La regenza grischuna ha deliberà la missiva tar la revisiun parziala
da la lescha davart la procedura penala (procedura penala). Il cussegl
grond vegn a tractar la fatschenta en sia sessiun d'avrigl. La revisiun
parziala cuntegna essenzialmain in'adattaziun dal dretg chantunal a las
prescripziuns dal dretg federal che resultan da la revisiun da la part
generala dal cudesch penal. En il center da la revisiun dal dretg
federal stat la reordinaziun e la differenziaziun dal sistem da
sancziuns. Uschia vegn substituì per exempel il chasti curt e
nuncundiziunà che privescha da la libertad fin sis mais cun in sistem da
taxas per di u cun lavur d'utilitad publica. En cas pli levs po vegnir
desistì cumplainamain d'in chasti u ch'in tal po vegnir pronunzià
cundiziunadamain en ina dimensiun pli gronda che fin uss. Plinavant vul
il project rinforzar la protecziun da la publicitad cunter delinquents
privlus. La finala è vegnì separà dal cudesch penal l'onn 2003 in agen
dretg penal per giuvenils. Questas midadas en il dretg federal
chaschunan sin plaun chantunal stringentamain differentas adattaziuns da
leschas. Las midadas las pli essenzialas da questa revisiun parziala da
la procedura penala pertutgan la creaziun d'ina via grischuna da dus
stgalims tras las instanzas, l'adattaziun a las novas furmas da chastiar
ed uschia diversas cumpetenzas novas en il sectur da l'execuziun da
chastis e da mesiras sco er l'aboliziun da la cumpetenza penala da las
autoritads da scola en la giurisdicziun penala per giuvenils. Ultra da
la revisiun parziala da la procedura penala suttametta la regenza al
cussegl grond la cunvegna revedida dal concordat dals chantuns da la
Svizra orientala davart l'execuziun da chastis e mesiras dals 29
d'october 2004 per l'approvaziun.
La regenza propona al cussegl grond ina nova regulaziun da las
lottarias
Il Grischun duai sa participar a la cunvegna interchantunala davart
la surveglianza, davart la permissiun e davart l'utilisaziun dal retgav
da lottarias e da scumessas che vegnan manadas tras sin plaun
interchantunal u naziunal. Quai propona la regenza grischuna al cussegl
grond che vegn a tractar il project la sessiun d'avrigl. Il punct
principal da la nova regulaziun è la creaziun d'ina instanza
independenta e centrala, la cumissiun da lottarias e da scumessas.
Quella examinescha, permetta e surveglia la realisaziun da singulas
lottarias grondas en plirs chantuns. Uschia vegn meglierada
l'applicaziun unitara da la lescha da lottarias e simplifitgada sco er
sclerida la procedura. Cun la cunvegna pon ils chantuns d'ina vart
mantegnair lur cumpetenzas concernent las lottarias e da l'autra vart
segirar las entradas da lur fonds da lottaria. Medemamain èn previsas
mesiras cumplementaras per il cumbat cunter la dependenza dal gieu e per
la prevenziun. Questas mesiras vegnan finanziadas cun ina taxa per la
dependenza dal gieu d'ina summa da 0.5 pertschient dals retgavs bruts da
gieu. Paralellamain a questa participaziun propona la regenza da
relaschar ina nova lescha davart las lottarias che abolescha
l'ordinaziun davart las lottarias da l'onn 1962. En questa lescha vegn
tranter auter fixada la nova incumbensa sin il champ da la prevenziun e
dal cumbat cunter la dependenza dal gieu. La surveglianza davart las
lottarias vegn surdada da nov a l'uffizi da fatgs da polizia e da dretg
civil.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun