Il chantun Grischun dat impuls e meglierescha las cundiziuns generalas per accelerar la refurma da las structuras en il turissem grischun. Las tschintg destinaziuns principalas San Murezzan / Engiadina, Tavau-Claustra, Arosa-Lai e Scuol-Samignun vegnan envidadas da surpigliar l'iniziativa da fundar organisaziuns per la gestiun da destinaziuns (OGD). Ils lieus pli pitschens duain fundar organisaziuns turisticas futuras (OTf) regiunalas u s'associar ad ina OGD.

Il concept da realisaziun ch'è ussa avant maun per la refurma dal turissem grischun è ina part dal project "structuras cumpetitivas e repartiziun da las incumbensas en il turissem grischun" ch'è vegnì elavurà dal team da project e d'ina gruppa d'expertas e d'experts per incumbensa da cusseglier guvernativ Hansjörg Trachsel. La nova structura da las destinaziuns duai fermar il regress da las dumondas che ha custà al Grischun dapi l'onn 1990 passa 2'600 plazzas da lavur. L'analisa dal mais da favrer 2006 ha mussà ch'igl exista ina structura ineffizienta cun 92 organisaziuns turisticas, ch'i vegnan memia paucs giasts en il Grischun e ch'ils preventivs da marketing da las organisaziuns turisticas duain sa concentrar sin marcas enconuschentas.

Ils criteris per las organisaziuns turisticas
Las OGD ston ademplir il futur 18 criteris en ils secturs organisaziun e gestiun, incumbensas e resursas sco er grondezza e dominanza. En spezial sto il management da products obtegnair dapli persunal ed il marketing principal sto sa drizzar tenor in'activitad per promover il martgà ch'è orientada a la vendita. Sco preventiv da marketing minimal ston las tschintg OGD disponer a media vista mintgina d'almain 7 milliuns francs. Ils ulteriurs lieus pli pitschens duain fundar dentant organisaziuns turisticas futuras (OTf) regiunalas. Els ston ademplir 12 criteris e ston esser en il cas da pudair surdar in mandat da marketing d'almain 200'000 francs ad ina OGD u a Grischun vacanzas.

Sustegn dal chantun
Il chantun Grischun sustegna quest process da refurma durant ils proxims sis onns cun en total 18 milliuns francs sco er cun metter a disposiziun resursas persunalas da l'uffizi per economia e turissem. Fin la fin da mars 2007 han las organisaziuns turisticas temp d'inoltrar ina decleraziun d'intenziun cun il concept strategic da lur ODG u da lur OTf. Per la finanziaziun definitiva da la transfurmaziun sto vegnir fatg in plan da fatschenta detaglià fin il settember 2007. Il process da realisaziun è gia instradà en differentas regiuns dal Grischun. Ils plans da la destinaziun San Murezzan/Engiadina èn progredids il pli fitg. La populaziun dal circul da l'Engiadin'ota votescha gia ils 26 da november 2006 davart ina revisiun parziala da la constituziun, la quala vegn a servir sco basa per furmar destinaziuns.

Iniziativas accumpagnantas
Ultra dal sustegn finanzial e persunal ch'il chantun porscha, suonda el dentant er tschintg iniziativas accumpagnantas ch'èn decisivas per rinforzar e per stabilisar las structuras desideradas. Las paginas d'internet dal turissem grischun ch'èn vegnidas analisadas da la SATE Cuira èn sa demussadas sco manglusas visavi la concurrenza en spezial pertutgant l'effizienza da la commerzialisaziun. La plattafurma turistica sin via electronica dal Grischun duai colliar en ina rait las purschidas regiunalas da turissem, duai las resumar en ina unitad raschunaivla e duai las commerzialisar communablamain. Ultra da quai èsi da partir dal fatg che 30 pertschient da las decisiuns da far ina reservaziun vegnan prendidas cun agid d'indicaziuns e da pussaivladads da cudeschaziun da l'internet. La plattafurma turistica sin via electronica è ina iniziativa che sustegna cunzunt las OTf a commerzialisar lur products. Il sistem da direcziun e da monitoring "balanced scorecard" (BSC) cun indicaturs da sis secturs d'interpresa pussibilitescha d'examinar il futur las prestaziuns ed ils effects da la ODG e d'augmentar sia transparenza. In project da pilot correspundent ensemen cun Tavau turissem è gia vegnì lantschà. Il chantun planisescha da resumar ils resultats da la BSC sin plaun chantunal e da survegnir uschia indicaziuns davart il svilup dal turissem en il Grischun. L'applicaziun da la marca regiunala grischun ch'è sa cumprovada tar las futuras ODG è in element da las iniziativas accumpagnantas gist uschia sco ils standards da qualitad e la finanziaziun dal marketing da turissem tras ina contribuziun chantunala per promover il turissem (CCT). Fin la primavaira 2007 examinescha l'uffizi per economia e turissem dal Grischun models da quints ed als valitescha en collavuraziun cun la gruppa d'expertas e d'experts, cun las ODG e cun las federaziuns da tetg da l'economia dal Grischun.

Ina nova orientaziun da Grischun vacanzas
Sin fundament da la nova organisaziun dal marketing da turissem grischun ha la suprastanza da Grischun vacanzas (GRV) adattà er las incumbensas e l'orientaziun da l'organisaziun da tetg chantunala. En emprima lingia duai GRV acquirir en il futur novs giasts per il Grischun, e quai en collavuraziun cun las OGD. La tgira da las relaziuns cun giasts che returnan adina puspè succeda tras las ODG e tras lur purtadras u lur purtaders da prestaziuns. Cun purschidas innovativas e cun in'activitad per promover il martgà orientada a la vendita duai vegnir cuntanschida ina meglra occupaziun durant la stad e durant l'atun sco er durant las emnas d'enviern pli flaivlas. La nova repartiziun fundamentala da las incumbensas tranter las acturas ed ils acturs dal turissem grischun ha uschia il suandant aspect: GRV sa deditgescha - sco "acquisitura da martgads" - en emprima lingia als martgads da constituziun ed als martgads futurs, las ODG sa deditgeschan als martgads centrals enconuschents e las OTf a la tgira dals giasts fidels. Las incumbensas principalas da Grischun vacanzas èn: far concepziuns da product orientadas a la vendita, manar la marca Grischun e surpigliar eventualmain mandats da marketing da las OTf sco er - en coordinaziun cun las ODG - concepir la plattafurma turistica sin via electronica dal Grischun.
Il rapport "Wettbewerbsfähige Strukturen und Aufgabenteilung im Bündner Tourismus, Umsetzungskonzept" po vegnir empustà tar l'uffizi per economia e turissem (UET), Grabenstrasse 1, 7001 Cuira, u per telefon 081 257 23 42 resp. info@awt.gr.ch. Sut www.awt.gr.ch stat el a disposiziun er per chargiar sin l'agen computer.

Team da project e gruppa d'expertas e d'experts
Incumbensader: cusseglier guvernativ Hansjörg Trachsel (schef dal departement da l'intern e da l'economia publica dal Grischun).
Direcziun dal project (uffizi per economia e turissem dal Grischun). Eugen Arpagaus (schef da l'uffizi), Michael Caflisch (manader politica regiunala), Sonja Kohler (assistenta da project fin l'avust 2006), Pascal Prinz (assistent da project a partir da l'avust 2006).
Team da project: Thomas Bieger (professer a l'universitad da Son Gagl, institut per ils servetschs publics e per il turissem), Philipp Boksberger (docent a la scola auta da tecnica ed economia Cuira, institut per turissem e temp liber), Olivier Federspiel (directur da Grischun vacanzas), Christian Laesser (professer a l'universitad da Son Gagl, institut per ils servetschs publics e per il turissem), Beat Ryffel (secretari dal departament da l'intern e da l'economia publica dal Grischun), Robert Weinert (assistent a l'universitad da Son Gagl, institut per ils servetschs publics e per il turissem).
Gruppa d'expertas e d'experts: Vendelin Coray (directur da Savognin turissem en il Surses), Hanspeter Danuser (directur da l'uniun da cura e da traffic da San Murezzan), Denise Dillier (directura da Spleia/Valragn turissem), Armin Egger (directur da Tavau turissem), Reto Gurtner (president da la gruppa da l'arena alva), Ernst Nigg (president da la cumissiun per economia, taxas e politica da stadi dal cussegl grond, fin avust 2006), Erwin Rutishauser (directur da la viafier retica SA), Markus Schenk (administratur da Mustér Sedrun turissem), Hans-Kaspar Schwarzenbach (directur dad Arosa turissem), Urs Wohler (directur dad Engiadina/Scuol turissem SA), Andreas Züllig (president da l'uniun grischuna da las hotelieras e dals hoteliers).
Cussegliadras e cussegliaders spezialisads: Josef Herget (professer a la scola auta da tecnica ed economia SATE Cuira, institut per scienza d'infurmaziun), Arnold Kappler (proprietari da la firma Kappler Management SA, Lucerna), Reto Küng (partenari da la firma dettofatto media, Cuira), Ruedi Minsch (professer a la scola auta da tecnica ed economia SATE Cuira), Peder Plaz (manader da project BHP - Hanser e partenaris SA, Turitg), Bruno Studer (professer a la scola auta da tecnica ed economia SATE Cuira, institut per tecnologias d'infurmaziun e da communicaziun).

Gremi: departament da l'intern e da l'economia publica
Funtauna: rg uffizi per economia e turissem