La regenza grischuna beneventa da midar - sco previs da la confederaziun - las disposiziuns davart il provediment da basa en l'ordinaziun davart il servetsch da telecommunicaziun. Ils servetschs existents duain vegnir eliminads en il provediment da basa ed en lur pe duain vegnir recepids novs servetschs. Questas adattaziuns als basegns socials ed economics proponidas po la regenza da princip confermar, sco ch'ella constatescha en sia consultaziun.
Ella beneventa fitg ch'i vegn recepì in access a l'internet a bindel lad sin la glista dals servetschs da provediment da basa. La regenza è dal medem avis sco la confederaziun ch'ina disponibladad per l'entira Svizra promova la furmaziun da la societad d'infurmaziun e che per las interpresas pitschnas e mesaunas (IPM) igl è impurtant da metter a disposiziun in access bunmartgà a l'internet a bindel lad. Gist per las regiuns periferas - tuttina sco per ils centers d'aglomeraziun - èsi d'ina impurtanza economica e sociala fundamentala da pudair disponer pli spert pussaivel da las tecnologias da communicaziun mintgamai las pli novas.
Resalvas exprima la regenza percunter davart la pussaivladad da pudair reducir il servetsch d'access a l'internet a bindel lad, sche l'access na permetta betg in access a bindel lad per motivs tecnics u sche motivs economics pledan cunter in tal. A l'avis da la regenza cuntegna questa pussaivladad previsa memia blera libertad d'acziun. Perquai propona ella ina formulaziun pli restrictiva. La purschida duai mo pudair vegnir reducida, sch'ina purschida alternativa equivalenta vegn garantida ad in pretsch sumegliant. La regenza na va la finala betg d'accord cun il fatg ch'il servetsch da deviaziun da cloms duai vegnir eliminà. Dal puntg da vista da la regenza ha quest servetsch tuttina ina tschert dretg d'existenza economic. Cunzunt ils manaschis pitschens, sco ch'els existan primarmain en las regiuns periferas, èn dependents d'in numer da telefon central cun quest servetsch supplementar.

Da vischnancas e regiuns
- Seewis: La vischnanca da Seewis survegn per il project da malaura "Bärgli-Matantobel" ina contribuziun chantunala da maximalmain 210'700 francs.
- Preaz: Per renovar il provediment d'aua vegn pajada a la vischnanca da Preaz ina contribuziun per la gulivaziun da finanzas da maximalmain 236'400 francs.
- Schlarigna: Il plan da zonas parzial 1:1'000 Lavinatschas sco er il plan general da furmaziun 1:1'000 / 1:500 Lavinatschas da la vischnanca da Schlarigna dals 12 da december 2005 vegnan approvads.
- Castiel: La regenza ha approvà il project singul "Malauras 2005, reparaziun dal territori da bovas 'Riser'", da la vischnanca da Castiel. Als custs cun dretg da subvenziun da 330'000 francs vegn garantida ina contribuziun chantunala da 20 pertschient u da maximalmain 66'000 francs.
- Claustra-Serneus: Il project singul "Malauras 2005, reparaziun da las ovras da protecziun 'Claustra-Serneus'", da la vischnanca da Claustra-Serneus vegn approvà. Als custs cun dretg da subvenziun dad 1'165'000 francs vegn garantida ina contribuziun chantunala da 12 pertschient u da maximalmain 139'800 francs.

Contribuziuns chantunalas a differentas instituziuns
- Promoziun da la cultura: La regenza grischuna ha concedì contribuziuns da totalmain 188'000 francs per promover 21 occurrenzas ed ovras culturalas.
- Uniun per la citad veglia da Cuira: L'uniun per la citad veglia da Cuira survegn ina garanzia da deficit da 12'000 francs per las intervenziuns previsas en il rom dal project "chur_interveniert" da l'onn 2006 a Cuira.
- Campiunadis mundials da snowboard da la FIS 2007: A l'uniun da la FIS snowboard world championships 2007 Arosa vegn empermessa ina contribuziun da 230'000 francs per realisar ils campiunadis mundials da snowboard l'onn 2007. La contribuziun vegn concedida a la cundiziun che la vischnanca d'Arosa, la swiss olympic e l'uffizi federal da sport sa participeschan er en il rom previs.

Projects da vias
La regenza ha approvà totalmain 800'000 francs per construir e per sanar il suandant traject da via:
- via da Tschiertschen: Ricaldei, Steinbachtobel - Farenboden

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun