La regenza grischuna propona al cussegl grond da recumandar al pievel da refusar la "iniziativa chantunala dal pievel per ina scola media grischuna senza numerus clausus". Il cussegl grond vegn a tractar la fatschenta en la sessiun da december.
Ils 15 da zercladur 2005 è la "iniziativa chantunala dal pievel per ina scola media grischuna senza numerus clausus" vegnida inoltrada tar la chanzlia chantunala cun 3662 suttascripziuns valaivlas. Ella è vegnida lantschada cun la finamira principala d'abolir il numerus clausus en las scolas medias grischunas. Quel era vegnì concludì l'avust 2003 en connex cun las mesiras da spargn ch'èn stadas urgentamain necessarias.
En sia missiva constatescha la regenza che la finamira principala da l'iniziativa saja ademplida. Ils 2 da matg 2006 ha ella numnadamain abolì la restricziun d'admissiun d'ina durada limitada retroactivamain per il 1. da mars 2006. Quest conclus ha la regenza prendì resguardond ina sentenzia actuala dal tribunal federal ch'è s'exprimì davart l'admissibladad d'introducir ina restricziun d'admissiun en il gimnasi dal chantun Glaruna. Ella ha constatà che la lescha davart las scolas medias en il chantun Grischun na cuntegnia betg la basa legala necessaria per introducir ina restricziun d'admissiun.
Ulteriurs giavischs da l'iniziativa correspundan er al dretg vertent. Uschia prevesa er l'iniziativa che la qualificaziun da las candidatas e dals candidats per frequentar ina scola media vegnia eruida cun agid d'in examen d'admissiun u d'ina autra procedura da selecziun. E sco tar il dretg vertent valan questas prescripziuns er per scolaras e per scolars che vulan frequentar ina scola media privata che vegn subvenziunada dal chantun.
En connex cun quest resultat è la regenza da l'avis ch'i na saja betg necessari or dal puntg da vista da la legislaziun d'introducir ina nova regulaziun legala. Il motiv per quai è ch'igl è gia tenor il dretg vertent inadmissibel d'introducir ina restricziun d'admissiun. Sche l'iniziativa vegniss acceptada n'avess quai tenor la regenza er nagin effect sin la procedura d'admissiun a las scolas medias grischunas. Las candidatas ed ils candidats stuessan sa suttametter ad ina procedura da qualificaziun sco enfin uss.
La finala constatescha la regenza ch'ils signals da la politica da dretg d'ina votaziun dal pievel che stuess eventualmain vegnir realisada na fissan betg interpretabels en moda fidada, tranter auter perquai che l'iniziativa na chaschunass nagina midada materiala da la situaziun giuridica vertenta e ch'i na vegniss pia betg votà per u cunter l'introducziun d'in numerus clausus.

Gremi: regenza
Funtauna: rg chanzlia chantunala dal Grischun