La regenza grischuna ha approvà in nov reglament da servetsch per
ils organs chantunals da surveglianza da chatscha e da pestga che entra
en vigur il 1. da december 2007. Cun quest nov reglament vegnan fatgas
las adattaziuns necessarias a la legislaziun chantunala da chatscha e da
pestga ch'è vegnida midada sco er a la legislaziun chantunala dal
persunal.
Visavi il dretg vertent cuntegna il nov reglament per gronda part
adattaziuns formalas. Materialmain ha il reglament da servetsch
surpiglià duas midadas. Per l'ina po l'indemnisaziun da las spesas dals
organs da surveglianza da chatscha e da pestga vegnir remunerada
totalmain u parzialmain sco indemnisaziun pauschala. Per l'autra è ussa
admissibel il diever d'armas da fieu cunter persunas tras ils organs da
surveglianza da chatscha mo pli a norma da la lescha da polizia dal
chantun Grischun.
La "iniziativa.d'etica" è reussida
L'iniziativa dal pievel "iniziativa.d'etica" ch'è vegnida inoltrada
ils 10 d'october 2007 è reussida cun 3'164 suttascripziuns valaivlas.
Quai ha constatà la regenza grischuna. La dumonda d'iniziativa è vegnida
redigida en la furma d'in sboz elavurà per midar la lescha davart las
scolas popularas dal chantun Grischun.
L'iniziativa dal pievel "per premias da la cassa da malsauns pli
bassas" sco er las cuntrapropostas da las chombras federalas vegnan
refusadas
La regenza grischuna refusa tant l'iniziativa dal pievel "per
premias da la cassa da malsauns pli bassas en l'assicuranza
fundamentala" sco er las cuntrapropostas dal cussegl dals chantuns e dal
cussegl naziunal. En sia consultaziun va la regenza d'accord cun las
duas chombras federalas da recumandar da refusar l'iniziativa. Ella è
qua dentant da l'avis dal cussegl federal che propona da far questa
recumandaziun senza cuntraproposta. La regenza è da princip persvadida
ch'i na basegna naginas ulteriuras disposiziuns da la politica da
sanadad sin plaun da la constituziun.
Las duas cuntrapropostas da las chombras federalas ch'èn vegnidas
dadas en consultaziun vegnan refusadas perquai che numerusas da las
disposiziuns proponidas èn nunnecessarias. Questas duas cuntrapropostas
èn gia definidas sin plaun da la lescha u vegnan discutadas actualmain
en il rom da la revisiun da la lescha federala davart l'assicuranza da
malsauns. Ultra da quai èn auters elements da las cuntrapropostas
politicamain fitg contestads. Las cuntrapropostas han la finamira da
permetter dapli concurrenza en ils fatgs da sanadad sco per exempel cun
la libertad da contract tranter las furnituras ed ils furniturs da
prestaziuns e las assicuranzas. La regenza beneventa da princip quests
elements da concurrenza cun excepziun d'introducir la libertad da
contract per il sectur da l'ospital da lunga durada. Ella approvescha er
il passadi che la cumissiun propona tar la finanziaziun monistica
(unitara) dals ospitals.
En vista a las lavurs legislativas currentas constatescha la regenza
ch'ella renconuschia cleramain las refurmas en ils fatgs da sanadad, las
qualas servan a mitigiar il svilup dals custs. Ma la regenza deplorescha
la procedura da consultaziun a curta vista. Las dumondas tschentadas èn
d'ina uschè gronda muntada ch'ina discussiun pli detagliada fiss stada
necessaria.
Da vischnancas e da regiuns
- Lü: Il plan da zonas 1:1'000 "Lüsai" da la vischnanca da Lü
dals 27 d'avust 2007 vegn approvà.
- Foppa/Rueun: Il plan per il svilup dal guaud Foppa/Rueun vegn
approvà. Quel regla l'utilisaziun futura dal guaud e fixescha las
finamiras e las strategias da cultivaziun da la selvicultura a lunga
vista per la regiun.
Contribuziuns chantunalas a differentas instituziuns
- Intermediaziun grischuna da muvel SA: A l'intermediaziun grischuna
da muvel SA vegnan garantids 280'000 francs vi dals custs externs da
l'infrastructura da la tecnologia d'infurmaziun per il project
"transport & logistica". Per il manaschi a partir da l'onn 2009 vegn
mess a disposiziun - en il senn d'in agid inizial - in import total da
1'000'000 francs per quatter onns. Sco soluziun transitorica vegn
deliberà in import da maximalmain 200'000 francs per l'onn 2008. Quest
import serva a gulivar ils custs da transport dal muvel da maz a las
plazzas da fiera.
- Club da curling da Tavau: Sche la finanziaziun totala reussescha,
vegn garantida ina contribuziun chantunala da 400'000 francs al club da
curling da Tavau respectivamain a la societad d'aczias che sto anc
vegnir fundada, e quai per construir in center da curling a Tavau.
- Uniun "Alpine Sports Events St. Moritz Engadin": A l'uniun "Alpine
Sports Events St. Moritz Engadin (ASESE)" vegn garantida ina
contribuziun da 120'000 francs vi dals custs da candidatura per ils
champiunadis mundials da skis alpins da la FIS 2013. Quai sut la
premissa che la vischnanca da San Murezzan sa participeschia a la
finanziaziun en il rom previs.
- Federaziun grischuna da hockey sin glatsch: Per sa participar a las
concurrenzas da hockey sin glatsch dals gieus da la ARGE ALP 2007/2008
il december a Puntina survegn la federaziun grischuna da hockey sin
glatsch ina contribuziun da maximalmain 7'500 francs or dal fond da
sport.
- Promoziun da la cultura: La regenza ha concedì contribuziuns da
totalmain 154'500 francs per promover 20 occurrenzas ed ovras
culturalas.
Gremi: regenza
Funtauna: rg chanzlia chantunala dal Grischun