En il Grischun duain vehichels che chaschunan paucas emissiuns
vegnir distgargiads fiscalmain en il futur. En quest connex ha la
regenza grischuna avert la consultaziun da la lescha introductiva tar la
lescha federala davart il traffic sin via.
En la sessiun da december 2005 aveva il cussegl grond acceptà ina
incumbensa che oblighescha la regenza d'integrar en la legislaziun er la
svapur da dioxid carbonic sco element directiv supplementar per fixar la
taglia da traffic. Plinavant pretenda l'intervenziun ch'i stoppian
vegnir examinads ulteriurs models da stimulaziun che pudessan promover
pli e pli da midar a vehichels a motor che dovran carburants che
produceschan paucas substanzas nuschaivlas.
Per motivs dal dretg constituziunal basegna la realisaziun da questa
incumbensa ina basa sin il stgalim legal. Cun questa chaschun duai
l'entira legislaziun executiva dal dretg dal traffic sin via, ch'è
reglada sin il stgalim da l'ordinaziun vegnir messa sin in nov fundament
ed adattada il medem mument als basegns actuals.
Sco punct central prevesa il sboz da consultaziun che vehichels a
motor, che chaschunan paucas emissiuns, survegnian in reducziun da la
taglia da traffic da 60 fin 80 pertschient. Tge ch'igl è manegià cun
"paucas emissiuns" vegn la regenza a reglar en moda separada sin il
stgalim da l'ordinaziun. Cunvegnenta per la regenza è ina reducziun da
la taglia da traffic da 60 pertschient per vehichels a motor cun ina
svapur da dioxid carbonic da maximalmain 160 grams per kilometer e dad
80 pertschient per tals cun ina svapur da maximalmain 140 grams per
kilometer. Tar vehichels da diesel na dastga ultra da quai la svapur da
pulvra fina betg surpassar 0.01 grams per kilometer.
Ils documents da consultaziun èn avant maun sin la pagina d'internet
dal departament da giustia, segirezza e sanadad (www.djsg.gr.ch). La
consultaziun dura fin ils 15 da december 2007.
Lescha chantunala davart ils supplements da famiglia duai vegnir
adattada a las prescripziuns federalas
La regenza grischuna ha deliberà per la consultaziun il sboz per ina
revisiun parziala da la lescha davart ils supplements da famiglia. Cun
questa revisiun parziala duain vegnir ademplidas las prescripziuns da la
confederaziun en il sectur dals supplements da famiglia.
Ils 26 da november 2006 avevan las votantas svizras ed ils votants
svizzers acceptà la lescha davart ils supplements da famiglia en ina
votaziun da referendum. Igl è planisà da metter en vigur questa lescha
per il 1. da schaner 2009. Ils chantuns èn obligads d'adattar lur urdens
da supplements da famiglia fin il pli tard sin l'entrada en vigur da las
disposiziuns federalas.
La lescha federala davart ils supplements da famiglia fixescha
tranter auter da nov ina tariffa minimala per tut la Svizra da 200
francs per mais per supplements per uffants e da 250 francs per mais per
supplements per scolaziun. En il chantun Grischun importan ils
supplements per uffants actualmain 195 francs per mais ed ils
supplements per scolaziun 220 francs per mais. La revisiun parziala
planisada fixescha ussa en la lescha che l'autezza dals supplements da
famiglia sa drizzia en il Grischun tenor las tariffas minimalas da la
confederaziun. Sco ulteriur punct central prevesa la revisiun da
realisar per gronda part il princip "in uffant - in supplement". In
dretg da survegnir supplements da famiglia na duain da nov betg mo avair
lavurantas e lavurants, mabain er persunas senza activitad da gudogn e
tut las persunas cun activitad da gudogn independenta.
Er il sistem da finanziaziun sto vegnir adattà. Contribuziuns da
finanziaziun vegnan a pajar da princip - ultra da las lavurantas e dals
lavurants - da nov tut las persunas cun activitad da gudogn independenta
fin ad entradas tenor la lescha federala davart l'assicuranza
d'accidents d'actualmain 106'800 francs, tut las persunas senza
activitad da gudogn, sche lur contribuziuns surpassan la contribuziun
minimala da la AVS, sco er il chantun.
Cur che la lescha davart ils supplements da famiglia revedida entra
en vigur, vegn la tariffa da contribuziun per patrunas e per patruns sco
er per persunas cun activitad da gudogn independenta da la cassa da
cumpensaziun per famiglias dal chantun Grischun fixada a 1.7 pertschient
da l'entrada ch'è suttamessa a las contribuziuns da la AVS, premess che
las prestaziuns na vegnian betg augmentadas.
Dals documents da consultaziun po vegnir prendì invista sin la
pagina d'internet dal departament da l'intern e da l'economia publica
(www.dvs.gr.ch). La consultaziun dura fin ils 30 da november 2007.
Las contribuziuns per la tgira d'uffants cumplementara a la
famiglia vegnan augmentadas
La regenza grischuna ha augmentà las tariffas da las contribuziuns
dal chantun e da las vischnancas per las purschidas da la tgira
d'uffants cumplementara a la famiglia per l'onn 2008, e quai da 15 sin
25 pertschient. Ultra da quai vegn augmentada la tariffa da contribuziun
per purschidas novas da 15 sin 25 pertschient durant ils emprims trais
onns da gestiun. Ils custs normads per las purschidas da la tgira
d'uffants cumplementara a la famiglia cun dretg da survegnir
contribuziuns importan - per l'onn 2008 - 9.20 francs per ura da tgira e
per uffant.
En la sessiun da favrer 2007 ha il cussegl grond prendì
enconuschientscha dal rapport da famiglia dal chantun Grischun. En il
rapport da famiglia vegnan proponidas - en differents secturs - mesiras
per meglierar la situaziun da las famiglias. Ina da quellas mesiras
prevesa d'augmentar la tariffa da contribuziun per purschidas novas da
15 sin 25 pertschient durant ils emprims trais onns da gestiun. Da quai
profiteschan en tut quatter purschidas a San Murezzan, a Claustra, a
Domat ed a Bever. Per il chantun e per las vischnancas importan ils
custs supplementars mintgamai circa 37'000 francs.
En il rapport da famiglia aveva la regenza proponì ultra da quai dad
auzar en general la tariffa da contribuziun per purschidas existentas da
15 sin 20 pertschient. En quest connex importan ils custs supplementars
per il chantun e per las vischnancas mintgamai circa 335'000 francs.
En tut fa il chantun quint cun custs da circa 2.9 milliuns francs
per l'onn 2008 per purschidas da la tgira d'uffants cumplementara a la
famiglia, vi dals quals il chantun e las vischnancas ston sa participar
mintgamai per la mesadad.
La regenza beneventa l'egualitad tar il num e tar il dretg da
burgais da conjugals
La regenza grischuna sustegna la proposta da la cumissiun da dretg
dal cussegl naziunal che prenda en mira in'egualitad tar il num e tar il
dretg da burgais da conjugals. Las regulaziuns vertentas concernent il
num e concernent il dretg da burgais en il cudesch civil svizzer na
garanteschian betg in'egualitad cumplaina da la dunna e da l'um, scriva
la regenza en sia consultaziun.
La nova regulaziun prevesa da fixar en il cudesch civil svizzer
ch'il num da naschientscha na vegnia betg midà per vita duranta. Quai
vul dir ch'ina maridaglia n'ha da princip nagin effect sin il num. Ils
spus pon dentant declerar ch'els vulan avair in num da famiglia
cuminaivel. Quai po esser tant il num nubil da la spusa sco er dal spus.
Sche geniturs maridads portan differents nums, survegn mintga uffant
quel num ch'ils geniturs fixeschan sco num cuminaivel a chaschun da la
naschientscha da l'emprim uffant. Ultra da quai duai il dretg da burgais
chantunal e communal vegnir collià cun il num da naschientscha. A la
regenza para ultra da quai la proposta da la minoritad da la cumissiun
d'esser raschunaivla, tenor la quala la conjugala u il conjugal po
agiuntar il num da l'autra persuna sco num d'allianza a ses agen num.
Repartì la dieschma d'alcohol 2006
La regenza grischuna ha repartì la dieschma d'alcohol en l'autezza
da 576'715 francs per l'onn da gestiun 2006. Quests daners vegnan
duvrads per projects da prevenziun, per custs da tractament sco er per
projects da perscrutaziun e da furmaziun. Tenor la lescha federala
davart las bavrondas destilladas sto la quota dals chantuns dal retgav
net da l'administraziun federala d'alcohol vegnir duvrada per cumbatter
l'alcoholissem en ses motivs ed en sias consequenzas sco er per
cumbatter l'abus da drogas, da narcotics e da medicaments.
Da vischnancas e da regiuns
- RegioViamala: La lescha davart il svilup dal territori e davart il
plan directiv "regioViamala" che la radunanza regiunala da la
regioViamala aveva concludì ils 4 d'avrigl 2007 è vegnida approvada. Per
realisar il program da plirs onns concernent il svilup regiunal dal
territori da la regio Viamala per la perioda 2007 - 2010 vegn deliberà
in credit da 120'000 francs.
Contribuziuns chantunalas a differentas instituziuns
- Meds finanzials da la lottaria naziunala: La regenza ha approvà
circa 414'000 francs or dal fond da la lottaria naziunala per intents
culturals. En quest connex vegnan resguardadas en tut 73 instituziuns.
- Tgira da monuments: Als custs per la 3. etappa da la restauraziun da
la catedrala da l'Assumziun da Cuira vegn pajada ina contribuziun da
maximalmain 446'085 francs.
- Pro Grigioni italiano: A la pro Grigioni italiano vegn concedida ina
contribuziun da maximalmain 30'000 francs per la preschentaziun dal
Grischun talian sco "regiun da giast d'onur" a la messa d'atun grischuna
GEHLA 2008 a Cuira.
Gremi: regenza
Funtauna: rg chanzlia chantunala dal Grischun