Las vischnancas duain vegnir obligadas da cunfinanziar las chasas da tgira. Uschia duain taxas da tgira betg cuvridas vegnir surpigliadas en il chantun Grischun en l'avegnir da las vischnancas, en las qualas las abitantas ed ils abitants cun prestaziuns supplementaras maximalas avevan anteriuramain lur domicil. Quai prevesa la regenza en sia missiva al cussegl grond davart ina revisiun parziala da la lescha per promover la tgira da malsauns e l'assistenza da persunas attempadas e da persunas che basegnan tgira (lescha per promover la tgira da malsauns / LTM). Fin uss cuvra il chantun ils custs correspundents. Als purtaders da purschidas per la tgira ed assistenza staziunara da pazientas e da pazients stabels e da persunas attempadas conceda il chantun contribuziuns per retschavidras e per retschaviders da prestaziuns supplementaras maximalas dal stgalim da tgira il pli aut. L'onn 2002 ha il chantun pajà totalmain 862'176 francs per quest intent. L'onn 2003 èn quai stads 980'586 francs. La midada che vegn prendida en egl da la regenza areguard la finanziaziun da las chasas da tgira deriva da l'examinaziun da las structuras e da las prestaziuns per sanar las finanzas dal chantun ch'era vegnida concludida dal cussegl grond il zercladur 2003.

Nova regulaziun da l'organisaziun da la regenza e da l'administraziun
L'organisaziun da la regenza e da l'administraziun dal chantun Grischun duai vegnir reglada da nov. Per quest intent ha la regenza avert la consultaziun tar il sboz per relaschar ina lescha davart l'organisaziun da la regenza e da l'administraziun. Il motiv principal per la nova regulaziun previsa è la nova constituziun chantunala ch'è entrada en vigur il 1. da schaner 2004.

Il ZEPRA survegn ina basa legala
En la prevenziun da la sanadad duain las incumbensas tranter las vischnancas ed il chantun vegnir repartidas cleramain. Quai è ina finamira da la revisiun parziala da la lescha davart ils fatgs da sanadad dal chantun Grischun (lescha da sanadad). En la missiva correspundenta da la regenza al cussegl grond vegnan classifitgadas ed enumeradas las incumbensas e las cumpetenzas da las vischnancas e dal chantun. La versiun revedida da la lescha è ultra da quai la basa legala per cuntinuar cun il center per prevenziun e promoziun da la sanadad (ZEPRA) a Cuira. Ultra da quai vegn realisà il postulat dal cussegl grond per in scumond da far reclama per tubac e per products da tubac. La regenza prevesa er d'extender il scumond da far reclama sin bavrondas cun in volumen d'alcohol da passa 20 pertschient.

Nov sistem da finanziaziun per instituziuns per promover persunas cun impediments
Il sistem per finanziar instituziuns per persunas cun impediments duai vegnir midà fundamentalmain. Uschia duain ils custs chaschunads dals impediments vegnir finanziads en l'avegnir tras il chantun cun pauschalas che sa drizzan tenor la prestaziun. Per persunas impedidas vegn pia ad esser decisiva la prestaziun dals offerents da purschidas d'abitadi e da promoziun. Quai è l'intenziun che la regenza grischuna persequitescha cun la revisiun parziala da la lescha davart la promoziun da persunas cun impediments (lescha d'impedids). La consultaziun correspundenta è averta. Oz surpiglia il chantun ils deficits d'instituziuns per persunas impedidas, uschia ch'i n'existan nagins impuls per ina gestiun rentabla. En la sessiun da zercladur 2003 ha il cussegl grond concludì - en connex cun il tractament da la missiva davart l'examinaziun da las structuras e da las prestaziuns per sanar las finanzas dal chantun - da finanziar instituziuns en il sectur staziunar da persunas impedidas tenor la prestaziun.

Relasch d'ina lescha introductiva chantunala per il provediment economic dal pajais
Cun il conclus da la regenza dals 13 da matg 2003 ha la centrala chantunala per il provediment naziunal (post central) survegnì ina nova organisaziun. Confurm a las recumandaziuns da l'uffizi federal per il provediment economic dal pajais (UFPE) è il cader da 48 persunas vegnì reducì ad otg persunas sco er ad in post da stab da trais persunas. En collavuraziun cun il UFPE ha il post central l'incumbensa d'organisar e d'exequir mesiras economicas adattadas. Scenaris pussaivels èn l'introducziun d'in raziunament da victualias, la contingentaziun dal carburant per il traffic privat sin via u la restricziun da la retratga d'ieli da stgaudar. En la finamira 2005 dal UFPE duain ils chantuns introducir pass che motiveschan l'existenza d'ina organisaziun chantunala per il provediment economic dal pajais e che garanteschan l'execuziun da mesiras economicas. Fin uss n'ha il chantun betg ina basa legala correspundenta. Perquai sto vegnir stgaffida ina lescha introductiva chantunala per il provediment economic dal pajais.

L'iniziativa dal pievel cunter il "numerus clausus a las scolas medias grischunas" è reussì
La regenza ha controllà las suttascripziuns inoltradas ils 15 da zercladur per l'iniziativa chantunala dal pievel "per ina scola media grischuna senza numerus clausus". En quest connex ha ella constatà che l'iniziativa, che pretenda ina revisiun parziala da la lescha davart las scolas medias, è reussida cun 3662 suttascripziuns.

La midada da l'ordinaziun tar la lescha davart credits da consum vegn beneventada
Cun paucas resalvas ha la regenza da princip ina tenuta positiva envers la midada da l'ordinaziun tar la lescha davart credits da consum (OLCC) che vegn prendida en mira sin plaun federal. En sia consultaziun accentuescha la regenza ch'ella beneventia la revisiun proponida uschenavant, ch'ils chantuns na stoppian betg pli suttametter ad in'examinaziun las persunas che dattan u ch'intermedieschan credits. Cun egl sceptic observa la regenza perencunter l'artitgel 7b previs. Da ses puntg da vista sto quel vegnir repassà urgentamain, cunquai ch'il success da la revisiun dependa da questa disposiziun. En l'artitgel 7b vegn reglà, tgè premissas che ston esser ademplidas per che las persunas che dattan u ch'intermedieschan credits possian disponer dals daners sin lur conto bloccà. Per la regenza èsi impurtant che las bancas hajan ina pussaivladad simpla d'examinar, sch'ellas dastgan consegnar ils daners sin il conto bloccà a las persunas che dattan u ch'intermedieschan credits.

La regenza s'engascha per integrar la scolaziun da persunas d'instrucziun da la scola professiunala en il champ da la scola auta
Bain accepta la regenza dal chantun Grischun la voluntad politica da sviluppar a curta ed a media vista in'atgna soluziun per la scolaziun da persunas d'instrucziun en la furmaziun professiunala. En vista al champ da la scola auta 2008 - 2016 dat ella dentant grond pais sin quai che las decisiuns e ch'ils svilups vegnian concepids uschia, ch'ina integraziun posteriura en il champ da la scola auta saja pussaivla. Ultra da questa resalva considerescha ella l'ordinaziun davart l'institut federal da scola auta per furmaziun professiunala sco ina buna soluziun pragmatica.

Consultaziun davart la midada da la lescha federala davart la libra circulaziun da las advocatas e dals advocats
La regenza grischuna va d'accord cun il fatg ch'i basegna en l'avegnir in titel da "master" per vegnir inscrit en il register da las advocatas e dals advocats. Quai menziunescha ella en sia consultaziun davart la midada da la lescha federala davart la libra circulaziun da las advocatas e dals advocats. Per la regenza n'è il titel da "bachelor", che vegn surdà gia suenter trais onns da studi, betg ina basa suffizienta per vegnir inscrit en il register. El na po er betg vegnir cumpareglià cun il licenziat svizzer. Plinavant considerescha la regenza ch'i saja raschunaivel che tut ils chantuns stoppian admetter titularas e titulars dal diplom da "bachelor" al praticum. Igl è cunvegnent da dar a las studentas ed als students gia baud la pussaivladad d'applitgar quai ch'els han emprendì.

Da vischnancas e regiuns
- Bever: A la vischnanca da Bever dat la regenza la permissiun da manar la scola primara e la scolina a partir da l'onn da scola 2005/2006 sin tut ils stgalims a moda bilingua.
- Cazas: La nova constituziun communala vegn approvada.
- Cuira: La nova constituziun communala vegn approvada.
- Cuira: La regenza approvescha la prolungaziun da la fasa d'emprova II per l'experiment da scola "scola bilingua en la citad da Cuira" durant ils trais onns da scola 2006/2007, 2007/2008 e 2008/2009. Per quest intent vegn garantì ina contribuziun chantunala da totalmain 30'000 francs.
- Duvin: La regenza approvescha ina contribuziun chantunala da maximalmain 24'718 francs per renovar e per cumplettar il provediment d'aua.
- Jenaz: La regenza approvescha la revisiun parziala da la lescha da construcziun (art. 28 al.2 lit. d). Il plan da zonas e plan general da furmaziun 1:2'000 (midada dals 26 d'october 2004) vegn approvà cun resalva e la procedura d'approvaziun per il plan da zonas 1:10'000 "Alp Nova" (midada dals 26 d'october 2004) vegn sistida, fin ch'ina permissiun da runcar è avant maun. Il plan general d'avertura 1:2'000 (midada dals 26 d'october 2004) vegn approvà.
- Masagn: La regenza garantescha a la vischnanca da Masagn ina contribuziun chantunala da maximalmain 252'126 francs per la dustanza da l'ual dal vitg, da l'ual da Dalaus e da la val da Schauenstein.
- Rabius: Sin la via da colliaziun Rabius - Surrein - Reits vegn augmentà il pais maximal permess per vehichels, e quai da 16 a 28 tonnas.
- Riom-Parsonz: La regenza garantescha ina contribuziun chantunala maximala da 210'000 francs per engrondir il stabiliment da scola. Quai correspunda a 26 pertschient dals custs imputabels.
- Stampa: La regenza approvescha la revisiun totala da la lescha davart la taxa da cura e davart la contribuziun per promover il turissem per Malögia, la part sura da la vischnanca politica da Stampa.
- Sumvitg: La regenza approvescha la revisiun totala dal reglament davart las taxas da cura e davart las contribuziuns per promover il turissem.
- Vrin: Per amplifitgar la via champestra Cons Furcles - Sogn Giusep garantescha la regenza ina contribuziun chantunala da maximalmain 450'992 francs. Quai correspunda a 39,7 pertschient dals custs imputabels.

Contribuziuns chantunalas a differentas instituziuns
- Pro Lucmagn: La cunvegna cun l'uniun "pro Lucmagn" per tegnair avert la via dal Lucmagn durant l'enviern vegn prolungada per tschintg ulteriurs onns. Las lavurs dal servetsch d'enviern vegnan a chaschunar custs da ca. 410'000 francs.
- Il Grischun sco pajais da museums: Il project da regio plus "Il Grischun sco pajais da museums" da la federaziun da tetg dals museums grischuns vegn sustegnì cun ina contribuziun chantunala da 150'000 francs.
- Tiradurs sportivs da Soazza: Or dal fond da sport vegn concedida ina contribuziun da maximalmain 15'100 francs per far ina midada da construcziun vi da l'implant da tir a caliber pitschen a Soazza.
- Club da raiver sportiv da Tavau: Or dal fond da sport vegn concedida ina contribuziun da maximalmain 47'000 francs per construir ina nova paraid da raiver en la halla da tennis da Tavau.

Chaussas persunalas
- Gian Cla Feuerstein, domicilià a Samedan, daventa manader regiunal da l'uffizi forestal cun lieu da lavur a Zuoz.
- Markus Stadler, domicilà a Zernez, è vegnì elegì sco inschigner forestal regiunal tar l'uffizi forestal a Schiers.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun