La cumissiun per furmaziun e cultura dal cussegl grond ha tractà la missiva da la regenza davart la sanaziun architectonica da la scola chantunala Halde a Cuira. La cumissiun propona unanimamain al cussegl grond d'entrar en il project. Per questa fatschenta vegn la cumissiun presidiada dal deputà Daniel Zindel. A la sesida da la cumissiun è sa participà er il cusseglier guvernativ Stefan Engler.
Ils 16 da matg 2004 avevan las votantas grischunas ed ils votants grischuns refusà il project "construcziun nova e sanaziun da la scola chantunala da Cuira". Cun la missiva ch'è ussa avant maun vegn perquai suttamessa a la deliberaziun dal cussegl grond exclusivamain la sanaziun da la scola chantunala Halde. Questa sanaziun previsa è integrada en in concept general e sa basa sin in program per l'entir areal che po vegnir realisà en etappas. Il project da sanaziun po vegnir concludì per sasez, senza ch'i resultian tras quai obligaziuns per eventualas renovaziuns da stabiliments existents e per lur engrondiment. Cun proceder en etappas èsi plinavant pussaivel da prender resguard sin eventualas midadas en la politica da furmaziun e d'adattar il program per l'entir areal, sche quai è necessari.
En sia missiva al cussegl grond renda la regenza attent a l'urgenza dal project da sanaziun pervi dal nausch stadi architectonic da la scola chantunala Halde e pervi da la problematica da PCB. Sch'il cussegl grond approvescha il project, po vegnir cumenzà la stad 2007 cun las lavurs da sanaziun. Las lavurs da construcziun duain vegnir exequidas en trais etappas d'in onn e cun mantegnair parzialmain il manaschi da scola.
Suenter avair tractà pli detagliadamain la fatschenta è la gronda maioritad da la cumissiun da l'avis ch'il stadi architectonic da la scola chantunala Halde e ch'ils andaments da manaschi respectivs sajan uschè manglus ch'ina sanaziun cumplessiva stoppia vegnir prendida per mauns en moda speditiva. Tras il cusseglier guvernativ Stefan Engler sco er tras las expertas e tras ils experts da l'uffizi da construcziun auta e da la scola chantunala - ch'eran medemamain preschents - ha la cumissiun pudì sa laschar persvader che l'edifizi Halde correspundia - ina giada ch'el è sanà - a tut las pretensiuns, e quai tant ord vista archtitectonica sco er ord vista da la scola.
Consequentamain ha la cumissiun deliberà cun 10 cunter 1 vusch il concept architectonic per la sanaziun da la scola chantunala Halde a Cuira; per realisar quest concept duai vegnir concedì in credit d'impegn da 50 milliuns francs. Unanimamain ha la cumissiun prendì il conclus concernent la colliaziun dals lieus da scola "Plessur" e "Halde" tenor ils basegns da las persunas cun impediments. En quest reguard duai la regenza vegnir incumbensada d'elavurar in project separà.
Il cussegl grond vegn a tractar quest project durant la sessiun da zercladur 2006.

Persuna che dat infurmaziuns:
Daniel Zindel, cumissiun per furmaziun e cultura, tel. 077 423 10 53

Gremi: cumissiun per furmaziun e cultura
Funtauna: rg cumissiun per furmaziun e cultura