Suenter che las autoritads da las vischnancas pertutgadas e d'ulteriurs posts involvids han fatg lavurs preparatorias intensivas durant plirs onns, han concludì las votantas ed ils votants da las vischnancas da St. Antönien e da St. Antönien Ascharina ils 23 da favrer 2006 cun gronda maioritad en omaduas vischnancas da fusiunar las vischnancas per il 1. da schaner 2007.
Il conclus definitiv davart la fusiun da vischnancas è suttamess al cussegl grond. La cumissiun ch'è vegnida engaschada dal cussegl grond per preparar questa fatschenta e che suttastat al presidi da Christian Möhr ha tractà la missiva correspudenta da la regenza en ina sesida a St.Antönien. Preschentas e preschents a la sesida eran er cusseglier guvernativ Hansjörg Trachsel, la presidenta communala da St. Antönien ed il president communal da St. Antönien-Ascharina.
Suenter ina discussiun intensiva ha concludì la cumissiun unanimamain da suandar la proposta da la regenza e da recumandar al cussegl grond da metter en vigur la fusiun da las duas vischnancas per il 1. da schaner 2007. Il cussegl grond vegn a tractar quest project durant la sessiun d'avust 2006.

Gremi: Cumissiun predeliberanta per la fusiun da vischnancas da St. Antönien e da St. Antönien-Ascharina
Funtauna: rg Cumissiun predeliberanta per la fusiun da vischnancas da St. Antönien e da St. Antönien-Ascharina