Mesemna, ils 12 d'avrigl, ha ina persuna privata constatà peschs morts en il Rain da Nalps. L'examinaziun successiva tras l'uffizi da chatscha e pestga ha mussà che l'entir effectiv da peschs è perì en il traject da l'aual pertutgà. Fin ussa n'èn enconuschents ni il motiv precis ni la persuna che ha chaschunà questa disgrazia.
La sera dals 12 d'avrigl ha la surveglianza locala da pestga a Sedrun survegnì l'annunzia ch'i sajan vegnids constatads peschs morts en il Rain da Nalps. La surveglianza da pestga ha alura rimnà intgins peschs morts ed ha prendì ina emprova d'aua. En connex cun in'examinaziun sistematica da l'aual il proxim di han collavuraturas e collavuraturs da l'uffizi da chatscha e pestga chattà ulteriuras 170 litgivas d'aual mortas da tut las categorias da grondezza. La controlla cun agid da la pestga electrica ha mussà che l'entir effectiv da peschs è perì sin ina lunghezza da ca. 700 meters davent da la tschiffada d'aua da la Hydro-Surselva fin a la sbuccada en il Rain anteriur. Sporadicamain è er vegnida constatada macrofauna d'aua morta. En il Rain anteriur sez n'èn betg vegnids vis peschs morts.
Il motiv per la muria andetga dals peschs n'ha fin ussa anc betg pudì vegnir eruì. Ils scleriments sco er in'analisa da l'aua vegnan ad instruir, sche substanzas toxicas per ils peschs èn eventualmain arrivadas en las auas da surfatscha ed han chaschunà questa muria.

Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun