Il termin per las vischnancas e per las regiuns da candidar per la
realisaziun da la sessiun dal cussegl grond en la regiun il zercladur
2009 è scadì ils 15 d'october 2007. En tut èn vegnidas inoltradas sis
candidaturas tar il secretariat dal cussegl grond. I sa tracta da las
suandantas vischnancas e regiuns: Puntraschigna, Puschlav, Samignun,
Scuol, Zernez sco er la regiun dal Grischun central cun Savognin sco
lieu da sessiun.
Il secretariat dal cussegl grond vegn ussa ad examinar ils dossiers
en moda formala ed areguard lur cuntegn ed als transmetter a la
conferenza da las presidentas e dals presidents dal cussegl grond.
Suenter sia predeliberaziun vegn questa fatschenta preschentada al
plenum dal cussegl grond. Quai vegn fatg probablamain la sessiun da
zercladur 2008. Cun resalva da la decisiun definitiva dal cussegl grond
vegn la sessiun dal cussegl grond ad avair lieu il zercladur 2009
ordaifer Cuira.
Il cussegl grond aveva concludì la sessiun da favrer 2007 da far ina
sessiun en la regiun almain ina giada per perioda da legislatura. Tut
las communitads publicas interessadas (vischnancas, circuls, districts,
corporaziuns regiunalas) èn alura vegnidas envidadas cun ina publicaziun
uffiziala d'inoltrar lur dossiers fin ils 15 d'october 2007. Tut las
candidaturas ston resguardar ils criteris che vegnan pretendids areguard
l'infrastructura, areguard ils indrizs, areguard il program da las
localitads ed areguard ils alloschis. Tranter auter basegni ina sala da
radunanza cun circa 150 plazzas da lavur per il cussegl grond, per la
regenza sco er per las medias. Ultra da quai basegni anc stgars 50
plazzas per las aspectaturas e per ils aspectaturs sco er differentas
localitads da sesida e da lavur. Plinavant ston star a disposiziun
avunda pussaivladads per s'alimentar e per durmir, e quai en la proxima
vischinanza da la sala da radunanza. La finala pretendan ils criteris er
avunda plazzas da parcar sco er ina buna cuntanschibladad cun il traffic
public.
Gremi: chanzlia chantunala dal Grischun
Funtauna: rg chanzlia chantunala dal Grischun