A partir da l'avrigl vegnan ils trais museums chantunals a retschaiver lur giasts er sur mezdi. Per lantschar l'avertura sur mezdi datti il 1. d'avrigl "buccadas" tut spezialas.

Il temp sur mezdi è per bleras persunas che lavuran a Cuira la meglra occasiun per far anc spert pitschnas cumissiuns. Ma igl è er il temp, en il qual ins po sa recrear u simplamain "targlinar". A partir dal 1. d'avrigl datti ina nova purschida per giudair il temp sur mezdi e per sa distrair: ins po sa sfunsar en il mund dal museum retic, dal museum da la natira u dal museum d'art.
Questa nova purschida vegn lantschada il 1. d'avrigl - cun in program spezial - en preschientscha da president da la regenza Claudio Lardi. Sur mezdi vegnan ils directurs dals museums a preschentar curtamain intgins objects che han ina referenza speziala al mezdi, ch'è er l'ura da gentar. La terminaziun da las preschentaziuns permetta da passar libramain d'in museum a l'auter, pia da frequentar tuts trais museums entaifer l'occurrenza gratuita da duas uras. Il president da la regenza vegn er a passar d'in museum a l'auter ed en tscherts muments vegn el a tschentar als directurs dumondas surprendentas ed er spinusas tar singuls objects. Ils giasts vegnan schizunt a survegnir in pitschen regal culinaric.
Ils objects preschentads èn natiralmain gist uschè differents sco ils museums sezs. Beat Stutzer, directur dal museum d'art vegn a preschentar duas ovras da l'art moderna: il Tableau Piège da Daniel Spoerri e la Literaturcollage - Literaturwurst da Dieter Roth. L'emprim artist ha fixà e conservà ils rests da la vaschella e da las spaisas d'in past tals e quals sin la maisa ed ha declerà il resultat sco ovra d'art. Il segund ha manizzà in entir exemplar da la gasetta Die Welt ed ha emplenì ils tocs palpiri en in satg da plastic en furma da liongia. Cun talas ovras han ils dus artists fundà la Eat-Art, cun la quala la concepziun tradiziunala da las valurs da materials artistics vegn manada ad absurdum.
Bler main absurdas, dentant tant pli genuinas, èn las disas da magliar dals animals. En il museum da la natira dal Grischun vegn directur Jürg Paul Müller a declerar las strategias fitg differentas per sa nutrir dals animals. Erbivors, carnivors ed omnivors han per exempel tut autras dentadiras, differents pichels ed organs da digestiun. Ma er lur activitads da di e lur organisaziun sociala vegnan caracterisadas dal nutriment e da la procuraziun da nutriment. En il center da la demonstraziun al museum da la natira vegn a star l'urs ch'è in magliatut gist uschè sco nus umans, schebain ch'el ha er en sias disas da magliar intginas differenzas betg uschè irrelevantas visavi a nus.
Il pli tard en il museum retic daventan evidentas las differenzas cun ils animals. Qua vegn a mussar directur Jürg Simonett co che l'istorgia dals umans ha in connex central cun la procuraziun dal paun da mintgadi. El vegn a cumenzar al plaun inferiur cun il model da Savognin durant il temp da bronz e lura ad ascender spert ils tschentaners, sper chantas da zin da Cuira ch'eran destinadas per baiver vin, si tar vaschs da cheramica indigens e tar in scrign da gran. Surtut al plaun sut il tetg daventi evident quant greva e stentusa che la procuraziun da nutriment è stada en il Grischun puril. L'object central da la guida è in vasch en crap da lavetsch che serviva per far pulenta.
Cun questa acziun duai in public uschè vast sco pussaivel vegnir infurmà ch'ils trais museums vegnan il futur adina ad esser averts sur mezdi. Per encuraschar ils giasts da frequentar savens - dal cumenzament ennà - la purschida da mezdi, vegn repartida als giasts fin mez avrigl ina pitschna marenda offerida dal Manor.

Sonda, il 1. d'avrigl, 12.00 - 14.00, als museums retic, da la natira e d'art. Preschentaziuns a las 12.10, 12.40, 13.10 e 13.40. Entrada gratuita.
Dialogs cun il president da la regenza a las 12.10 al museum da la natira, a las 12.40 al museum d'art ed a las 13.10 al museum retic.
Novas uras d'avertura: mardi fin dumengia, 10.00 - 17.00 (glindesdi serrà)

Download communicaziun a las medias ed maletg: www.grischuncultura.ch, "Media"

Gremi: Uffizi da cultura
Funtauna: rg Uffizi da cultura