En il Grischun duai vegnir centralisada la surveglianza da las fundaziuns classicas en in post tar il chantun. La regenza ha deliberà la missiva correspundenta tar la revisiun parziala da la lescha introductiva tar il cudesch civil svizzer per mauns dal cussegl grond. Quel vegn a tractar questa fatschenta en la sessiun d'october 2007.
En il Grischun vegnan las fundaziuns classicas survegliadas oz da quella communitad a la quala ellas appartegnan pervi da lur intent u pervi da lur incumbensa, pia dal chantun, dal circul u da la vischnanca. Sco fundaziun vegnan definidas per regla quellas fundaziuns che n'èn betg concepidas sco fundaziuns da prevenziun.
Las pretensiuns per survegliar questas fundaziuns èn s'augmentadas ils ultims onns. Quai d'ina vart pervi da las dumondas pli cumplexas e da l'autra vart pervi da las midadas da las cundiziuns da basa giuridicas ed economicas. Uschia ha la revisiun da dretg da fundaziun sin il 1. da schaner 2006 purtà intginas novaziuns ed augmentà las pretensiuns envers la surveglianza.
Oz surveglia il chantun 300 fundaziuns, las vischnancas ed ils circuls surveglian 50 fundaziuns. Blers circuls e bleras vischnancas èn cumpetents mo per ina suletta fundaziun. Quai n'als permetta betg d'elavurar il know-how da surveglianza necessari.
Perquai duai la surveglianza da tut las fundaziuns classicas vegnir centralisada tar quel post dal chantun ch'ha gia oz la surveglianza da las fundaziuns ch'èn suttamessas al chantun. Quest post dispona da l'experientscha e da las enconuschientschas dal dretg da fundaziun che pussibiliteschan ina surveglianza senza incaps. Il dumber da cas augmentà maina ad in'ulteriura professiunalisaziun da la surveglianza, quai che serva er a las fundaziuns sezzas ed a la segirezza giuridica. Ils circuls e las vischnancas involvids en la consultaziun beneventan il project da la regenza senza resalvas.

Gremi: regenza
Funtauna: rg chanzlia chantunala dal Grischun