Ina retschertga da l'uffizi per la furmaziun professiunala davart la tscherna da professiun e da scola mussa, tge vias che la glieud giuvna grischuna vegn a prender suenter il temp da scola obligatori. Circa 2/3 vegnan a cumenzar in emprendissadi, 12% vegnan ad entrar en ina scola media e 17 % vegnan a far in onn intermediar. 8 % èn actualmain anc en tschertga d'ina plazza da scolaziun.
Ina retschertga tar las persunas d'instrucziun da las classas finalas e tar las instituziuns per la scolaziun preprofessiunala ha mussà, tge scolaziun ch'ils giuvenils grischuns che vegnan ord scola vegnan a far suenter il temp da scola obligatori la stad 2005. Il cumenzament da matg eran avant maun las respostas da passa 1615 scolaras e scolars. Da quellas e da quels han 1021 (63 %) fatg in contract d'emprendissadi. Tar ils mats absolveschan 77 % in emprendissadi, tar las mattas 50 %. Las professiuns predilettas èn anc adina commerzianta / commerziant, electromontadra / electromontader, scrinaria / scrinari u las professiuns novas spezialista / spezialist da commerzi en detagl ed emploiada spezialisada / emploià spezialisà per il sectur da sanadad.
Bler dapli mattas (132) che mats (56) prefereschan ina scola da cuntinuaziun. Er ils onns intermediars sco il 10avel onn da scola, l'onn social, in praticum u in segiurn per emprender ina lingua estra vegnan tschernids bler pli savens da las mattas (198) che dals mats (73).
Il cumenzament da matg èn vegnids annunziads 135 giuvenils (54 umens giuvens ed 81 dunnas giuvnas) che n'avevan anc chattà nagina soluziun definitiva suenter la scola. Tras la magistra/tras il magister da classa porscha l'uffizi per la furmaziun professiunala in sustegn a quests giuvenils per pudair intermediar - en il temp che resta fin tar il cumenzament da l'emprendissadi l'avust - ina plazza da scolaziun ad uschè blers dad els sco pussaivel. Actualmain vegni anc sclerì en tge professiuns che vegnan anc tschertgadas plazzas d'emprendissadi. La cussegliaziun professiunala è gugent pronta da gidar ils giuvenils tar lur tschertga d'ina plazza d'emprendissadi u da mussar ad els in'alternativa che correspunda a lur preferenzas ed a lur qualificaziuns. Ultra da quai po ella intermediar ils giuvenils che tschertgan cussegl sin lur giavisch a l'acziun "speranza", cun la quala persunas privatas porschan sco madritscha u sco padrin sustegn ed assistenza tar la tschertga d'ina plazza d'emprendissadi.
Sin l'indicatur da las plazzas d'emprendissadi (http://lena.gr.ch) èn publitgadas actualmain anc 337 plazzas d'emprendissadi libras per il cumenzament da l'emprendissadi 2005. Uschia datti anc pussaivladads da scolaziun per exempel en il commerzi en detagl, en las professiuns da construcziun, en l'elavuraziun da laina, en la branscha da la tecnica da chasa sco er en la gastronomia, ma er en differentas autras professiuns.

Persuna che dat infurmaziuns:
Justina Simeon, manadra da team da la cussegliaziun professiunala da Cuira, telefon 081 257 27 72 (justina.simeon@afb.gr.ch)

Gremi: departament d'educaziun, cultura e protecziun da l'ambient
Funtauna: rg uffizi per la furmaziun professiunala