Cun in sistem che l'auto da posta grischun ha sviluppà per giuditgar la qualitad mesiran l'auto da posta e l'interpresa da transport da Tavau dapi 19 mais la qualitad dal service da lur collavuraturas e da lur collavuraturs en il servetsch da transport, e quai cun il sustegn da persunas da test ch'èn scoladas bain. Dapi la mesadad da l'onn 2005 sa participescha er il bus da la citad da Cuira SA a quest giudicament. Las emprimas experientschas èn positivas, damai che l'evaluaziun sistematica da la vista da la clientella permetta conclusiuns impurtantas a la qualitad da las prestaziuns da servetsch tant per las instituziuns incumbensadras sco er per las interpresas da transport, per las singulas collavuraturas e per ils singuls collavuraturs. Cun mesiras sistematicas emprovan ils partenaris dal traffic public da bus da drizzar lur prestaziuns da servetsch en moda anc pli consequenta tenor ils basegns da las instituziuns incumbensadras sco er da las passagieras e dals passagiers.

Sistem per giuditgar la qualitad SQDQ
Passagieras e passagiers che utiliseschan regularmain la rait da bus dal Grischun giuditgeschan a maun da princips da qualitad predefinids la qualitad dal service (SQDQ) da las manischunzas e dals manischunzs da l'auto da posta grischun, da l'interpresa da transport da Tavau e dal bus da la citad da Cuira SA, e quai cun respunder in questiunari da 31 dumondas suenter avair fatg ils viadis da giudicament. Tut las dumondas concernan la passagiera respectivamain il passagier e ses basegns envers la prestaziun da servetsch. Ils questiunaris vegnan alura endatads en in sistem dad EED e vegnan evaluads. Ils resultats mussan las fermezzas sco er las deblezzas ed èn la basa per prender mesiras da meglieraziun sistematicas.

Las passagieras ed ils passagiers stattan en il center
Cun lur reacziuns gidan las persunas da test - ch'èn vegnidas tschernidas conscienziusamain e che han absolvì ina scolaziun - a garantir ed ad optimar la qualitad da las trais interpresas da transport participadas e prestan uschia ina contribuziun impurtanta en favur dal traffic public da bus en il Grischun.
Werner Glünkin, manader dal servetsch per il traffic public dal Grischun, è cuntent cun la collavuraziun da las interpresas da transport sco er cun ils resultats ch'èn gia vegnids cuntanschids. Las evaluaziuns dals passa 1'500 giudicaments da la clientella da test dattan in maletg allegraivel da tut las trais interpresas da transport e mussan che la qualitad dal service è gia oz auta. Suenter ch'ils resultats èn vegnids analisads detagliadamain, pon vegnir realisads ulteriurs pass, p.ex. ina scolaziun ed ina furmaziun supplementara communabla da las manischunzas e dals manischunzs l'onn proxim ubain mesiras per tut las interpresas da transport en il sectur da l'infurmaziun da las passagieras e dals passagiers che van en favur da la clientella.

Gremi: servetsch per il traffic public
Funtauna: rg servetsch per il traffic public