Blers giuvenils da l'ultim onn da scola han fatg lur tscherna professiunala e tschertgan ussa ina plazza d'emprendissadi. En il chantun Grischun datti il mument en 21 differents champs da professiun anc bunamain 1'000 plazzas d'emprendissadi libras. Sin la pagina d'internet da l'uffizi per la furmaziun professiunala dal Grischun www.berufsbildung.gr.ch sa chatta la purschida actuala da plazzas d'emprendissadi.
Fin ussa duevan ils giuvenils che s'interessavan per ina plazza d'emprendissadi en in chantun vischin tschertgar en differentas paginas d'internet chantunalas. Da nov chattan els ussa las plazzas d'emprendissadi libras sin il portal d'internet da la cussegliaziun professiunala svizra. Ils indicaturs da las plazzas d'emprendissadi libras (LENA) dals chantuns pon vegnir consultads cumplettamain en tut las regiuns linguisticas sin www.berufsberatung.ch e cuntegnan pliras milli plazzas d'emprendissadi libras.
La purschida d'internet amplifitgada dat la pussaivladad da far differentas retschertgas. Ils giuvenils pon tschertgar directamain las plazzas d'emprendissadi libras en lur chantun. Ina charta da las regiuns als inditgescha, en tge district ch'èn publitgadas quantas plazzas d'emprendissadi. Tgi che na chatta nagut en sia regiun, po intercurir las purschidas dals chantuns vischins. Tar mintga professiun d'emprendissadi maina in link tar las plazzas d'emprendissadi da tut ils chantuns vischins.
Cun questa collavuraziun creeschan las cussegliaziuns da professiun e da carriera dals chantuns ina plattafurma naziunala che sustegna las scolaras ed ils scolars tar la tschertga da plazzas d'emprendissadi.
Ulteriuras infurmaziuns ed agid tar la tscherna d'ina professiun chattan ils giuvenils e lur geniturs en ils centers d'infurmaziun professiunala da la cussegliaziun da professiun e da studi dal chantun Grischun.
La purschida po vegnir consultada en l'internet sut: www.berufsberatung.ch/lehrstellen


Gremi: uffizi per la furmaziun professiunala
Funtauna: rg uffizi per la furmaziun professiunala