La regenza grischuna ha fixà la valur dal punct da taxa da tarmed
per tractaments ambulants en ils ospitals dal chantun Grischun
unitarmain sin 0.86 francs. Quai vala rectroactivamain per il 1. da
schaner 2004. Questa tariffa vala per ils ospitals publics e privats sco
er per las clinicas psichiatricas. Perquai ch'i n'è betg gartegià als
furniturs da prestaziuns ed als assicuraders da sa cunvegnir ad in
contract tariffar, èsi stà necessari da fixar uffizialmain la valur dal
punct da taxa. La valur ch'è vegnida fixada ussa tegna adequatamain
quint dals interess da domadaus partidas. Ella correspunda al princip da
la rentabilitad e sa basa sin la recumandaziun dal survegliader dals
pretschs.
Da vischnancas e regiuns
- Maladers: La revisiun parziala da la planisaziun locala che las
votantas e ch'ils votants da la vischnanca da Maladers han concludì ils
13 da matg 2005 vegn approvada. Quella cuntegna in'agiunta dal plan
general d'avertura 1:1'000. Er approvada vegn la zona da mastergn e
d'abitar en il territori da "Parmäris" ch'è vegnida zavrada e sistida en
il plan da zonas e plan general da furmaziun 1:2'000.
- Parpan: La regenza approvescha la revisiun parziala da la lescha
da construcziun ch'è vegnida concludida da las votantas e dals votants
da la vischnanca da Parpan ils 15 da mars 2005.
- Farera: La revisiun parziala da la lescha da construcziun,
concludida da las votantas e dals votants da la vischnanca da Farera ils
26 d'avust 2005, vegn approvada da la regenza. Questa revisiun parziala
cumpiglia il plan da zonas parzial 1:500 "Tgea Durisch".
- Vaz: La regenza approvescha la revisiun parziala da la
constituziun communala ch'è vegnida concludida da la vischnanca da Vaz
ils 27 da november 2005 a chaschun d'ina votaziun a l'urna. Ella
concerna ina reorganisaziun da la scola communala.
- Bever: La regenza approvescha la revisiun parziala da la
constituziun communala ch'è vegnida concludida a chaschun da la
radunanza communala da la vischnanca da Bever ils 12 da december 2005.
Tenor quella vegn concedì da nov il dretg da votar e d'eleger en
chaussas communalas a persunas da naziunalitad estra che han lur domicil
en la vischnanca.
- "Corporaziun da guaud Altgericht da Farschno": Per cultivar e per
administrar lur guauds èn las vischnancas d'Almen, da Farschno, da
Pratval, da Scharàns e da Seglias s'unidas ad ina corporaziun da
vischnancas da dretg public che sa numna "Corporaziun da guaud
Altgericht Farschno". La regenza approvescha il statut d'organisaziun.
- Circul da Sur Tasna: La revisiun parziala da la constituziun
cirquitala dal circul da Sur Tasna dals 27 da november 2005 vegn
approvada.
- Malans: En il vitg da Malans vegn fixada la sveltezza maximala a
30 km/h a partir da la punt dal Mühlbach fin tar la sortida dal vitg al
nord en direcziun da Jenins, e quai cun integrar la via chantunala.
Medemamain vegn introducida ina zona da tempo 30. Quai ha la regenza
concludì sin dumonda da la vischnanca.
Contribuziuns chantunalas a differentas instituziuns
- Viafier retica: La regenza conceda a la viafier retica (VR) ina
contribuziun d'investiziun da 414'000 francs. Quests meds finanzials
servan a construir da nov la punt da Spundätscha sin la lingia d'Arosa
ch'è vegnida destruida da dischlocaziuns dal terren.
- Circus d'uffants Lollypop: Per ses program annual 2006 survegn il
circus d'uffants Lollypop ina contribuziun chantunala en l'autezza da
27'000 francs.
- Cudesch "50th British-Swiss Parliamentary Ski Week": L'ediziun dal
cudesch "50th British-Swiss Parliamentary Ski Week" (tudestg/englais)
vegn sustegnida cun ina contribuziun da 10'000 francs.
Projects da vias
- La regenza ha approvà totalmain 32'540'000 francs per il
mantegniment architectonic e per la renovaziun da la A13 tranter Soazza
- San Bernardin/sid dal tunnel.
- Il project per construir ina insla da segirezza ed in surpassadi
per pedunas e per peduns sur la via dal Güglia en il vitg da Beiva vegn
approvà e sustegnì cun maximalmain 98'220 francs.
Chaussas persunalas
- Walter Schlegel, lic. iur., domicilià a Trimmis, è vegnì nominà da
la regenza sco manader dal nov uffizi per l'execuziun da chastis e da
mesiras. Schlegel era fin ussa secretari dal departament da l'intern e
da l'economia publica.
Gremi: regenza
Funtauna: rg chanzlia chantunala dal Grischun