Il provediment dal chantun Grischun cun ospitals survegn in nov concept. Per quest intent suttametta la regenza al cussegl grond ina missiva, il sboz per ina revisiun parziala da la lescha per promover la tgira da malsauns ed il sboz per abolir l'ordinaziun dal cussegl grond. La nova concepziun dal provediment cun ospitals vegn exequida definitivamain senza serrar ospitals en las regiuns. La regenza motivescha la decisiun correspundenta cun ponderaziuns politicas e cun las cundiziuns topograficas en il chantun. Pia restan en funcziun er ils ospitals che ston vegnir mess en dumonda gia primarmain per ponderaziuns da l'economia da manaschi, numnadamain l'ospital-asil da la Bregaglia a Promontogno, l'ospital da la Val Müstair a Sta. Maria V.M. e l'ospital San Sisto a Puschlav. Per tuttina tegnair quint suffizientamain da las ponderaziuns da rentabilitad, augmenta la regenza la flexibilitad per fixar la purschida cun dretg da contribuziun en ils singuls ospitals. Per quest intent vegn reducì il dumber da tips d'ospital da quatter a dus. Concretamain vegni pia a dar en il Grischun mo pli ospitals cun provediment da center ed ospitals cun provediment da basa.

Il sulet proveditur da center daventa l'ospital chantunal dal Grischun a Cuira che resulta da la fusiun da l'ospital chantunal e regiunal retic a Cuira e da l'ospital da la crusch a Cuira sco er da l'integraziun da l'ospital chantunal da dunnas Fontana. Ospitals dal provediment da basa daventan l'ospital cirquital da l'Engiadin'auta a Samedan, l'ospital dal circul da Tavau a Tavau, l'ospital regiunal da la Surselva a Glion, l'ospital da Tusaun a Tusaun, l'ospital d'Engiadina bassa a Scuol, l'ospital regiunal dal Partenz a Schiers, l'ospital cirquital dal Surses a Savognin, l'ospital San Sisto a Puschlav, l'ospital-asil da la Bregaglia a Promontogno e l'ospital da la Val Müstair a Sta. Maria V.M. Quai resulta da la missiva da la regenza al cussegl grond per la nova concepziun dal provediment cun ospitals, dal sboz per ina revisiun parziala da la lescha per promover la tgira da malsauns e dal sboz per abolir l'ordinaziun executiva respectiva dal cussegl grond tar la lescha per promover la tgira da malsauns. Cun las mesiras planisadas vegn exequida quella part da la mesira 319 da l'examinaziun da las structuras e da las prestaziuns dal cussegl grond per sanar las finanzas dal chantun che n'era betg vegnida realisada en connex cun l'introducziun da la nova finanziaziun dals ospitals. I sa tracta da respargns da dus milliuns francs ad onn.

La nova concepziun dal provediment cun ospitals è daventada necessaria pervi da l'augment dals custs en il sectur da la sanadad en general ed en il sectur dals ospitals en spezial. Sco cuntramesiras ston vegnir adattadas las purschidas da prestaziuns cun dretg da contribuziun dals ospitals subvenziunads a la situaziun actuala e sto vegnir reglada correspundentamain la lescha. La purschida cun dretg da contribuziun dals ospitals vegn dividida da nov en duas gruppas da secturs spezials. D'ina vart quels secturs spezials, als quals il chantun conceda contribuziuns tant per las prestaziuns medicinalas sco er per ils servetschs da pichet dal sectur staziunar. Da l'autra vart quels secturs spezials, als quals il chantun conceda unicamain contribuziuns per las prestaziuns medicinalas (contribuziuns pro cas). Cunquai ch'i na po strusch vegnir spargnà tar las contribuziuns per las prestaziuns medicinalas, sto il chantun restrenscher ils secturs spezials cun dretg da contribuziun per ils servetschs da pichet. En l'avegnir na vegni er betg pli a dar contribuziuns chantunalas per il servetsch da pichet dals ambulatoris. Per betg periclitar las praticas da las medias e dals medis da famiglia duain ils ambulatoris vegnir manads uschia ch'els cuvran ils custs ed els na duain betg pli vegnir subvenziunads.

Gremi: regenza
Funtauna: rg chanzlia chantunala dal Grischun