Il president dal cussegl dals chantuns per la perioda d'uffizi 2007/2008 sa numna previsiblamain Christoffel Brändli. Mesemna, ils 5 da december 2007, ha lieu a Landquart la festa per sia elecziun. A las 16.00 è la populaziun envidada ad in apero public sin la plazza da la staziun a Landquart.
Per cumenzar la sessiun d'enviern da las chombras federalas è tractandada glindesdi, ils 3 da december 2007, l'elecziun da Christoffel Brändli sco president dal cussegl dals chantuns. La festa uffiziala en onur dal nov president da la chombra pitschna ha lieu mesemna, ils 5 da december 2007, en la vischnanca dad Igis. Il represchentant grischun dal cussegl dals chantuns viagia da Berna a Landquart en accumpagnament dal cusseglier federal Moritz Leuenberger, da commembras e da commembers dal cussegl naziunal e dal cussegl dals chantuns sco er d'ulteriurs giasts. Il suentermezdi baud arriva il tren spezial a Landquart. En il Forum im Ried a Landquart cumenza alura l'act festiv uffizial per ils var 450 giasts envidads da Berna e dal Grischun. Suenter il bainvegni tras il president communal Ernst Nigg pledan il cusseglier federal Moritz Leuenberger, il president da la regenza Martin Schmid sco er il nov president dal cussegl dals chantuns. Per l'accumpagnament musical da l'act festiv procura Maurice Steger.
Suenter l'act festiv uffizial en il Forum im Ried datti - a partir da las 16.00 - in apero public a la plazza da la staziun a Landquart. A quest apero è la populaziun envidada cordialmain. Vi da differents stans da martgà vegni offrì da baiver e da mangiar. L'apero dura fin las 19.00. Ils giasts envidads sa rendan dentant gia a partir da las 17.00 en il lavuratori da la viafier retica a l'occurrenza uffiziala da la sairada cun in banchet. A la sairada èn previs pleds dal president dal cussegl grond Leo Jeker, dal nov emprim vicepresident dal cussegl dals chantuns Alain Berset sco er dal vicepresident da la partida populara svizra Toni Brunner. Per il rom musical da l'occurrenza da la sairada procuran Paulin Nuotclà, il chor viril da Cuira sco er ils chors virils da Landquart. La saira returna il tren spezial a Berna.
La festa dal president dal cussegl dals chantuns vegn actualmain preparada cun plaina forza. Questa festa vegn organisada da la chanzlia chantunala dal Grischun ensemen cun la vischnanca dad Igis.

Gremi: Chanzlia chantunala dal Grischun
Funtauna: rg chanzlia chantunala dal Grischun