Pervi da la constituziun chantunala vertenta èsi necessari da relaschar ina nova lescha davart las taglias communalas e davart las taglias da baselgia. Questa lescha furma la basa futura per las vischnancas e per las baselgias per incassar taglias. Tras la nova lescha duai il dretg fiscal dentant er vegnir concepì en moda pli simpla, pli survesaivla e pli unitara.
Las vischnancas, las baselgias chantunalas ed ils cumins-baselgia han ina suveranitad fiscala deducida dal chantun. Els han pia ina suveranitad fiscala mo en quella dimensiun ch'il chantun als conceda.
L'anteriura constituziun chantunala cuntegneva ina disposiziun che deva a las vischnancas ed a las baselgias directamain il dretg d'incassar taglias. La constituziun chantunala vertenta na cuntegna dentant betg pli ina tala disposiziun. La suveranitad fiscala da las vischnancas e da las baselgias sto vegnir reglada il futur en ina lescha. Quai duai succeder en la nova lescha davart las taglias communalas e davart las taglias da baselgia (LTCTB). Cun questa lescha duai vegnir creada la basa legala necessaria per l'incassament da las differentas taglias tras las vischnancas, tras las baselgias chantunalas e tras ils cumins-baselgia. La regenza ha deliberà la missiva correspundenta per mauns dal cussegl grond. Il parlament vegn a la tractar en la sessiun d'avust.

Dapli transparenza e segirezza giuridica
La concessiun da la suveranitad fiscala en favur da las vischnancas e da las baselgias po vegnir concepida da princip en trais modas:
- Sco regulaziun definitiva da la taglia communala en il dretg chantunal; las vischnancas ston mo pli fixar l'import da la taglia respectiva e l'autoritad cumpetenta.
- Sco legislaziun generala che vegn concretisada en la lescha communala da taglia respectiva; las vischnancas han ina libertad d'agir legala limitada.
- Sco suletta norma da delegaziun; las vischnancas han ina auta autonomia da legislaziun.
La decisiun en favur d'ina u da l'autra regulaziun na po betg vegnir tratga generalmain. Ella sto plitost vegnir prendida en dependenza dal gener da taglia. Per differents geners da taglia ston vegnir instradadas differentas vias. Las restricziuns duain esser là pli intensivas, nua che las regulaziuns dad oz èn gia fitg unitaras u là, nua che regulaziuns betg unitaras difficulteschan l'applicaziun dal dretg. I duai vegnir creada ina soluziun dal dretg fiscal optimala tant per las vischnancas sco er per las e per ils pajataglia.

Regulaziuns definitivas en il chantun
Las regulaziuns da las taglias communalas sin las entradas e sin la facultad èn oz quasi identicas cun quellas dal dretg chantunal. Ellas duain perquai er vegnir unifitgadas en la LTCTB. Las vischnancas incasseschan ina taglia en pertschients da la taglia chantunala simpla. Decisiuns da taxaziun, decisiuns da protesta e da procedura da recurs che pertutgan las taglias chantunalas e communalas vegnan relaschadas a medem temp.
Per la taglia sin il gudogn tras la vendita da bains immobigliars valan las medemas ponderaziuns, cun l'excepziun che las vischnancas na dastgan betg incassar in pe da taglia sin la taglia communala sin il gudogn tras la vendita da bains immobigliars. Las regulaziuns communalas èn oz quasi identicas cun il dretg chantunal, uschia ch'ellas duain vegnir unifitgadas en la LTCTB. Ultra da la taxaziun inclusiv da la procedura da meds legals duai er l'incassament esser chaussa dal chantun.
La basa legala da la taglia sin midada da maun è reglada en las 207 vischnancas en moda fitg differenta. Da quai resultan difficultads en la pratica da taxaziun e dischavantatgs en la segirezza giuridica, in fatg che vegn adina puspè crititgà da las vischnancas. Per quest motiv cuntegna la LTCTB ina regulaziun definitiva. La vischnanca po mo pli fixar l'import da la taglia sin midada da maun (maximalmain 2%). Las vischnancas perdan qua ina part da lur autonomia, daventan dentant pli effizientas e pli cumpetentas en l'applicaziun dal dretg. Er en il futur vegn la taglia sin midada da maun taxada ed incassada da las vischnancas.
Per la taglia sin immobiglias han oz la gronda part da las vischnancas disposiziuns ch'èn praticamain textualmain identicas. Per quest motiv duai er la taglia sin immobiglias vegnir reglada definitivamain en la LTCTB. Ina regulaziun definitiva n'ha de facto betg per consequenza che l'autonomia communala vegn eliminada; i vegn mo cementada la realitad giuridica actuala en la LTCTB. La taglia vegn incassada ensemen cun la taglia sin las entradas e sin la facultad respectivamain ensemen cun la taglia sin il gudogn e sin il chapital. Per retrair la taglia sin immobiglias è la vischnanca vinavant cumpetenta.

Autonomia legislativa communala
La taglia sin l'ierta e sin donaziuns na duai betg vegnir unifitgada pervia da la diversitad da las reglas actualas e pervia da la differenta concepziun da las tariffas fiscalas. Las vischnancas duain agir en quest sectur vinavant independentamain en tut las dumondas da la legislaziun e pudair taxar ed incassar independentamain la taglia. Tuttina pon las vischnancas incassar mo pli ina taglia sin l'ierta en lingia laterala; conjugals, partenarias registradas e partenaris registrads sco er descendentas e descendents directs ston stringentamain vegnir liberads da la taglia.
La taxa da cura e la contribuziun per promover il turissem èn concepidas oz fitg differentamain en las vischnancas. Qua duain las vischnancas restar vinavant autonomas en la legislaziun. Ina delegaziun da taxaziun e d'incassament a l'uniun da turissem è pussaivla er en il futur.

Tariffas maximalas
Sch'il chantun deleghescha la suveranitad fiscala, sto el er fixar tariffas maximalas. En il dretg existent ha la regenza limità la taglia sin immobiglias sin 1‰ e per vischnancas cun dretg da gulivaziun sin 1.5‰. Per extender las pussaivladads da finanziaziun da las vischnancas, duai la tariffa maximala da la taglia sin immobiglias vegnir augmentada da nov sin 2‰. En quest connex na vegni betg pli distinguì tranter vischnancas fermas e las vischnancas deblas da finanzas.
L'augment da la tariffa maximala na signifitgescha betg automaticamain in augment da la taglia sin immobiglias. Las vischnancas vegnan a stuair decider, tge tariffa fiscala che duai vegnir fixada en la lescha communala da taglia.

Eliminaziun da la distorsiun da concurrenza
En il dretg vertent èn ils instituts autonoms dal chantun generalmain liberads da la taglia sin immobiglias e da la taglia sin midada da maun. Da nov duai esser decisiv, sche las immobiglias en dumonda servan directamain ad intents d'utilitad publica. Bains immobigliars d'instituts chantunals che na servan betg directamain ad intents d'utilitad publica na duain betg vegnir tractads autramain che tut ils auters bains immobigliars, e quai per motivs da la neutralitad areguard la concurrenza. Da questa novaziun vegnan ad esser pertutgadas surtut la cassa da pensiun chantunala, la banca chantunala grischuna e l'institut d'assicuranza d'edifizis.

Gremi: regenza
Funtauna: rg chanzlia chantunala dal Grischun