Sut il presidi da la presidenta da la cumissiun Barla Cahannes Renggli ed en preschientscha dal schef dal departament da giustia, polizia e sanitad, cusseglier guvernativ Martin Schmid, dal president da la dretgira chantunala Norbert Brunner e dal president da la dretgira administrativa Johann Martin Schmid ha la cumissiun dal cussegl grond per giustia e segirezza predeliberà en pliras sesidas la fatschenta voluminusa cun il titel "optimaziun da l'organisaziun giudiziala chantunala (refurma da la giustia)". La cumissiun propona unanimamain al cussegl grond d'entrar en il project.
La cumissiun affirmescha unanimamain quai che er la regenza ha constatà en sia missiva, numnadamain il basegn d'agir tar l'organisaziun da la giustia chantunala. Correspundentamain sustegna la cumissiun per gronda part las propostas da la regenza. Opiniuns divergentas cun propostas da maioritad e da minoritad datti tar la dumonda, sche l'uffizi da derschadra u da derschader duai vegnir concepì unicamain sco uffizi cumplain (grad d'occupaziun 100%) u per part er sco uffizi principal (grad d'occupaziun almain 60%). La varianta da l'uffizi principal vegn sustegnida d'ina minoritad da la cumissiun. Ina maioritad ed ina minoritad da la cumissiun datti er tar la dumonda ch'è vegnida discutada en moda cuntraversa, numnadamain sche occupaziuns accessoricas duain vegnir permessas u scumandadas per las derschadras e per ils derschaders a la dretgira chantunala ed a la dretgira administrativa. Ina clera maioritad da la cumissiun è da l'avis decidì ch'i na duajan esser permessas naginas occupaziuns accessoricas. Ulteriurs temas centrals dal project concernan plinavant la procedura electorala e la liberaziun da l'uffizi da derschadras e da derschaders chantunals. Omadus puncts - sco dal rest l'entir project - vegnan sustegnids cleramain da la cumissiun.
La fatschenta è vegnida deliberada da la cumissiun per mauns dal cussegl grond. Quel vegn a sa fatschentar en la sessiun d'avust 2006 cun il project.

Persuna che dat infurmaziuns:
Barla Cahannes Renggli, presidenta da la cumissiun per giustia e segirezza
tel. 078 745 50 22

Gremi: cumissiun per giustia e segirezza
Funtauna: rg cumissiun per giustia e segirezza