La sonda passada ha il stabiliment per la tratga da peschs a Trun pers in pèr tschients da ses peschs da tratga. Ils peschs da tratga che vegnivan tegnids en batschidas externas èn morts entaifer paucas uras vi d'ina intoxicaziun. Examinaziuns da l'aua e dals peschs duain dar ulteriurs scleriments. Fin ussa n'èn enconuschents ni il motiv precis ni la persuna che ha chaschunà questa intoxicaziun.

La sonda passada hai dà ina muria acuta da peschs en trais puzs da tratga dal stabiliment chantunal per tratga da peschs a Trun. Suenter che la controlla da la damaun n'aveva mussà nagins indizis per ina irregularitad, ha circa sis uras pli tard stuì vegnir constatà la mort da tut ils peschs ch'eran vegnids tegnids en ils puzs externs dal stabiliment. La perdita cumpiglia 20 animals sexualmain madirs che han fatg pitschens sco er circa 750 animals giuvens d'in fin dus onns ch'eran deditgads per la tratga secundara. Las litgivas d'ual e las litgivas da lai vegnivan tegnidas per la producziun da frega.

Il motiv per la muria andetga dals peschs n'ha fin ussa anc betg pudì vegnir eruì. Las analisas da l'aua e las examinaziuns dals peschs vegnan a dar scleriment, sche substanzas toxicas per ils peschs eran arrivadas en las auas da surfatscha che vegnan enchaschadas per la tratga da peschs ed han eventualmain chaschunà questa muria en massa.

Gremi: uffizi da catscha e pestga dal Grischun
Funtauna: rg uffizi da catscha e pestga dal Grischun