Dapi lur inauguraziun l'onn 1998 èn las rutas da velo svizras daventadas in success enorm en tut il pajais. Tenor retschertgas scientificas vegnan fatgs mintg'onn 200 milliuns kilometers sin questas vias da velo e dads or totalmain var 240 milliuns francs. En quest connex è la ruta dal Rain – dal pass da l'Alpsur fin Basilea per lung dal Rain – lunschor la pli populara. Uschia cur seschan alura er en il Grischun adina dapli ciclistas e ciclists indigens sco er turistas e turists cun velos cun chargias per part fitg grondas sin las rutas da velo signalisadas uffizialmain. Per che quai restia uschia, sto il stadi da las vias e da la signalisaziun vegnir controllà regularmain. Per incumbensa da l'uffizi da construcziun bassa dal Grischun vegnan perquai controlladas duas giadas l'onn la part grischuna da la ruta dal Rain e la ruta grischuna areguard la charrabladad e la signalisaziun. La controlla da primavaira ha gì lieu durant las ultimas emnas. La vias èn en in bun stadi. Nua che quai è stà necessari èn puspè vegnids montads signals che mancavan u è vegnida meglierada la signalisaziun. En quest connex han ins remplazzà 40 tablas d'infurmaziun als puncts ils pli impurtants da las rutas. Las novas tablas èn vegnidas surlavuradas areguard la grafica ed areguard il cuntegn e mussan sin l'extract da la charta – sco particularitad grischuna – er las rutas da velo dal chantun signalisadas cun ils tatgaders mellens. La rait da las rutas da velo dal chantun è uschia preparada perfetgamain per sa divertir, per giudair e per sa recrear durant il temp liber e durant las vacanzas.

Persuna che dat infurmaziuns P. Stirnimann, Medienverantwortlicher, 081 257 3711

Gremi: Tiefbauamt Graubünden
funtauna: rg Tiefbauamt Graubünden