La regenza grischuna na dat a la scola professiunala da tgira dal
Grischun a Glion nagina incarica da prestaziun per installar e per manar
ina scola professiunala superiura da tgira. Percunter conferma la
regenza sia voluntad da gidar vinavant a purtar ed a promover a Glion la
purschida da scolaziun sin il stgalim secundar II che suonda directamain
la scola populara.
Sper la scola claustrala da Mustér cun il gimnasi è Glion sa
sviluppà ad in center regiunal da scolaziun e da cumpetenza per
scolaziuns che suondan directamain la scola populara e che appartegnan
al stgalim secundar II. Giuvenils da la Surselva e da la Rumantschia
frequentan l'instituziun per la scolaziun preprofessiunala "scola
vinavon", la scola professiunala Surselva u la scola mercantila Surselva
cun sias partiziuns da la scola professiunala, da la scola media
commerziala e da la scola media professiunala. La regenza conferma
ch'ella approveschia la concentraziun da la purschida a Glion per il
sectur dal stgalim secundar II. Ch'il focus vegnia mess sin quest
stgalim cun in grond dumber da clientas e da clients potenzials è
economicamain raschunaivel e tegna ultra da quai quint dal regress dal
dumber da naschientschas.
In auter giudicament resulta da las scolaziuns da sanadad che vegnan
purschidas en il sectur terziar. La nova scolaziun da tgirunza diplomada
resp. da tgirunz diplomà che dura trais onns e che vegn absolvida en ina
scola professiunala superiura vegn frequentada suenter l'emprendissadi u
suenter la scola media professiunala. Ella vegn tschernida mo d'ina part
da las emploiadas spezialisadas da sanadad e dals emploiads spezialisads
da sanadad. Er pervia da quai han blers chantuns da la Svizra tudestga
concentrà lur purschida da furmaziun sin in pèr paucs centers da
furmaziun. Ina concentraziun da la purschida en il sectur da la scola
professiunala superiura en il center da furmaziun per la sanadad ed ils
fatgs socials (CSS) cunvegn er per il Grischun. Ella tegna quint da la
dumonda actuala ed en spezial da la situaziun critica tar las plazzas da
praticum sco er dal dumber da naschientschas che tschessa.
La scola professiunala da tgira dal Grischun a Glion survegn ina
incarica da prestaziun per realisar l'ultima scolaziun tenor l'urden
vegl che va a fin l'onn 2011. Las decisiuns da la regenza servan al fatg
che Glion possia sa profilar e sa rinforzar sco center da cumpetenza per
scolaziuns sin il stgalim secundar II, en spezial cun sa referir a la
Rumantschia. Da l'autra vart han ellas la finamira da concentrar
l'organisaziun, la scolaziun ed ils meds finanzials en il sectur da la
scola professiunala superiura per la sanadad. Ellas augmentan las
schanzas per la regiun e per il chantun da pudair sa far valair sin il
martgà da furmaziun.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun