La sessiun d'avust 2007 vegn il cussegl grond a s'occupar tranter
auter da la revisiun totala da la lescha chantunala davart ils fatgs
veterinars. Sut il presidi dal deputà Vincent Augustin ha la cumissiun
per sanadad e fatgs socials predeliberà - a chaschun da duas sesidas -
la missiva correspundenta da la regenza per mauns dal cussegl grond. A
las sesidas da la cumissiun è sa participà er il cusseglier guvernativ
Hansjörg Trachsel. Plinavant ha la cumissiun envidà ad in hearing
represchentantas e represchentants da la societad da las veterinarias e
dals veterinaris grischuns sco er da l'industria da mazlaria.
Las numerusas midadas ch'èn resultadas dapi l'entrada en vigur da la
lescha chantunala davart ils fatgs da veterinari, il 1. da schaner 1995,
en las leschas federalas chaschunan er midadas sin plaun chantunal. Per
intginas disposiziuns dals decrets vertents en il sectur dals fatgs da
veterinari è necessaria - pervia da lur impurtanza tenor la nova
constituziun chantunala - ina regulaziun sin plaun legislativ. Intginas
disposiziuns dals decrets vertents en il sectur dals fatgs da veterinari
chaschunan - tenor la nova constituziun chantunala - ina regulaziun sin
plaun legislativ, e quai pervia da lur impurtanza. Plinavant vegnan mess
novs accents en ils secturs da la tgira da la sanadad d'animals e dal
possess da chauns, e quai sin fundament da las experientschas fatgas. La
cumissiun è dal medem avis sco la regenza che pertutgant il sectur dal
possess da chauns na stoppian betg vegnir introducidas novaziuns
fundamentalas sco per exempel l'obligaziun da metter si in buccaré,
l'obligaziun da tegnair a la tschinta entaifer e/u ordaifer il territori
populà, tschertas mesiras repressivas pli rigurusas per chauns privlus
e.u.v. Areguard la vischinanza tar ils fatgs po la legislaziun executiva
chantunala tar la lescha federala davart la protecziun dals animals
vegnir integrada en la lescha davart ils fatgs da veterinari.
Suenter avair discutà il project en moda intensiva propona la
cumissiun al cussegl grond unanimamain d'entrar en il project e da
deliberar il sboz da lescha cun intginas midadas.
Gremi: cumissiun per sanadad e fatgs socials
Funtauna: rg cumissiun per sanadad e fatgs socials