La regenza ha relaschà las prescripziuns da chatscha 2007. La novaziun la pli impurtanta: la chatscha cumenza il 1. da settember e vegn interrutta dals 10 fin ils 16 da settember. Las midadas da las prescripziuns da chatscha èn vegnidas limitadas a quai ch'è absolutamain necessari, per che las consequenzas dals novs temps da chatscha possian vegnir giuditgadas meglier.

Novs temps da chatscha il settember
La chatscha auta 2007 dura sco suonda: dal 1.-9 e dals 17-28 da settember. Cun ils novs temps da chatscha e cun l'interrupziun vegni empruvà d'augmentar la preda da tschiervs durant il mais da settember. Quai vegn fatg er per distgargiar la chatscha speziala da la fin d'atun ch'è stada fitg contestada.
Ulteriuras novaziuns che pon vegnir realisadas sin fundament da la revisiun parziala da la legislaziun davart la chatscha èn er la regulaziun persunala da las armas da chatscha ed il diever facilità da vehichels a motor per chatschadras e per chatschaders cun in grev impediment direct d'ir a pe.

Buns effectivs da tschiervs e da chavriels
Il chantun Grischun posseda anc adina in fitg bun effectiv da tschiervs en la dimensiun da circa 13'000 animals. Per pudair stabilisar quest effectiv èsi necessari da sajettar 4'190 animals. Ils plans da prelevaziun en las 21 regiuns da tschiervs vegnan adattads mo levamain.
L'ultim enviern miaivel ha procurà ch'ils effectivs da chavriels èn s'augmentads. En spezial vegnan puspè observads pli savens ferms bucs da chavriel.

Chatscha sin chamutschs restrenschida pervia da la tschorvadad da chamutschs
L'atun e l'enviern passà han stuì vegnir sajettads numerus chamutschs en Engiadin'ota sco er en il Grischun central. Quests chamutschs eran infectads cun la tschorvadad da chamutschs. Cun las prescripziuns da chatscha adattadas vegn mitigià il squitsch da la chatscha sin chamutschs. La durada da la chatscha vegn reducida - sco gia l'onn passà en il territori cunfinant - per quatter dis ed il contingent sin ina chaura-chamutsch.

La chatscha bassa dal Grischun è persistenta
Per la selvaschina manidla han gì las stads miaivlas dals ultims onns ina influenza positiva. Tant tar las lieurs sco er tar las giaglinas selvadias constateschan ils organs da surveglianza da chatscha buns effectivs cun in svilup constant u positiv. L'evaluaziun da la preda da chatscha è in'autra basa da datas impurtanta per planisar la chatscha bassa. Sin fundament da questas datas poi vegnir constatà che l'utilisaziun da la selvaschina manidla per la chatscha è persistenta en il Grischun. Ultra da quai gida la chatscha bassa a finanziar la tgira da las spezias da mamals e d'utschels permessas per la chatscha e protegidas.

Paucas midadas en las prescripziuns da chatscha
Igl èn vegnidas fatgas mo pitschnas midadas vi da las prescripziuns da chatscha. Quai è stà collià cun l'intenziun da pudair giuditgar meglier las consequenzas dals novs temps da chatscha.

Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun