En il chantun Grischun duai la finanziaziun dals servetschs da la tgira e da l'assistenza a chasa (spitex), dals servetschs da la cussegliaziun per mammas e per babs sco er da las chasas da persunas attempadas e da las chasas da tgira survegnir ina nova basa legala. Quai prevesa il sboz per ina revisiun parziala da la lescha per promover la tgira da persunas malsaunas che la regenza grischuna ha dà en consultaziun.
Pervia da las midadas ch'èn colliadas cun la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) s'impona en spezial ina nova regulaziun da la finanziaziun da la spitex. Las contribuziuns federalas ch'èn vegnidas pajadas fin ussa als sevetschs da la spitex crodan en l'avegnir. Cun las novas regulaziuns da finanziaziun che vegnan proponidas en ils secturs da la spitex, da la cussegliaziun per mammas e per babs sco er da las chasas da persunas attempadas e da tgira vegnan las vischnancas distgargiadas tut en tut per circa 2.6 milliuns francs per onn. Il medem mument vegn il chantun engrevgià cun circa 2.5 milliuns francs dapli. Ils custs supplementars per il chantun pon probablamain vegnir cumpensads tras las midadas dals currents da finanzas ch'èn colliadas cun l'introducziun da la NGF.
Als servetschs da la spitex vegn il maun public a pajar tut en tut contribuziuns da circa la medema dimensiun sco enfin ussa. Per pudair mantegnair il bun nivel da prestaziuns e d'assistenza dals servetschs da la spitex, na duain questas contribuziuns betg vegnir reducidas. La finanziaziun da deficit vertenta vegn substituida cun in sistem da finanziaziun che s'orientescha a la prestaziun e che remunerescha quels servetschs da la spitex che lavuran en moda economica. Quels servetschs da la spitex che cuntanschan lur prestaziuns en moda economica duain survegnir tendenzialmain contribuziuns pli autas ch'enfin ussa. Las contribuziuns federalas da 4.3 milliuns francs che crodan pervia da la NGF vegnan surpigliadas - sin basa da la soluziun che la regenza propona - per gronda part dal chantun. Uschia sustegna il chantun ils servetschs da la spitex er en il futur surproporziunal cumpareglià cun ils auters chantuns.
Er en il sectur da las chasas per persunas attempadas e da las chasas da tgira sco er da las gruppas da tgira duai vegnir midada la finanziaziun vertenta, tenor la quala il maun public subvenziunescha cumplainamain ils custs d'abitar da las abitantas e dals abitants, e duai vegnir adattada ad autras furmas d'abitar e d'assistenza sco per exempel a quellas da la spitex. Tar edifizis novs e tar engrondiments pajan il chantun e las vischnancas da nov contribuziuns pauschalas per mintga letg. Tar la reparaziun e tar la renovaziun d'edifizis existents duain vegnir garantids en il futur ils custs d'investiziun per circa 60 pertschient tras las entradas da las tariffas da las abitantas e dals abitants. Da questa midada vegnan las abitantas ed ils abitants che n'han nagin dretg da prestaziuns supplementaras engrevgiads per part pli fitg che oz. Il chantun e las vischnancas vegnan distgargiads per mintgamai circa 2.2 milliuns francs. Sin basa dals gudogns da manaschi che vegnan realisads gia oz en las chasas da persunas attempadas e da tgira na vegni betg ad esser necessari d'augmentar las taxas da di u da las augmentar mo minimalmain, e quai pervia da las reservas ch'èn avant maun.
En il sectur da la cussegliaziun per mammas e per babs na resultan tut en tut naginas spustaziuns dals custs tranter il chantun e las vischnancas che vegnissan chaschunadas dal nov sistem da finanziaziun. Da nov duai vegnir pajada ina contribuziun pauschala als servetschs cun dretg da contribuziun.
Dals documents da consultaziun poi vegnir prendì invista en l'internet sut www.jpsd.gr.ch. La consultaziun dura fin ils 30 da november 2006.

La regenza grischuna surdat il premi grischun da cultura 2006 a Jacques Guidon Il purtader dal premi grischun da cultura 2006 sa cloma Jacques Guidon. La regenza grischuna undrescha l'engaschament passiunà da Guidon per la lingua e per la cultura rumantscha sco er sias prestaziuns sco artist figurativ, sco teatrist e sco scriptur. Il premì è dotà cun 20'000 francs.
In premi da renconuschientscha en la summa da mintgamai 10'000 francs conceda la regenza a Giosch Albrecht, a Britta Allgöwer, a Liliana Brosi, ad Armin Caduff, ad Adolf Collenberg, a Gian Primo Falappi ed ad Eckart Fritz-Schocher. Giosch Albrecht survegn il premi per ses engaschament en favur dals umans en tut las fasas da lur vita, e quai sco accumpagnader, sco psicoterapeut, sco magister e sco scriptur ed er sco intermediatur da la logoterapia e da l'analisa existenziala. Britta Allgöwer vegn undrada per sia lavur da perscrutaziun scientifica per sias prestaziuns en connex cun la creaziun dal sistem d'infurmaziun geografica dal parc naziunal svizzer. Liliana Brosi survegn in premi da renconuschientscha per ses engaschi nunstanclentaivel sco galarista, sco intermediatura d'art e sco artista. Armin Caduff vegn undrà cun in premi en renconuschientscha da ses operar ch'è encorunà da success sco manader da la Compagnia Rossini e sco promotur da chantaduras giuvnas e da chantadurs giuvens. Adolf Collenberg vegn undrà per sia perscrutaziun durant decennis sin il champ da l'istorgia grischuna e per ses engaschi en favur da la lingua rumantscha. Gian Primo Falappi survegn il premi per sias translaziuns impurtantas e qualifitgadas ch'èn destinadas a derasar l'istorgia e la cultura en la Svizra taliana. Eckart Fritz-Schocher vegn undrà per sia lavur excellenta sco battarist, sco percussiunist e sco pedagog da musica.
In premi da promoziun da mintgamai 7000 francs survegnan: Remo Albert Alig, artist figurativ, Pascal Bergamin, reschissur da films e scenarist, Jacinta Candinas, artista figurativa, Maria Victoria Haas, chantadura, Riccardo Lurati, cineast, Werner Nigg, sautunz, Alexandra Peterelli, chantadura, Ingrid Schütz, chantadura, e Seraina Maria Sievi, reschissura da teater. Ils premis vegnan surdads en il rom d'ina festa che ha lieu venderdi, ils 10 da november, a las 17.15 en la sala dal cussegl grond a Cuira.

La scola auta da pedagogia da nov cun bachelor
La regenza grischuna ha relaschà in nov urden d'examen per la scola auta da pedagogia. L'ordinaziun regla l'admissiun definitiva al studi, las cumprovas da prestaziun durant il studi en ils percurs da scolaziun da las scolas da diplom per persunas d'instrucziun per la scolina u per la scola primara sco er l'examen da diplom. L'urden d'examens serva a realisar la decleraziun da Bologna e prevesa da far l'examen da diplom cun in bachelor. In'ulteriura novaziun impurtanta è quella che las prestaziuns da las studentas e dals students durant il percurs da scolaziun vegnan valitadas cun credits academics tenor il sistem europeic da transferiment da credits academics (european credit transfer and accumulation system, ECTS).
Il nov urden d'examens è necessari per ch'ils diploms da la scola auta da pedagogia vegnian renconuschids en l'entira Svizra. L'urden d'examen è accordà cun las prescripziuns dal reglament da la conferenza svizra da las directuras e dals directurs chantunals da l'educaziun publica per renconuscher ils diploms da las scolas autas professiunalas per persunas d'instrucziun dal stgalim prescolar e primar.

L'uffizi d'agricultura, meglieraziun da structura e mesiraziun mida ses num en uffizi d'agricultura e da geoinfurmaziun
L'uffizi d'agricultura, meglieraziun da structura e mesiraziun (UAMM) mida ses num per il 1. da schaner 2007 en "uffizi d'agricultura e da geoinfurmaziun" (UAG). Quai ha concludì la regenza grischuna. La midada dal num - che succeda en il rom da la reorganisaziun da l'administraziun chantunala dal Grischun - ha in connex significativ cun las incumbensas e cun il champ da lavur da l'uffizi.

La regenza beneventa la revisiun parziala da quatter ordinaziuns dal dretg da chemicalias
La regenza grischuna beneventa da reveder las propostas da la confederaziun per ina revisiun parziala da quatter ordinaziuns dal dretg da chemicalias. Tar la revisiun parziala da l'ordinaziun davart las substanzas chemicas, da l'ordinaziun davart ils biocids e da l'ordinaziun davart la buna pratica da laboratori stattan correcturas e precisaziuns che megliereschan la segirezza giuridica ed er la chapaivladad en il center. Ultra da quai è vegnida adattada l'ordinaziun davart las substanzas chemicas al svilup dal dretg da la UE. Sco che la regenza scriva en sia resposta da consultaziun, vegnan las correcturas e las adattaziuns ch'èn vegnidas proponidas ad optimar la segirezza giuridica ed en intgins puncts er ad augmentar il nivel da protecziun.

Da vischnancas e regiuns
- Igis: A la vischnanca dad Igis vegn - sin fundament dal concept grischun per implants da sport (CISIC GR) - garantida ina contribuziun da 115'000 francs per la renovaziun totala da l'implant da sport Ried e per l'implant d'atletica leva, Landquart.
- Lavin: Per la vischnanca da Lavin vegn deliberada ina contribuziun da 35'715 francs als custs cun dretg da contribuziun per sanar l'enchaschament da la funtauna d'Eras ed il conduct d'affluenza da la funtauna da Funtanivas.
- Versomi: Il project per sanar il rempar da lavinas "Buchwald" en la vischnanca da Versomi vegn approvà. Als custs cun dretg da subvenziun vegn garantida ina contribuziun chantunala da maximalmain 17'500 francs. Plinavant vegn garantida a la vischnanca da Versomi ina contribuziun da 77'000 francs per elavurar e per engrondir ils stabiliments dal provediment d'aua dals territoris d'abitadi Versomi ed Arezen, 1. etappa.
- Castasegna: La dumonda ch'è vegnida inoltrada da l'ovra electrica da la citad da Turitg ils 6 da zercladur 2006 e che concerna il nov lai da gulivaziun sutterran a Castastegna vegn approvada.
- Pasqual: La revisiun totala da la planisaziun locala da la vischnanca da Pasqual dals 17 da mars 2005 vegn approvada.
- Puntraschigna: La revisiun totala da la lescha da turissem da la vischnanca da Puntraschigna dals 28 da zercladur 2006 vegn approvada.

Contribuziuns chantunalas a differentas instituziuns
- Dal campo alla tavola: Il project d'exposiziun "Dal campo alla tavola" vegn sustegnì cun ina contribuziun unica da 9'000 francs. Il project da la "fondazione ente museo poschiavino" e da la "associazione mulino aino" colliescha duas instituziuns da museum e trais chasas en la Val Puschlav.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun