.
- Schumbraders da Domat: Als schumbraders da Domat vegn garantida ina contribuziun da maximalmain 8'000 francs per l'unifurmaziun nova.
- Uniun da l'archiv per l'istorgia agrara: L'uniun da l'archiv per l'istorgia agrara survegn ils onns 2005, 2006 e 2007 ina contribuziun da totalmain 16'200 francs per il project "archiv per l'istorgia agrara".

Projects da vias
La regenza ha approvà 85'000 francs per sanar il traject Seglias - Solas da la via dal Schin.

Chaussas persunalas
- Caroline Gerber-Zahnd da Tavau Plaz è vegnida elegida sco media superiura a l'ospital chantunal da dunnas Fontana a Cuira.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun