L'atun passà han ins udì ina nauscha nova suenter l'autra en connex
cun las clinicas da Tavau. Ultra da la clinica Alexanderhaus che ha
relaschà per la fin da november ca. 110 persunas, han annunzià la
clinica climatica Valbella, la clinica climatica da Turgovia e Schaffusa
sco er il center d'asma ollandais ch'els serrian lur portas. Fin la fin
da mars 05 perda Tavau quatter clinicas tradiziunalas ch'existevan dapi
blers onns e cun quai ca. 300 plazzas da lavur. En vista a questa
situaziun extraordinaria ha l'uffizi per industria, mastergn e lavur
(UCIML) istallà en las localitads dal center d'asma ollandais entaifer
paucas emnas in center dal martgà da lavur, en il qual i stat a
disposiziun a las collavuraturas ed als collavuraturs da las clinicas
ina purschida specifica d'assistenza e d'intermediaziun.
Il UCIML parta dal fatg ch'il dumber da persunas dischoccupadas en
l'intschess dal center regiunal d'intermediaziun da lavur (CRIL) Tavau
vegnia a surpassar suenter la stagiun d'enviern ils 600 e cuntanschia
uschia il maximum absolut.
Nov center dal martgà da lavur
En vista a la dimensiun dals eveniments sin la plazza da clinicas da
Tavau è il UCIML sa decidì en cunvegnientscha cun il departament da
l'intern e da l'economia publica d'organisar a curta vista ina purschida
supplementara da cussegliaziun e d'assistenza a Tavau. Dapi mez da
schaner vegnan realisads en las localitads dal center d'asma ollandais
uschenumnads curs da plazzament e da candidatura per las persunas
pertutgadas che tschertgan plazza. Ultra da quai ha il UCIML engaschà
duas novas collavuraturas ch'eran occupadas fin ussa en il sectur dal
persunal da la clinica Alexanderhaus. L'incumbensa da las collavuraturas
è quella da tschertgar en l'entira Svizra plazzas da lavur en il sectur
da la sanadad e da stgaffir ina rait tranter las patrunas ed ils patruns
en il sectur da la sanadad. Il UCIML spera da pudair intermediar tras
quests contacts uschè bleras persunas che n'èn betg liadas al lieu sco
pussaivel.
Rinforz dal persunal dal CRIL da Tavau
Per il 1. da december 2004 ha il CRIL da Tavau surpiglià da l'uffizi
communal da lavur da Tavau la liquidaziun da las formalitads da
controlla mensilas per las persunas che tschertgan plazza. Resguardond
il traffic da glieud supplementar che vegn chaschunà tras quai e las
relaziuns da plaz stgarsas, han ins tschertgà gia la stad 2004 novas
localitads per il CRIL da Tavau e chattà quellas en la Mattastrasse 9.
Per sa chasar en las novas localitads il 1. da favrer 2005 ha pudì
vegnir engaschà in cussegliader da persunal supplemetar che ha surpiglià
il medem mument la direcziun dal CRIL. Ultra da quai è vegnì rinforzà il
secretariat cun ina ulteriura persuna. Per il mument èn occupadas en il
CRIL da Tavau 4 cussegliadras e cussegliaders da persunal e dus
collavuraturas u collavuraturs administrativs.
Midada tar il project CII
Sco en tut las regiuns dal CRIL dal chantun vegn organisà er a Tavau
en il rom da la collavuraziun interinstituziunala dals purtaders da las
assicuranzas socialas (CII) in project d'integraziun. A quest project
duain pudair sa participar ultra da las persunas dischoccupadas er
persunas che vegnan sustegnidas da l'uffizi dal servetsch social u che
sa chattan en scleriment da la SI. La finamira dals projects
d'integraziun è da pussibilitar ad uschè bleras participantas ed uschè
blers participants sco pussaivel il pass enavos al martgà da lavur.
Areguard localitads adattadas è il UCIML per il mument en tractativas
cun il cussegl cirquital pitschen da Tavau. Ina pussaivladad per il post
è la chasa Von-Sprecher. Per mantegnair las cumpetenzas cuntanschidas en
il center dal martgà da lavur, planisescha il UCIML, sch'igl è pussaivel
e raschunaivel, da transferir successivamain las differentas purschidas
dal center d'asma en il futurcenter CII .
Gremi: Uffizi per industria, mastergn e lavur
Funtauna: rg uffizi per industria, mastergn e lavur