Cun 7'556 suttascripziuns valaivlas è reussì il referendum cunter la lescha davart la chatscha e la protecziun da selvaschina en il chantun Grischun (lescha da chatscha). La regenza ha fixà il termin per la votaziun dal pievel davart quest project sin ils 24 da settember 2006. Da la verificaziun che la chanzlia chantunala ha fatg da las suttascripziuns inoltradas sin las glistas da suttascripziuns attestadas è resultada ina differenza cun las indicaziuns dal comitè da referendum. Effectivamain èn vegnidas inoltradas 7'703 e betg 7'626 suttascripziuns. Da quellas ston vegnir deducidas 147 suttascripziuns che n'èn betg valaivlas. Uschia restan anc 7'556 suttascripziuns valaivlas.

La regenza beneventa la nova ordinaziun davart la scolaziun e davart la furmaziun supplementara en il servetsch veterinar public
La regenza grischuna giuditgescha da princip en moda positiva l'ordinaziun proponida da la confederaziun davart la scolaziun e davart la furmaziun supplementara en il servetsch veterinar public sco er las midadas en l'ordinaziun davart epidemias d'animals. La scolaziun e la furmaziun supplementara en il servetsch veterinar public n'è fin ussa betg reglada en moda unitara en Svizra. Pervi da las pretensiuns ch'èn s'augmentadas stoppia vegnir beneventada ina regulaziun da la scolaziun e da la furmaziun supplementara da veterinarias e da veterinaris sco er d'expertas spezialisadas e d'experts spezialisads constatescha la regenza en sia resposta da consultaziun. Cun questa scolaziun meglierada vegnia augmentada senza dubi l'effizienza dals servetschs veterinars.
L'organisaziun da controllas che stoppian - tenor la lescha - vegnir fatgas cumplettamain possian en regiuns periferas e pauc populadas dentant mo vegnir fatgas cun blera lavur e cun custs sproporziunads, sch'ins veglia far quai cun il servetsch veterinar professiunal proponì, cuntinuescha la regenza. Pervi da quai stoppia vegnir garantì ch'ils chantuns survegnian tanta libertad da pudair prender regulaziuns excepziunalas - pervi da las relaziuns topograficas spezialas en regiuns periferas - e da pudair fixar facilitaziuns per far las controllas.

La nova lescha davart la segirezza da products vegn beneventada
La regenza grischuna sustegna la revisiun - planisada da la confederaziun - da la lescha federala davart la segirezza d'installaziuns e d'apparats tecnics e ses transferiment en ina lescha federala davart la segirezza da products. Cun la revisiun vegn tranter auter augmentà il nivel da protecziun. La nova definiziun da segirezza pretenda numnadamain ch'in product na stoppia betg mo esser segir, sch'el vegn duvrà tenor sia destinaziun, mabain er en cas d'ina utilisaziun faussa che po vegnir anticipada cun ina tscherta raschun. Cun questa adattaziun vegn la lescha er armonisada cun la directiva da la UE. Sco che la regenza scriva en sia resposta da cosultaziun èsi impurtant tant da l'optica da l'economia sco er da tala da las consumentas e dals consuments da disponer d'ina lescha federala davart la segirezza da products che saja cumpatibla cun la UE.

Da vischnancas e regiuns
- Filisur: En il vitg da Filisur vegn fixada per tut il territori communal la sveltezza maximala a 30 km/h ed introducida ina "zona da tempo 30".
- Schlarigna: Il plan da zonas parzial e plan general da furmaziun 1:2'000 Pros d'Islas da la vischananca da Schlarigna dals 12 da december 2005 vegn approvà.
- Savognin: La revisiun parziala da la lescha da construcziun da la vischnanca da Savognin, concludida ils 24 d'october 2005, vegn approvada. Er approvà vegn il plan da zonas e plan general da furmaziun / d'avertura "zona da mantegniment Parnoz" dals 24 d'october 2005.
- Val Puschlav: Il plan directiv regiunal "explotaziun da material" e "deponias da material / plazzas per rimnar e per zavrar ruments da construcziun" ch'è vegnì deliberà da la regiun da la Val Puschlav ils 13 da settember 2005 vegn approvà e declerà sco liant per las autoritads dal chantun Grischun.
- Castiel: La dumonda da contribuziun da la vischnanca da Castiel per engrondir la rait da vias champestras vegn approvada ed ina contribuziun chantunala da maximalmain 54'600 francs vegn garantida per quai.

Contribuziuns chantunalas a differentas instituziuns
- Agid umanitar: La regenza grischuna ha concludì da pajar ina contribuziun da 10'000 francs a l'agid protestant svizzer (HEKS) a favur da l'acziun d'agid per las victimas dal terratrembel en l'Indonesia.
- Institut paleontologic e museum da l'universitad da Turitg: L'institut paleontologic ed il museum da l'universitad da Turitg survegnan ina contribuziun da maximalmain 6'500 francs per exchavar fossilias en il territori dal Ducan l'onn 2006.
- Festival XONG 06: Il festival XONG 06 per promover il barat cultural en la regiun da cunfin dals trais pajais Val Müstair/Engiadina bassa, Oberes Gericht e Obervinschgau che ha lieu dals 23 fin ils 29 da fanadur 2006 vegn sustegnì cun ina garanzia da deficit da maximalmain 20'000 francs.

Projects da vias
La regenza ha approvà totalmain 3'430'000 francs per construir e per sanar il suandant traject da via:
- via sursilvana: sviament da Flem

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun