A partir d'immediat pon ins prender invista dals asils da selvaschina dal chantun Grischun en l'internet (www.wildasyl.gr.ch) e stampar quels sco chartas. En collavuraziun cun l'uffizi da chatscha e pestga ha il center da cumpetenza dal SIG mess a disposiziun las datas sin in mapserver. En quest connex han ins pudì profitar da las experientschas fatgas l'enviern passà cun metter en l'internet las zonas da paus per la selvaschina (www.wildruhe.gr.ch).
Asils da selvaschina èn territoris cun in scumond da chatscha total u parzial che vegnan fixads da la regenza e che vegnan mintgatant er numnads territoris scumandads per la chatscha. Els èn in med impurtant da la planisaziun da la chatscha, cunzunt per garantir che la structura da vegliadetgna dals effectivs da selvaschina saja natirala e che la selvaschina saja repartida sin il spazi vital confurm a la spezia. Ils asils federals da selvaschina designads dal cussegl federal sco er il parc naziunal svizzer èn er territoris scumandads per la chatscha.
Giuridicamain liantas èn la descripziun dals cunfins tenor il conclus da la regenza sco er la marcaziun en il territori. Ils cunfins dals asils da selvaschina èn marcads cun mellen e cotschen. Questa marcaziun na dastga betg vegnir scumbigliada cun la marcaziun da las sendas da viandar. Ils cunfins van numnadamain savens per lung dad uals e da grippa u er a travers paraids-crap.

Gremi: uffizi da chatscha e pestga
Funtauna: rg uffizi da chatscha e pestga