Fixà ils projects da votaziun dals 24 da settember
- Seiteninformationen
- Erste Mitteilung
- Neuen Beitrag einfügen
La dumengia, ils 24 da settember 2006, vegn il pievel ad avair da decider davart dus projects chantunals sco er davart trais projects federals. Suenter ch'il referendum cunter la revisiun parziala da la lescha davart la chatscha e la protecziun da selvaschina en il chantun Grischun (lescha da chatscha) è reussì, ha la regenza fixà la data da la votaziun dal pievel davart quest project sin ils 24 da settember 2006. Il medem di vegn er votà davart la revisiun parziala da la constituziun chantunala ch'era vegnida deliberada dal cussegl grond ils 14 da zercladur 2006 (nov art. 50 al. 3: delegaziun da cumpetenzas legislativas als instituts chantunals autonoms).
Sin plaun federal vegn votà ils 24 da settember 2006 davart ils suandants projects: l'iniziativa dal pievel dals 9 d'october 2002 "Ils gudogns da la banca naziunala per la AVS" (conclus federal dals 16 da december 2005), la lescha federala dals 16 da december 2005 davart las persunas estras e la midada dals 16 da december 2005 da la lescha d'asil.
La nova lescha e la nova ordinaziun davart las advocatas ed ils advocats entran en vigur
La regenza grischuna metta en vigur per il 1. da fanadur 2006 la lescha chantunala davart las advocatas ed ils advocats. La lescha ch'era vegnida relaschada dal cussegl grond en la sessiun da favrer 2006 è vegnida suttamessa al referendum facultativ tras la publicaziun en il fegl uffizial dal chantun dals 23 da favrer 2006. Il termin da referendum è scadì ils 24 da matg 2006 senza esser vegnì duvrà. Cun l'entrada en vigur da la lescha relascha la regenza ultra da quai in'ordinaziun davart las advocatas ed ils advocats. Materialmain sa basa la nova ordinaziun en emprima lingia sin quellas disposiziuns da l'ordinaziun veglia dal cussegl grond davart l'attest da qualificaziun e la pratica professiunala dals advocats (ordinaziun d'advocats), las qualas n'han betg pudì vegnir transferidas en la nova lescha davart las advocatas ed ils advocats. L'ordinaziun cuntegna disposiziuns davart l'examen d'advocatas e d'advocats, davart las publicaziuns (register da las advocatas e dals advocats e glista publica sco er concessiun da l'attest da qualificaziun), davart il register da las mesiras disciplinaras sco er davart l'indemnisaziun da la cumissiun da surveglianza. L'ordinaziun cuntegna er la basa per las taxas che pon vegnir incassadas tenor la lescha federala davart la libra circulaziun da las advocatas e dals advocats e tenor la lescha chantunala davart las advocatas ed ils advocats.
Da vischnancas e regiuns
- Project collectiv "malauras 2005": La regenza ha approvà il project "malauras 2005", in project collectiv da differentas vischnancas. Als custs cun dretg da subvenziun da 5'715'000 francs vegnan garantidas contribuziuns chantunalas da totalmain 953'750 francs. Il project collectiv cuntegna lavurs da reparaziun vi d'ovras da protecziun e vi da stabiliments d'avertura. Il project cumpiglia passa 150 objects donnegiads cun ina summa totala dals donns da 5'715'000 francs che sa repartan sin 47 patrunas e patruns da construcziun.
- Schiers: Il project singul "malauras 2005, reparaziun dals stabiliments d'avertura e dals rempars d'aual, Schiers" da la vischnanca da Schiers vegn approvà. Als custs cun dretg da subvenziun dad 1'570'000 francs vegn garantida ina contribuziun chantunala da 294'300 francs.
- Susch: Il project per ils rempars da la Susasca (project consecutiv da las auas grondas da l'avust 2005) sin il territori da la vischnanca da Susch vegn approvà. Per ils custs calculads cun 1'590'000 francs vegn approvada ina contribuziun chantunala da 397'500 francs.
- Fuldera: Per la 5avla etappa da la sanaziun e da l'engrondiment dal provediment cun aua da baiver da Fuldera vegn concedida a la vischnanca da Fuldera ina contribuziun pauschala da 22'540 francs.
- Luzein: La constituziun dal circul da Luzein dals 21 da matg 2006 vegn approvada.
- Laax: La revisiun parziala dals statuts, ch'è vegnida concludida da la radunanza da la vischnanca burgaisa da Laax dals 30 da matg 2006, vegn approvada.
- Trimmis/Zizers/Vaz sut: Sin la via da Vaz sut tranter Trimmis/Zizers e Vaz sut vegn reducida la sveltezza dad 80 km/h a 60 km/h sin ina lunghezza da ca. 120 meters en il sectur dal center da traffic da l'hotel "Fünf Dörfer".
- Valragn: En tut il vitg da Valragn vegn fixada la sveltezza maximala a 30 km/h ed introducida ina "zona da tempo 30".
Contribuziuns chantunalas a differentas instituziuns
- Uniun per il cup mundial da Lai: A l'uniun per il cup mundial da Lai vegn garantida ina contribuziun da 140'000 francs per manar tras a Lai il final dal cup mundial alpin da la FIS 2007. Quai sut la premissa che las vischnancas pertutgadas sa participeschian a la finanziaziun en il rom previs.
- Rempars da la viafier retica sin l'Alp Grüm: La regenza ha approvà il project da la viafier retica per reparar e per cumplettar ils rempars sin l'Alp Grüm. Als custs cun dretg da subvenziun da 900'000 francs vegn garantida ina contribuziun chantunala da 15 pertschient u da maximalmain 135'000 francs.
- Project da perscrutaziun: Per il project da perscrutaziun "Midada culturala en il Grischun. Structuras, praticas, experientschas" (titel da lavur) da l'institut per la perscrutaziun da la cultura grischuna vegn concedida ina contribuziun unica en l'autezza da maximalmain 70'000 francs.
- Restauraziun da la chamona Alp de Lagh: Per restaurar la chamona e la stalla da l'Alp de Lagh, vischnanca da Verdabbio, Val Cama, vegn pajada ina contribuziun da 56'000 francs.
- Museum da la natira dal Grischun: Per confinanziar il project "access interactiv a las collecziuns" da la fundaziun "collecziun dal museum da la natira dal Grischun" vegn pajada ina contribuziun da 15'000 francs.
- Project d'art: Per las intervenziuns planisadas en il chantun Grischun ils onns 2006/2007 survegn il project d'art "vom geben & nehmen. circolo" ina contribuziun finanziala unica da 9'500 francs.
- Agid umanitar: Per totalmain nov projects umanitars d'agid a l'exteriur ha la regenza deliberà ina summa totala da 34'000 francs.
Projects da vias
La regenza ha approvà totalmain 2'580'000 francs per construir e per sanar divers trajects da vias:
- via sursilvana: sviament da Flem
- via da Val S. Pieder: Tersnaus - S. Martin
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun
Neuer Artikel