En ina brev a la "società cooperativa per la radiotelevisione nella Svizzera italiana" (CORSI) constatescha la regenza grischuna ch'il Grischun talian è ina part essenziala da la "Svizzera italiana". Perquai han las abitantas ed ils abitants da lingua taliana dal chantun Grischun - sumegliantamain a las Tessinaisas ed als Tessinais - il dretg da pudair s'infurmar per talian davart la vita culturala, civila e politica en il chantun. Quest servetsch d'infurmaziun da l'instituziun statala da radio e televisiun RTSI (radiotelevisione della Svizzera italiana) vegn finanzià tras las taxas - var 280 milliuns francs per onn. Cun quests daners vegnan producids trais programs da radio (rete uno, rete due, rete tre) e dus programs da televisiun (TSI 1 und TSI 2) tras var 1150 emploiadas ed emploiads; da quellas persunas èn dentant mo duas staziunadas stablamain en il chantun Grischun.

La regenza grischuna dumonda uss la giunta da la CORSI d'intervegnir tar la direcziun da la RTSI: Per mintga regiun dal chantun Grischun - Surselva, Engiadin'auta e bassa, Grischun central/Rain posteriur e Partenz/Tavau - sco er per mintga vallada dal Grischun talian - Puschlav, Bregaglia e Val Mesauc/Calanca - duai vegnir engaschà e scolà da la RTSI mintgamai ina rapportadra u in rapportader independent a temp parzial. Areguard ils chanals da televisiun da lingua taliana duai il dumber da collavuraturas e da collavuraturs en il chantun Grischun vegnir multiplitgà per garantir rapports ed infurmaziuns a moda seriusa e cumplessiva. En quest connex s'imponi da retrair las localitads e d'utilisar l'infrastructura dal nov center da medias da radio e televisiun rumantscha RTR a Cuira. Uschia pon vegnir purschids ulteriurs servetschs e vegnir tratgas a niz sinergias cun las collavuraturas e cun ils collavuraturs da RTR. En il nov center da medias fiss il spazi necessari per quest intent avant maun.

La regenza grischuna intimescha vinavant da decentralisar a media ed a lunga vista las plazzas da lavur da la RTSI; actualmain sa chattan questas praticamain tuttas en il Luganese. En il center stat il spustament da plazzas da lavur en la regiun da Bellinzona. Sch'ins sa decidess da vulair installar persunal en il Moesano, purschess la regenza ses servetschs per quest intent. Sco commembra da la CORSI propona la regenza grischuna plinavant da midar ils statuts: En l'avegnir duain pudair daventar commembras da la societad cooperativa CORSI er persunas da lingua taliana che n'abiteschan betg en la "Svizzera italiana" u che n'èn betg burgais d'ina vischnanca correspundenta.

Gremi: regenza
Funtauna: rg chanzlia chantunala dal Grischun