La regenza sustegna il project da l'institut per furmaziun supplementara professiunala (IFSP) a Cuira d'acquistar in nov edifizi da las viafiers federalas sin l'areal da l'anteriur lavuratori principal da las viafiers federalas sper la staziun. Ella ha approvà il project correspundent dal team d'architectas e d'architects "Büro B", architectura e planisaziun SA, Berna. Per acquistar il nov edifizi empermetta ella plinavant a la IFSP ina contribuziun chantunala da 4'545'500 francs. Quest import correspunda a 50 pertschient dals custs d'investiziun imputabels da 9'091'000 francs. La garanzia da contribuziun definitiva succeda sin basa dal project da construcziun definitiv. Sco premissa per las subvenziuns dal chantun sto la confederaziun plinavant pajar contribuziuns en la dimensiun da trais milliuns francs. La contribuziun da construcziun duai vegnir integrada en il preventiv dal chantun Grischun 2006 ed en il plan da finanzas 2007 - 2010. Davart quest fatg decida il cussegl grond. Cun acquistar il nov edifizi duai la scola professiunala superiura, ch'era domiciliada fin uss a la Ringstrasse, extender sia purschida e segirar ses avegnir.

Nagin plan chantunal d'utilisaziun sco mesira cunter la construcziun d'abitaziuns secundaras en Engiadin'auta
Per la regenza n'èn las premissas per in plan chantunal d'utilisaziun per il sectur da la construcziun d'abitaziuns secundaras en Engiadin'auta betg ademplidas. Quai scriva ella en sia resposta a la brev da la fundaziun Terrafina, publitgada il cumenzament da fanadur. En questa brev aveva la fundaziun exprimì ses quitads areguard il fatg da realisar confurm al temp l'iniziativa cirquitala davart la restricziun da construir abitaziuns secundaras, acceptada ils 5 da zercladur 2005 da las vischnancas da l'Engiadin'auta, e pretendì mesiras immediatas tras il chantun. En il rom d'ina planisaziun chantunala d'utilisaziun respectivamain d'ina zona chantunala da planisaziun tenor la nova lescha davart la planisaziun dal territori per il chantun Grischun (nLPTGR) era la regenza vegnida intimada en spezial da far ina repartiziun provisoria dals contingents d'abitaziuns secundaras sin las vischnancas da l'Engiadin'auta.
Dal puntg da vista da la regenza na datti dentant nagin spazi per ina tala zona da planisaziun. Gist uschè pauc fissan dadas - tenor il stadi actual da la situaziun - las premissas per in'urden substitutiv tenor il dretg da surveglianza. Tant sin il stgalim da la regiun sco er sin il stgalim da las vischnancas vegni - tenor la valitaziun da la regenza - fatg sforzs da tegnair quint da las pretensiuns e da las finamiras da l'iniziativa cirquitala cun atgnas mesiras. Ultra da quai era il cussegl grond s'exprimì en il rom da la tractativa davart la nLPTGR da laschar a las vischnancas ina libertad da decider areguard la regulaziun da la construcziun d'abitaziuns secundaras.
La revisiun parziala da la lescha davart la banca chantunala grischuna entra en vigur
Ils 27 da fanadur 2005 è scadì il termin da referendum per la lescha davart la banca chantunala grischuna senza esser vegnì duvrà. La regenza ha concludì da metter en vigur la lescha per il 1. d'avust 2005.

Da vischnancas e regiuns
- Schlarigna: A Schlarigna vegn la sveltezza maximala limitada a 30 kilometers l'ura sin tut il territori communal. En la zona da tempo 30 vegnan integrads plirs trajects da la via chantunala sco las entradas da la via maistra al nord ed al sidvest dal vitg e l'entrada en il vitg nà dal sviament.
- Degen: A la vischnanca da Degen vegn garantida ina contribuziun pauschala da 66'000 francs per sanar e per engrondir il stabiliment dal provediment d'aua.
- Duvin: A la vischnanca da Duvin vegnan garantidas contribuziuns da totalmain 23'636 francs per ils custs cun dretg da contribuziun renconuschids per construir il provediment d'aua.
- Flearda: La regenza approvescha il plan da zonas 1:1000 "Pro Tgä".
- Furna: Per engrondir il stabiliment dal provediment d'aua en il territori "Hinder- und Usserbärg" survegn la vischnanca da Furna ina contribuziun da 278'604 francs. Quai correspunda a 21,3 pertschient dals custs da construcziun imputabels dad 1'308'000 francs.
- Haldenstein: Il plan da zonas e plan general da furmaziun 1:1000 "midada da las parcellas 342/343" vegn approvà.
- Küblis: Cun cundiziuns approvescha la regenza il project inoltrà da la rezia energia Claustra SA concernent l'optimaziun dal volumen utilisabel dal lai da gulivaziun Pläviggin.
- Preaz: Il project per curreger e schlargiar la via dador da la Mantogna tranter il spartavias Lescha e Preaz vegn approvà cun cundiziuns.
- Rueun: A la vischnanca da Rueun vegn garantida ina contribuziun pauschala da 65'000 francs per renovar e per engrondir il stabiliment dal provediment d'aua.
- Seewis: La regenza approvescha il nov reglament per las zonas da protecziun ed il plan da las zonas da protecziun per las funtaunas sin il territori communal da Seewis.
- Suraua: A la vischnanca da Suraua conceda la regenza ina contribuziun da 97'356 francs per ils custs da construcziun dal stabiliment dal provediment d'aua cun in'ovra idraulica pitschna.
- Trun: La revisiun parziala da la lescha communala da taglia vegn approvada.
- Urmagn: Il plan da zonas 1:500 "revisiun parziala Palö" vegn approvà.
- Zizers: La regenza approvescha l'engrondiment dal traject da via da velo davent da la halla da tennis dals Tschintg Vitgs fin a la "Badgumpe" sin ina lunghezza da 520 meters. Als custs da l'engrondiment vegn concedida ina contribuziun chantunala maximala da 55'000 francs.

Contribuziuns chantunalas a differentas instituziuns
- Viafier retica: A la viafier retica conceda la regenza ina contribuziun chantunala da 630'000 francs. Quests meds finanzials servan a renovar la staziun da Miralago sin la lingia dal Bernina. Questa renovaziun custa totalmain 3'500'000 francs.
- Consorzi per aua persa da l'Engiadin'auta: Sco mesira substitutiva per engrondir las sereneras "Staz" e "Sax" vegn garantida ina contribuziun da maximalmain 1'085'659 francs al consorzi per aua persa da l'Engiadin'auta ed a las vischnancas da Bever e da Samedan per il conduct principal da las ovras electricas d'Engiadina da Bever a S-chanf.
- Associaziun da sauar da Scuol: La regenza dat ses consentiment a la dumonda da subvenziun da l'associaziun da sauar da Scuol e conceda ina contribuziun chantunala da maximalmain 24'150 francs per l'enchaschament da l'aua da l'ual da Clozza.
- Fundaziun "pro tschess barbet": A la fundaziun "pro tschess barbet" vegn pajada ils onns 2005, 2006 e 2007 ina contribuziun da maximalmain 30'000 francs per il project "recolonisaziun dal tschess barbet en las Alps".
- Uniun "museum dal sport d'enviern a Tavau": Tenor il conclus da la regenza survegn l'uniun "museum dal sport d'enviern a Tavau" in sustegn unic da maximalmain 11'000 francs per inventarisar ils objects entrads da nov.
- Budo Mustér: Or dal fond da sport survegn l'uniun da budo da Mustér ina contribuziun maximala da 13'700 francs per midar la construcziun da ses local da trenament.
- Tiraduras e tiradurs da 10 meters da Mezzaselva: A las tiraduras ed als tiradurs da 10 meters da Mezzaselva conceda la regenza ina contribuziun da maximalmain 5'700 francs per cumprar tschintg indrizs per inditgar las tutgadas.

Projects da vias
- La regenza ha approvà totalmain circa 3,5 milliuns francs per construir e per sanar divers trajects da via:
- A13, San Bernardin nord - Tusaun
- A13, Soazza - tunnel dal San Bernardin, sid
- via da l'Engiadina, S-chanf - Brail
- via da Sursaissa
- via da l'Engiadina, Spissermühle - Samignun
- sviament da Flem

Chanzlia chantunala dal Grischun

Gremi: Regenza
Funtauna: rg chanzlia chantunala dal Grischun