Glindesdi, ils 29 d'october 2007, ha gì lieu sin l'areal dal ARBES a Giuvaulta l'emprima badigliada uffiziala per engrondir e per adattar ils edifizis dal lieu da lavur e d'occupaziun.
L'engrondiment e l'adattaziun dals edifizis ch'èn vegnids construids ils onns 1995/1996 correspundan al basegn da plazzas da lavur protegidas che s'augmenta cuntinuadamain. Ils 14 da zercladur 2007 ha il cussegl grond approvà in credit brut da 2.6 milliuns francs. L'uffizi federal d'assicuranzas socialas ha empermess ina contribuziun da 750'000 francs.
Il stabiliment è sa cumprovà fitg bain en sia concepziun da basa. Tras la gronda acceptanza dal stabiliment actual sco er tras ponderaziuns economicas è resultà il concept ch'è ussa avant maun e che prevesa da construir in nov lavuratori da medema natira, d'engrondir la serra cun locals da lavur e da construir in deposit da laina cuvrì.
Cun il conclus dals 12 da december 2006 ha la vischnanca da Giuvaulta approvà il barat da terren tranter la vischnanca ed il chantun. Tras quest barat da terren - ch'è necessari per il project - resulta in areal cumplain, sin il qual il basegn actual da spazi po vegnir realisà optimalmain. A medem temp porscha el reservas avunda da terren da construcziun per svilups futurs. La midada necessaria en ina zona per edifizis e per stabiliments publics ha medemamain gì lieu.
Il biro "Sprecher architectura" a Tavau è stà abel da cumplettar il stabiliment adequat en moda raschunaivla sco er da tegnair liber surfatschas per eventuals engrondiments. Ils edifizis novs, las midadas da construcziun e las construcziuns annexas engrondeschan il program da spazi per 680 meters quadrat. Quest project resguarda las structuras existentas e las cumplettescha respectivamain las extenda cun mesira. Tar il nov lavuratori sa tracti - analogamain a l'edifizi existent - d'ina construcziun da lain integrala che vegn realisada en ina moda da construcziun cun elements e ch'è optimada areguard l'energia. Il nov edifizi d'orticultura sper la serra è ina construcziun d'atschal usitada cun elements da fatschada isolads. Il nov local da lavur che vegn construì en questa moda permetta da lavurar en l'orticultura independentamain da l'aura. Las lavurs da construcziun duran previsiblamain fin l'atun 2008.

Gremi: uffizi da construcziun auta dal Grischun
Funtauna: rg uffizi da construcziun auta dal Grischun