La regenza grischuna ha concludì da manar vinavant il project grischun d'intervenziun cunter violenza a chasa per trais ulteriurs onns fin la fin 2009. Cun il project d'intervenziun duai vegnir cuntanschida ina midada da tenuta tar il tractament da la violenza a chasa. Il project d'intervenziun lantschà l'onn 2003 ha mess ils emprims trais onns l'accent sin la scolaziun e sin la sensibilisaziun d'expertas e d'experts. Uss è planisà tranter auter d'extender quest accent sin la situaziun da las victimas suenter las intervenziuns tras la chasa da dunnas e tras l'agid a las victimas. Ils meds finanzials per la cuntinuaziun dal project importan totalmain 186'000 francs.
Ultra da quai intenziunescha la regenza da stgaffir in nov post da cussegliaziun per persunas che commettan violenza. Il post da cussegliaziun per delinquentas e per delinquents duai contribuir d'evitar ulteriurs acts da violenza cun mitigiar situaziuns acutas e motivar persunas che commettan violenza da chertgar ulteriur agid. L'installaziun da quest emprim post da consultaziun serva er spezialmain a la protecziun da las victimas e da terzas persunas.

Al pass dal Spleia vegn reparada ina galaria cun valur istorica
La regenza ha concludì da pajar per la reparaziun da la galaria al pass dal Spleja per ils onns 2005 fin 2008 totalmain 933'000 francs. La galaria al pass dal Spleia ch'è 312 meters lunga è vegnida construida 1843 sco protecziun d'enviern tenor plans da l'inschigner talian Carlo Donegani e da l'inschigner grischun Richard La Nicca. L'object è ina part da la via istorica da Spleia, a la quala vegn assegnada impurtanza naziunala entras l'inventari da las vias da communicaziun istoricas da la Svizra (IVS). La galaria al pass da Spleia è ina perditga impurtanta per l'art d'inschigners en l'emprima mesadad dal 19. tschientaner.
La galaria ch'è vegnida messa ord funcziun ils onns 1950 è sa mantegnida en ina originalitad ch'è rara sche betg schizunt unica per l'entira Svizra. Il concept qua avant maun prevesa da segirar e da conservar l'entira galaria e da reparar il traject inclusiv la salaschada da circa 60 meters davent dal portal dal nord. Quest traject duai vegnir utilisà sco centrala da documentaziun davart la galaria sco er per exposiziuns e per ulteriuras occurrenzas.

Da vischnancas e regiuns
- Parc regiunal Ruinaulta: La regenza grischuna ha approvà l'adattaziun dal plan directiv chantunal 2000 (PDChant) dals 17 da matg 2006 sco er il plan directiv regiunal correspundent - ch'è vegnì decidì da la regiun Surselva - per il parc regiunal e per il monument da la natira Ruinaulta / chavorgia dal Rain e declerà sco liant per las autoritads dal chantun Grischun.
- Samignun: Il plan general d'avertura 1:5'000 "ennevar 2. etappa" dals 27 da november 2005 da la vischnanca da Samignun vegn approvà.
- Lumbrein: La revisiun parziala da la planisaziun locala da la vischnanca da Lumbrein, concludida ils 7 d'avrigl 2006, vegn approvada.
- Lon-Tusaun: Il plan dal cunfin da vischnanca Lon-Tusaun vegn approvà.
- Tschlin: A Tschlin, entaifer il vitg da la fracziun da Strada, vegn fixada la sveltezza maximala a 30 km/h a partir da la chasa Scharplaz fin a la sortida dal vitg a l'ost, e quai cun integrar la via chantunala. Medemamain vegn introducida ina "zona da tempo 30".

Contribuziuns chantunalas a differentas instituziuns
- "Scola e furmaziun cuntinuada da la Svizra": A la "scola e furmaziun cuntinuada da la Svizra" vegn concedida ina contribuziun da maximal 150'000 francs per la realisaziun dals curs da stad 2009 u 2010 en il Grischun.
- Open airs: La regenza ha concludì da sustegnair en tut sis open airs che han lieu en il Grischun l'onn 2006 cun garanzias da deficit en l'import total da maximal 24'500 francs.
- Federaziun grischuna da cursas d'orientaziun: La federaziun grischuna da cursas d'orientaziun survegn per la participaziun al cup "arge alp OL" ils 7/8 d'october 2006 a Salzburg ina contribuziun dal fond da sport da maximal 7'100 francs.
- Festa da tir chantunala: Il chantun Grischun sa participescha al sponsoring da seria da la 23. festa da tir chantunala dal Grischun 2007 cun ina contribuziun da 12'000 francs.

Projects da vias
La regenza ha approvà totalmain 2'918'000 francs per construir e per sanar ils suandants trajects da via:
- via naziunala A13: Pian San Giacomo - Malabarba
- via naziunala A13: Traversa sid - rampa d'access Rofla

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun