Venderdi, ils 17 da november 2006, ha lieu en la SATE a Cuira per
l'emprima giada en il chantun Grischun in'occurrenza da contact tut
speziala: L'emprim "event da sigliera" raduna interpresas sco er
studentas e students dal chantun Grischun che studegian actualmain en
ina scola auta u en ina universitad en Svizra.
Il spezial da quest emprim "event da trampolin" è che
represchentantas e che represchentants da las interpresas pon lavurar en
lavuratoris ensemen cun ina gruppa dad otg fin diesch studentas e
students dals secturs spezials da las scienzas natiralas, da las
scienzas d'inschigneria, da l'economia e da la giurisprudenza vi da
dumondas actualas e specificas per l'interpresa. L'elavuraziun
communabla da soluziuns concretas pussibilitescha ina spezia d'inscunter
ch'è in gudogn per tuttas duas varts. A las interpresas pussibilitescha
quai d'entrar en contact cun forzas da lavur qualifitgadas da lur
regiun, e quai en in'atmosfera libra. En la medema dimensiun
profiteschan natiralmain er las studentas ed ils students. che survegnan
ina invista da l'activitad d'interpresa e ch'emprendan - en quest connex
- ad enconuscher persunalmain las represchentantas ed ils
represchentants da las interpresas.
Indesch interpresas enconuschentas sa participeschan
Per realisar il emprim "event da trampolin" han pudì vegnir
gudagnadas indesch interpresas enconuschentas dal chantun Grischun:
ABG-Packmat SA, Ems-Chemie SA, banca chantunala grischuna, Gritec SA,
G10 software SA, Hamilton Panaduz, Landqart, Riedi Ruffner Theus SA,
Synbone, Trumpf-Grüsch SA, Würth International SA. La paletta da las
dumondas da questas interpresas per ils lavuratoris è fitg variada. Per
inschigneras e per inschigners sco er per scienziadas e per scienziads
da la natira vegnints vegnan p.ex. tematisadas las sfidas tecnicas sco
il meglierament da la qualitad da la surfatscha, sch'ins taglia insatge
cun la maschina da laser. Il medem mument vegnan er purschids en ils
lavuratoris temas che sa drizzan a studentas ed a students ch'èn
interessads vi da l'economia. Exempels per talas dumondas èn tranter
auter l'elavuraziun d'in concept per in manaschement effizient dal
know-how en in manaschi u l'integraziun d'in chip en in bancnota.
L'uffizi per economia e turissem e l'uffizi per la furmaziun
media-superiura dal chantun Grischun èn ils incumbensaders da questa
occurrenza da contact che vegn organisada da l'iniziativa da studentas e
da students "together" (ensemen). Il sponsur principal è la banca
chantunala grischuna.
Cunter il trend dal "braindrain"
Per interpresas dal Grischun n'èsi betg adina uschè simpel da
carmalar u d'attrair persunal ch'è scolà bain nà dals centers economics
da la Svizra en il chantun che viva e che sa basa per gronda part sin il
turissem. Studentas e students ch'èn creschids si qua restan suenter lur
studi savens en la vischinanza da lur lieu da studi u sa deditgeschan ad
ina carriera internaziunala. Per quest fenomen dovra la sociologia la
noziun dal "braindrain" (vul dir ina perdita da tscharvè). Ils buns
"tscharvels" ("brains") da territoris ch'èn economicamain pli flaivels
emigreschan en ils centers economics. Il chantun sa stenta cun agid da
differents meds da far frunt a quest trend. Latiers tutga per l'ina ina
purschida solida da furmaziun en la regiun. Da l'autra vart vulan ins
preschentar ina purschida da plazzas multifara sco er patrunas e patruns
attractivs en la regiun. En quest senn sa stenta l'uffizi per economia e
turissem che novas interpresas ch'èn interessantas per il Grischun sco
lieu da lavur prendan domicil en noss chantun u sustegna las interpresas
indigenas cun prender influenza sin las cundiziuns da basa.
Ulteriuras infurmaziuns ed annunzia
Studentas e students a partir dal terz semester pon s'annunziar ussa
per il emprim "event da trampolin" en il chantun Grischun dals 17 da
november 2006 sut: www.sprungbrett-event.ch
L'ultim termin d'annunzia è ils 23 d'october 2006.
Gremi: uffizi per economia e turissem
Funtauna: rg uffizi per economia e turissem