La regenza grischuna ha prolungà il termin per inoltrar las dumondas per stipendis d'in mais a trais mais suenter il cumenzament da la scolaziun. La revisiun parziala correspundenta da las directivas per il pajament da stipendis sco er dal reglament per ils stipendis per la scolaziun professiunala e supplementara è vegnida approvada da la regenza. Il passà ha mussà ch'il termin d'inoltraziun n'ha betg adina pudì vegnir resguardà. Perquai ch'ina dumonda per stipendis inoltrada memia tard ha stuì vegnir refusada enfin ussa, hai dà cas gravants betg giavischads u schizunt sistidas da la scolaziun. La nova regulaziun duai resguardar las petentas ed ils petents. Per che las circa 3'000 dumondas possian vegnir liquidadas, insista la regenza - per motivs organisatorics - dentant sin in termin d'inoltraziun. Da nov sto ina dumonda vegnir inoltrada il pli tard trais mais suenter il cumenzament da la scolaziun respectivamain da l'onn da scola. Nova è er la regulaziun ch'ils stipendis pon - en cas che la dumonda è vegnida inoltrada memia tard - anc vegnir pajads per la perioda a partir da l'inoltraziun fin a la fin da l'onn da scolaziun.

Da vischnancas e regiuns
- Grono: Il plan da zonas 1:1'000 dals 14 da mars 2004 da la vischnanca da Grono vegn approvà. Er approvà vegn il plan da zonas 1:2'000 dals 26 da november 2000.
- Rossa: La regenza ha approvà il project da rempars cunter crudada da crappa "Sta. Domenica" da la vischnanca da Rossa. Als custs cun dretg da subvenziun dad 850'000 francs vegn garantida ina contribuziun chantunala da 20 pertschient u da maximalmain 170'000 francs. Il project sto er vegnir approvà da l'uffizi federal d'ambient, guaud e cuntrada.
- Via da Valzeina: Sin la via da Valzeina, davent da la punt da la Landquart fin a la fin da la via chantunala, vegn dauzà il pais maximal permess da 11 sin 13 tonnas. La limita dal pais temporara da 18 tonnas per il temp dals 15 da matg fin ils 15 d'october resta.
- Realta - Roten: Sin la colliaziun laterala da Realta - Roten fin a la bifurcaziun "Forstgarten" vegn dauzà il pais maximal permess da 28 respectivamain da 18 sin 40 tonnas.
- Via da la Tumleastga: Sin la via da la Tumleastga, davent da la colliaziun laterala da Farschno fin a l'access a la via da Scharàns, vegn dauzà il pais maximal permess da 28 sin 32 tonnas.
- Via da Scharàns: Sin la via da Scharàns fin a la bifurcaziun tar l'implant da gera vegn dauzà il pais maximal permess da 28 sin 32 tonnas.

Contribuziuns chantunalas a differentas instituziuns
- leger.GR: L'associaziun leger.GR - giuventetgna e medias Grischun (pli baud: cuminanza da lavur grischuna da cudeschs per la giuventetgna, BAJ) survegn ina contribuziun chantunala da 40'000 francs. L'associaziun leger.GR, da la quala passa 50 bibliotecas èn commembras, sa participescha essenzialmain vi da l'installaziun e vi da l'engrondiment da la rait da bibliotecas en il Grischun.
- Club da tennis da Zernez: Il club da tennis da Zernez survegn ina contribuziun da maximalmain 13'000 francs or dal fond da sport per installar in nov pastget da tennis artifizial.

Projects da vias
- Sviament da Flem: Per far tschertas installaziuns d'electricitad en ils tunnels dal Crap da Flem e dal Prau Pulté sco er tar ils implants exteriurs dal sviament da Flem ha la regenza concedì 4'100'000 francs.

Chaussas persunalas
- Magnus Rageth, ch'è domicilià a Domat, è vegnì numnà da l'uffizi forestal dal Grischun sco manader regiunal da la regiun Val dal Rain grischuna / Scanvetg.
- Matthias Zubler, ch'è domicilià a Schafisheim, è vegnì numnà sco inschigner forestal regiunal da la regiun Signuradi/Partenz/Tavau da l'uffizi forestal dal Grischun.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun