La regenza dal chantun Grischun ha approvà il concept per la candidatura per il patrimoni mundial da la UNESCO 2008 "Viafier retica e cuntrada da cultura Alvra/Bernina" e nominà l'organisaziun dal project. Il plan da termins prevesa d'elavurar il dossier da candidatura fin la stad 2006. La recepziun en la glista dal patrimoni mundial pudess alura succeder tras la UNESCO l'onn 2008.

La regenza grischuna e la viafier retica (VR) han sustegnì l'atun 2004 l'admissiun da la lingia da l'Alvra e dal Bernina en la "liste indicative", pia la glista da propostas per lieus pussaivels da patrimoni mundial da la UNESCO. Il cussegl federal ha approvà quella il december 2004. Uschia è vegnida creada la premissa per la candidatura "Viafier retica e cuntrada da cultura Alvra/Bernina". Ina gruppa da lavur sut la direcziun dal departament da l'intern e da l'economia publica (DIEP) ha alura elavurà in concept per realisar il project. Cun il conclus dals 26 d'avrigl 2005 ha la regenza grischuna approvà il concept e nominà l'organisaziun dal project.

Ils trajects da viafier da l'Alvra e dal Bernina èn las parts centralas da la candidatura da la UNESCO. Il perimeter "viafier" cumpiglia il traject Tusaun - San Murezzan - Campocologno. Ultra dal traject da viafier duai er la cuntrada da cultura vegnir integrada en la glista dal patrimoni mundial. Cuntradas da cultura èn sa sviluppadas or da las interacziuns tranter uman e natira. Per fixar il perimeter da la cuntrada da cultura partan ins d'ina vart dal criteri da la vesaivladad or dal tren e da l'autra vart dals objects ch'èn gia designads en il plan directiv chantunal. Per fixar a moda lianta per las autoritads il perimeter dal project ed ils objects da la cuntrada da cultura che appartegnan al patrimoni mundial da la UNESCO serva la procedura dal plan directiv.

La direcziun strategica dal project è chaussa dal comité directiv; da quel fan part Hansjörg Trachsel, cusseglier guvernativ, Erwin Rutishauser, directur da la viafier retica, e Johann Mürner, schef da la secziun "protecziun da la patria e tgira da monuments" da l'uffizi federal da cultura. Per elavurar il project è responsabel in team da project cun represchentantas e cun represchentants da la viafier retica, da Grischun vacanzas e dal chantun. Suenter ch'il dossier da candidatura è fatg, sto er vegnir elavurà in concept per la commerzialisaziun turistica da la candidatura e dal label da la UNESCO ed i ston vegnir sviluppads products turistics correspundents.

Documentaziun per l'orientaziun a las medias

Gremi: regenza
Funtauna: rg departament da l'intern e da l'economia publica