La regenza grischuna beneventa che la confederaziun prevesa da midar
la divisiun principala per la segirezza dals implants nuclears (DSN) en
in institut autonom da dretg public. L'inspecturat federal per la
segirezza nucleara (IFSN) previs duai ademplir las medemas incumbensas
sco l'actuala DSN, numnadamain survegliar ils implants nuclears svizzers
pertutgant la segirezza nucleara e pertutgant la protecziun cunter
radiaziuns. Sco che la regenza scriva en sia posiziun tar la lescha
federala davart l'inspecturat federal per la segirezza nucleara pudess
questa autoritad da segirezza cuntanscher uschia ina independenza
instituziunala dals interess economics e dal process politic.
La regenza beneventa l'adattaziun da l'ordinaziun davart la libra
emissiun en l'ambient
La regenza grischuna beneventa l'adattaziun che la confederaziun
propona da l'ordinaziun davart l'utilisaziun d'organissems en l'ambient
(ordinaziun davart la libra emissiun en l'ambient) a la lescha davart la
tecnica genetica. I vegn beneventà particularmain ch'il champ
d'applicaziun da l'ordinaziun vegn extendì er sin plantas e sin animals
esters invasivs ch'èn in privel per ils umans, per ils animals e per
l'ambient. Cun quai survegnan ils chantuns la pussaivladad da prender
mesiras cunter la derasaziun e la multiplicaziun nuncontrollada da tals
organissems e da mitigiar donns futurs. En sia posiziun a la
confederaziun fa la regenza tuttina attent al fatg che la finanziaziun
da talas mesiras n'è betg reglada. La regenza propona perquai ch'i
vegnia previs in sustegn finanzial da la confederaziun per cumbatter la
derasaziun nuncontrollada.
In nov med d'instrucziun da lavur a maun vegn translatà en rumantsch
grischun
La translaziun dal med d'instrucziun songagliais "Verflixt und
zugenäht" en rumantsch grischun è vegnida approvada da la regenza
grischuna. Per elavurar il cuntegn dal med d'instrucziun èn vegnids
permess 50'000 francs. Cun il conclus dals 21 da december 2004 aveva la
regenza approvà il concept general "rumantsch grischun en scola" che
cumpiglia er la producziun d'ina nova generaziun da meds d'instrucziun
en rumantsch grischun. Per la varianta "pionier" ston star a disposiziun
per l'onn da scola 2008/2009 ils meds d'instrucziun da la 2. classa.
Quai concerna er las lavurs a maun cun textilias. En ils idioms è vegnì
lavurà fin ussa en quest rom cun il "Fadenflip".
Da vischnancas e regiuns
- Silvaplana-Surlej: La regenza ha acceptà la dumonda da la
vischnanca da Silvaplauna per midar il num local "Surlej" en
"Silvaplana-Surlej" cun resalva dal resultat da la procedura da
consultaziun entaifer l'administraziun federala.
- Haldenstein: Il plan da zonas 1:1'000 "Flippagässli" da la
vischnanca da Haldenstein dals 25 da november 2005 vegn approvà.
- Zizers: Il plan da zonas 1:2'000 "territori communal
Oberau/Rütenen, Untere Au/Riedlöser", il plan da zonas e plan general da
furmaziun 1:5'000 "entir territori communal" ed il plan general da
furmaziun 1:2'000 "territori communal Oberau/Rütenen, Untere
Au/Riedlöser" da la vischnanca da Zizers, tuts cun la data dals 25 da
settember 2005, vegnan approvads.
Contribuziuns chantunalas a differentas instituziuns
- Agid umanitar: Per quatter projects d'agid umanitar a l'exteriur
ha la regenza mess a disposiziun ina summa totala da 14'000 francs.
- Agids d'investiziun: La regenza ha empermess a la fundaziun svizra
per il turissem social, Turitg, per sanar ed engrondir l'albiert da
giuventetgna Valbella sco er a la Mundaun Turissem SA per montar ina
sutgera da quatter accuplabla e per construir l'indriz d'ennavar
"Hitzeggerkopf" contribuziuns chantunalas da totalmain circa 540'000
francs ed emprests d'agids d'investiziun da la confederaziun da
3'000'000 francs.
Projects da vias
La regenza ha approvà en total circa 5'400'000 francs per construir
e per sanar differents trajects da via:
- A13c via naziunala: Traversa sid - rampa d'access Rofla
- via da la Val Calanca: tunel Val d'Infern
- H417b via dal Landwassertal: Ardüs - Glaris / Tavau Frauenkirch
- H19 via sursilvana: Laax - Schluein
- via da Sursaissa: Chummenbiel - Misanenga
- via da Sursaissa: Grosstobel - Tschappina
- H3a via dal Güglia: entaifer il vitg da Tinizong
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun