La regenza grischuna beneventa la midada da l'ordinaziun davart la taxa directiva sin cumbinaziuns organicas svapurantas. La confederaziun propona da prolungar la pussaivladad d'ina liberaziun da la taxa sin cumbinaziuns organicas svapurantas (COS) per ulteriurs quatter onns. Per vegnir liberadas da la taxa, ston las interpresas reducir lur svapur per 50 pertschient visavi las limitas. Ensemen cun ils oxids da nitrogen èn las cumbinaziuns organicas svapurantas las substanzas precursuras per furmar ozon.
Sco che la regenza scriva en sia posiziun, beneventa ella il fatg che la pussaivladad da liberar ils manaschis da la taxa vegn prolungada. Questa liberaziun da la taxa vala cunzunt per manaschis che han gia fatg grondas investiziuns en mesiras che gidan a reducir las emissiuns. Dentant spetga la regenza che la confederaziun profitia dals proxims quatter onns per chattar soluziuns che permettan da betg pli stuair prolungar il termin in'ulteriura giada.

Da vischnancas e da regiuns
- Müstair: La revisiun parziala da la planisaziun locala "engrondiment da la zona da mastergn Chassellas" da la vischnanca da Müstair dals 20 da zercladur 2007 vegn approvada.
- Panaduz, Razén: Il statut d'organisaziun dal "consorzi da scola per il stgalim aut da Panaduz-Razén" vegn approvà.
- Tujetsch: La constituziun da la vischnanca da Tujetsch dals 21 d'october 2007 vegn approvada.

Contribuziuns chantunalas a differentas instituziuns
- "Fondo film plus": Al project "fondo film plus" vegn pajada - en il senn d'ina fasa da test - ils onns 2008, 2009 e 2010 ina contribuziun da en tut maximalmain 30'000 francs.
- Fundaziun curt lia grischa, Trun: Per repassar la cartoteca da l'inventari dals objects survegn la fundaziun curt lia grischa, Trun, in sustegn finanzial unic en l'autezza da maximalmain 11'250 francs.

Gremi: regenza
Funtauna: rg chanzlia chantunala dal Grischun