La regenza grischuna beneventa las midadas da la lescha federala
davart mesiras per mantegnair la segirezza interna che vegnan proponidas
da la confederaziun. Questa lescha regla l'activitad preventiva da la
polizia, cunzunt quella da la protecziun dal stadi. La revisiun prevesa
ina meglieraziun da tscherts instruments preventivs ed è limitada sin
ils secturs dal terrorissem sco er dal servetsch d'infurmaziun militar e
politic scumandà. Cunzunt la procuraziun d'infurmaziuns duai vegnir
concepida en moda pli efficazia.
Sco che la regenza scriva en sia resposta da consultaziun, è er ella
da l'avis che la situaziun da smanatscha saja daventada mendra tant en
general sco er per la Svizra. Per dumagnar la situaziun da privel
actuala sto perquai - sche necessari - la basa giuridica vegnir
adattada. E las largias che vegnan constatadas en la protecziun
preventiva dal stadi ston vegnir serradas cunzunt tar la procuraziun e
tar l'elavuraziun d'infurmaziuns.
Da vischnancas e da regiuns
- Grüsch: En il vitg da Grüsch vegn fixada la sveltezza maximala a
30 kilometers l'ura ed introducida ina zona da tempo 30, e quai cun
cumpigliar las vias chantunalas.
- Tumein/La Punt: En ils vitgs da Tumein e da La Punt vegn fixada la
sveltezza maximala a 30 kilometers l'ura ed introducida ina zona da
tempo 30.
- Sevgein: La regenza approvescha la revisiun totala da la
planisaziun locala da la vischnanca da Sevgein ch'era vegnida concludida
ils 15 da matg 2006.
- Glion: La regenza approvescha la revisiun parziala da la
planisaziun locala da la citad da Glion ch'era vegnida concludida ils 26
da matg 2006, e quai cun in'ordinaziun concernent la zona per la
protecziun da la natira per la zona umida "Gatgs".
- Ftan: La constituziun da la vischnanca da Ftan dals 11 da fanadur
2006 vegn approvada.
Contribuziuns chantunalas a differentas instituziuns
- Occurrenza da sport: Or dal fond da sport ha la regenza concedì
25'000 francs per la cursa da muntogna "Youth SkyDuathlon
Valposchiavo/SkyRace Internazionale Valmalenco - Valposchiavo" da l'onn
2007.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun