Il referendum cunter la revisiun parziala da la lescha davart ils
fatgs da sanadad dal chantun Grischun (lescha da sanadad) dals 19
d'avrigl 2007 è reussì cun 2'187 suttascripziuns valaivlas. La regenza
ha fixà il termin per la votaziun dal pievel davart quest project sin
ils 25 da november 2007.
Da la verificaziun che la chanzlia chantunala ha fatg da las
suttascripziuns inoltradas sin las glistas da suttascripziuns attestadas
è resultada ina differenza cun las indicaziuns dal comité da referendum.
Effectivamain èn vegnidas inoltradas 2'240 e betg 2'323 suttascripziuns.
Da quellas ston vegnir deducidas 136 suttascripziuns che n'èn betg
valaivlas. Uschia restan anc 2'187 suttascripziuns valaivlas.
La revisiun parziala da la lescha da sanadad prevesa tranter auter
da scumandar il fimar en localitads serradas ch'èn accessiblas al
public, sche quai na succeda betg en localitads separadas per fimadras e
per fimaders.
Nova ordinaziun davart las scolaziuns e davart ils examens a
la scola auta da pedagogia
Las scolaziuns ed ils examens a la scola auta da pedagogia dal
Grischun vegnan reglads da nov. Per quai ha la regenza relaschà la nova
ordinaziun davart las scolaziuns e davart ils examens a la scola auta da
pedagogia. Quella entra en vigur il 1. da settember 2007 e remplazza
l'ordinaziun d'examen per la scola auta da pedagogia sco er l'ordinaziun
davart la scolaziun fundamentala a la scola auta professiunala da
pedagogia.
Cun questa nova ordinaziun vegn ademplida ina pretensiun da la
cumissiun da renconuschientscha da la conferenza svizra da las
directuras e dals directurs chantunals da l'educaziun publica (CDEP).
Quella aveva renconuschì ils 29 da matg 2007 la ils diploms da scola
auta per persunas d'instrucziun dal stgalim prescolar e primar da la
scola auta da pedagogia dal Grischun. La renconuschientscha entra
immediatamain en vigur e vala retroactivamain per ils diploms ch'èn
vegnids emess dapi il 1. da zercladur 2006. Diploms ch'èn vegnids emess
avant questa data èn er renconuschids retroactivamain en tut la Svizra.
Il secretariat da la cumissiun da renconuschientscha emetta sin dumonda
in'attestaziun correspundenta.
En la nova ordinaziun vegnan regladas respectivamain adattadas al
dretg surordinà tranter auter las premissas d'admissiun al studi, la
scolaziun e las cumprovas da prestaziun sco er la finiziun dal studi cun
l'examen da diplom.
La revisiun parziala da la lescha per promover il svilup economic en
il chantun Grischun entra en vigur il 1. da settember 2007
La regenza grischuna ha mess en vigur per il 1. da settember 2007 la
revisiun parziala da la lescha per promover il svilup economic en il
chantun Grischun. Il cussegl grond aveva tractà la revisiun parziala en
la sessiun d'avrigl e l'aveva acceptada cun 102 cunter 2 vuschs. Il
termin da referendum è scadì il 1. d'avust 2007 senza ch'i saja vegnì
fatg in tal.
Uschia survegn la fundaziun planisada, numnadamain la fundaziun
grischuna per innovaziun, svilup e perscrutaziun la basa legala
necessaria e la constituziun da la fundaziun po vegnir prendida per
mauns. Er il project innovativ "novas colliaziuns da traffic", che vegn
er finanzià cun meds dal retgav finanzial extraordinari da la banca
chantunala grischuna, vegn reglà tras questa lescha. Il medem mument sco
l'entrada en vigur da questa lescha ha la regenza approvà la revisiun da
l'ordinaziun per promover il svilup economic en il chantun Grischun.
Da vischnancas e da regiuns
- Murmarera: La vischnanca da Murmarera vegn assegnada a la
corporaziun regiunala dal Grischun central sco commembra ordinaria. La
participaziun cumenza ils 30 da settember 2007.
- Calantgil, Farera ed Avras: Las vischnancas da Calantgil, da Farera
e d'Avras vegnan assegnadas a la corporaziun regiunala "regioViamala"
sco commembras ordinarias. La participaziun cumenza il 1. da schaner
2008.
- St. Luzisteig: Sin la via dal Luzisteig, plazza federala d'armas
St. Luzisteig, areal da la fortezza, vegn introducida la sveltezza
maximala da 50 km/h, e quai sin ina lunghezza da ca. 150 meters.
Contribuziuns chantunalas a differentas instituziuns
Center da tecnologia per il lain a Maiavilla: Il project da
construcziun da l'institut per furmaziun supplementara professiunala
IFSP dal Grischun per construir da nov il center da tecnologia per il
lain a Maiavilla vegn approvà. A l'instituziun responsabla vegn
garantida ina contribuziun chantunala da 604'350 francs.
Projects da vias
La regenza ha approvà totalmain 1'800'000 francs per construir e per
sanar il suandant traject da via:
via naziunala A13: direcziun generala dal project 2007 dal
sviament da Roveredo
Fatgs dal persunal
Andrea Zinsli, domicilià a Cuira, directur da la praschun chantunala
dal Sennhof, è vegnì nominà supplementarmain sco directur dal
stabiliment chantunal da Realta sco er sco substitut dal manader da
l'uffizi per l'execuziun giudiziala.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun