La regenza grischuna avra la consultaziun davart in'ordinaziun tar la lescha da sanadad. L'ordinaziun regla tranter auter la promoziun da la sanadad e la prevenziun da malsognas tras l'uffizi da sanadad, tras l'uffizi per la scola populara ed il sport sco er tras las vischnancas. Plinavant fixescha ella la reclama en il sectur da la sanadad, las permissiuns da manaschi sco er las permissiuns per pratitgar differentas professiuns dal sectur da la sanadad. L'ordinaziun da la regenza è ina consequenza da la revisiun parziala da la lescha davart ils fatgs da sanadad dal chantun Grischun (lescha da sanadad), deliberada dal cussegl grond ils 19 d'october 2005. Tut las disposiziuns impurtantas ch'èn fin ussa stadas regladas en l'ordinaziun dal cussegl grond davart la pratica da professiuns en il sectur da la sanadad èn vegnidas integradas en la lescha da sanadad. Cumplementarmain latiers vegn ussa relaschada in'ordinaziun da la regenza. La consultaziun dura fin ils 27 da favrer 2006. Ils documents da la consultaziun pon vegnir chargiads sin l'agen computer giu da la homepage dal departament da giustia, polizia e sanitad (www.jpsd.gr.ch).

La regenza beneventa ils plans d'augmentar la pauschala per l'agid d'urgenza en il sectur d'asil
Cun ina decisiun da betg entrar en chaussa va la regenza grischuna d'accord cun ils plans da la confederaziun d'augmentar la pauschala per l'agid d'urgenza sin 1'800 francs per mintga requirenta u per mintga requirent d'asil. Tras questa proposta da cumpromiss - che duai valair retroactivamain per il 1. da schaner 2005 - pon previsiblamain vegnir pajadas las expensas ch'èn resultadas en il fratemp per ils cas ch'èn vegnids attribuids al chantun Grischun. Quai scriva la regenza en sia posiziun a la confederaziun. Cunquai che la confederaziun è pronta da tractar da nov la pauschala, en cas ch'ils custs s'augmentan imprevisiblamain, vegn - tenor la valitaziun da la regenza - ultra da quai reducida la ristga dals custs dals chantuns. Per la regenza èsi plinavant impurtant che models d'indemnisaziun e da finanziaziun futurs vegnian elavurads communablamain. Dapi il 1. d'avrigl 2004 na paja la confederaziun pli nagin agid social per requirentas e per requirents d'asil, sch'i na vegn betg entrà en lur dumondas d'asil. Sco indemnisaziun per lur expensas survegnivan ils chantuns fin ussa ina pauschala unica per l'agid d'urgenza da 600 francs per persuna.

Il chantun sustegna il center per minoritads cun domicil en il Grischun
Il chantun Grischun è pront da sustegnair il center planisà "Convivenza", il center per minoritads. La regenza grischuna ha concludì da garantir ina contribuziun unica da 300'000 francs al chapital da basa dad 800'000 francs da la fundaziun "Convivenza - center internaziunal per minoritads cun domicil en il chantun Grischun". Il cuntegn dal project correspunda per gronda part al concept oriund che n'è fin ussa betg vegnì realisà per differents motivs. La sedia giuridica da la fundaziun è a Mustér, il domicil da fatschenta a Turitg tar l'institut d'Europa da l'universitad da Turitg. Projects duain vegnir realisads en l'entir chantun Grischun. Il center duai servir sco forum da scuntrada per minoritads e promover il dialog tranter differentas gruppaziuns geograficas ed etnicas. La regenza grischuna è anc adina da l'opiniun ch'il chantun saja predestinà sco lieu per in tal center per minoritads ed è da l'avis che quel possia contribuir ina part impurtanta per mitigiar e per prevegnir a conflicts.

Da vischnancas e regiuns
- Val dal Rain grischuna: Il plan directiv regiunal "cuntrada ed abitadi", che la radunanza plenara da la gruppa per la planisaziun regiunala da la Val dal Rain grischuna aveva concludì ils 22 da zercladur 2005, vegn approvà da la regenza e declerà sco liant.
- Schlarigna: A la vischnanca da Schlarigna dat la regenza la permissiun da manar la scola primara e la scolina a partir da l'onn da scola 2006/2007 sin tut ils stgalims en moda bilingua per rumantsch e per tudestg, e quai en il senn dal concept inoltrà ils 28 d'october 2005.
- Nufenen: La regenza approvescha il plan da zonas e plan general da furmaziun 1:1'000 "midada" dals 21 da mars 2005 da la vischnanca da Nufenen.

Contribuziuns chantunalas a differentas instituziuns
- Uniun d'agid umanitar per la Russia: Per la 15avla missiun d'agid da l'uniun d'agid umanitar per la Russia en il territori dad Iwanowo conceda la regenza ina contribuziun da 30'000 francs.
- Project da perscrutaziun e da congress: Il project da perscrutaziun e da congress "Ettore Castiglioni e fugitiv(a)s civil(a)s a Malögia / Il cunfin dal sid dal Grischun 1943 - 1945", planisà il zercladur 2006 a Malögia, vegn sustegnì da la regenza cun ina contribuziun unica dad 8'000 francs.

Projects da vias
La regenza ha approvà totalmain 500'000 francs per il mantegniment architectonic e per la renovaziun da la A13, Soazza - San Bernardin/sid dal tunnel.

Chaussas persunalas
- Marcus Valaulta, inschigner da construcziun diplomà STS/UTS, domicilià a Rueun, è vegnì nominà sco schef da l'uffizi districtual da construcziun bassa 6 a Glion.
- Urban Maissen, domicilià a Mustér, è vegnì nominà sco manader regiunal (regiun Surselva a Glion) tar l'uffizi forestal dal Grischun.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun