Las ambassaduras ed ils ambassadurs da la gruppa Asia/Pacific (GASPA) visitan venderdi, ils 16 da zercladur 2006, il Grischun. La delegaziun vegn manada dal doyen da las ambassaduras e dals ambassadurs da la GASPA, sia excellenza Ri Tcheul, ambassadur da la republica populara democratica da Corea. Ambassaduras ed ambassadurs da totalmain 11 pajais fan part da la delegaziun da 21 persunas. Represchentads èn la republica populara democratica da Corea, la republica da las Filippinas, la republica islama da Pakistan, la republica populara da la China, la republica da Corea, il reginavel da Bhutan, Nepal, la republica socialista da Vietnam, la republica d'Indonesia, la republica d'India sco er Malaisia. Ospitantas resp. ospitants èn il president da la regenza Claudio Lardi, la cussegliera guvernativa Eveline Widmer-Schlumpf, il cusseglier guvernativ Hansjörg Trachsel, il chancelier Claudio Riesen sco er Olivier Federspiel, directur da Grischun vacanzas. Suenter il bainvegni dals giasts a Cuira è previsa ina visita sin il plantahof a Landquart. Suenter visitan las delegaziuns a chaschun d'in tur da manaschi la Ems-Chemie SA a Domat.
La regenza tgira mintga onn contacts cun represchentantas e cun represchentants da stadis esters en Svizra. Quests discurs èn elements impurtants da las relaziuns externas dal chantun. En connex cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas materialas actualas. Autras visitas servan en emprima lingia al barat d'experientschas sin il champ cultural, economic e politic.

Gremi: Chanzlia chantunala dal Grischun
Funtauna: rg chanzlia chantunala dal Grischun