L'economia turistica dal Grischun ha passentà in temp difficil
durant l'ultim passà. La performance da l'economia turistica dal
Grischun è lunsch sut la media en cumparegliaziun cun las meglras
destinaziuns da l'artg alpin. Spezialmain en il turissem da stad ston
ins augmentar la cumpetitivitad. Quai resulta d'ina studia da benchmark
ch'il BAK Basel Economics ha fatg per incumbensa da l'uffizi per
economia e turissem.
A chaschun da la radunanza generala da Grischun vacanzas dals 26 da
zercladur 2006 a Claustra han ins preschentà il rapport "benchmark dal
turissem per il Grischun". Questa valitaziun speziala analisescha la
capacitad productiva (performance) e la cumpetitivitad dad otg
destinaziuns impurtantas ed è vegnida fatga dal UFC per incumbensa da
l'uffizi per economia e turissem. Ils resultats duain furnir premissas
per rinforzar la capacitad da rendita e per explotar ils potenzials
avant maun en l'economia turistica dal Grischun.
Las destinaziuns cun succes dal Grischun: Scuol e San
Murezzan-Puntraschigna
La cumprova da prestaziun da las singulas destinaziuns grischunas sa
differenziescha cleramain. Las duas destinaziuns Scuol e San
Murezzan-Puntraschigna disponan da la meglra performance da tut las
destinaziuns grischunas. En il rom da la studia da benchmark dal
turissem dal UFC per il Grischun èn vegnids analisads ils lieus San
Murezzan e Puntraschigna sco exempels per l'Engiadin'ota. En la posiziun
da mez èn las destinaziuns da Samignun, d'Arosa, da Lai, da
Tavau-Claustra e da Flem-Laax. La pli disfavuraivla performance
cuntanscha la destinaziun Mustér-Sedrun, responsabla per quest resultat
nausch è la serrada dal hotel "Acla da Fontauna" a Mustér.
Attractivitad mancanta durant la stad
Tut tenor destinaziun èn ils facturs decisivs per la cumpetitivitad
internaziunala da l'economia turistica grischuna differentamain
pregnants. Per tut las destinaziuns grischunas vala che las premissas
attractivas da la cuntrada èn ina fermezza impurtanta. Ins po
perencunter localisar flaivlezzas oravant tut tar las strategias da
differenziaziun da las singulas destinaziuns. Oravant tut Tavau-Claustra
dispona durant la stad e durant l'enviern d'in potenzial dal martga che
na vegn betg tratg a niz. Era Flem-Laax - che dispona d'in potenzial
supplementar durant la stad - sto pigliar la sfida.
Recumandaziuns a l'economia turistica dal Grischun
Las economas ed ils economs dal BAK Basel Economics vesan ina
direcziun essenziala per optimar la cumpetitivitad en la
professiunalisaziun da las structuras da destinaziun e dal manaschement
da destinaziuns. Spezialmain las destinaziuns pitschnas e mesaunas dal
Grischun ston pigliar la sfida da cooperar anc pli fitg resp. da
s'integrar en destinaziuns pli grondas. En il center duai star la
creaziun d'organisaziuns da destinaziun pli grondas che disponan
d'avunda professiunalitad e d'avunda meds finanzials per sa defender en
futur sin il martgà mundial.
Tar il posiziunament en il martgà ston ins prender en mira ina
vendita exclusiva pli evidenta: Las destinaziuns grischunas ston dar en
egl or da la massa da las offerentas e dals offerents che midan adina
puspè. En quest connex pon ins bain emprender dals exempels da success
en l'artg alpin, ins na dastga dentant betg pruvar da copiar u d'imitar
quels.
In'ulteriura recumandaziun ha la finamira da realisar
consequentamain strategias da varietad e da spezialisaziun. Per las
destinaziuns grondas è la sfida quella da prender en mira per il
turissem da l'enviern e da la stad ina multifariadad da la purschida
uschè gronda sco pussaivel. Las destinaziuns pitschnas e mesaunas ston
pigliar la sfida da sa restrenscher ad intgins segments dal martgà e
d'elavurar mintgamai per quests ina purschida generala cumplessiva,
d'auta qualitad ed attractiva dal pretsch.
Per las destinaziuns grischunas giascha il potenzial essenzial en
in'internaziunalisaziun da la dumonda pli gronda. Per l'economia
turistica dal Grischun resultan enorms potenzials supplementars da
dumondas, sch'i gartegiass da trair a niz pli fitg ils martgads
mundials.
La studia pli detagliada stat a disposiziun sut
www.awt.gr.ch
(survista/documents) e po vegnir chargiada sin l'agen computer.
Gremi: departament da l'intern e da l'economia publica
Funtauna: rg uffizi per economia e turissem